^{2 1} Che inako yi swana varutwana cho kuiiza kwa Jeeso, nni vati,'' njeeni mukulwaana mu muvuso wo kuiwulu? '' ² Jeeso choku va sumpira ka hwiire, choku ka ziimika mukati kaavo, ³ Cho kucho kuti, ''cho vusakusima nni mulwiirite, mbwiita hoo sanduka choku swana mane iiri muhwiire, keeti nno wiinjire mu muvuso we iwulu. ⁴ Lyiinu, iiye yo yle kokoveza iiri muhwiire muniini yoo swana njeeye mukaando mu muvuso we iwulu. ⁵ Mmi zumwe nne zumwe yeeti nna woonde nenza ku taambula muhwiire yo swana nnozu mu izina lyaangu chaa nni taambula. ⁶ Mmi yo chiita kuti a va vaniini va zumina mwaangu, kuvaa lukeere kuti ivwe ikaando nnilyi suungwa mu insiingo yaakwe, mmi mane choku soherwa mu iwate lyii chiire. ⁷ Ku mayivite inkaanda che ivaka lyo milyiko kamba zikupi! Ee ku shiyeeme kuti izo inako zi iize, mmi ku mayivite iiye muntu yoo taangisa mulyiko ⁸ haiva iyaanza kamba iteende lyaako ziku kupisa, lyi kosoolye choku lyi sweeha.Kwi ina vutuka kuti wiinjire mu vuhalo nno kosokete chirama kamba nno chunkuta, kwaanda kuti u kwiina mayaanza oonse nne mateende oonse ku zwaaho choku ka soherwa mu ibimbiriro lyo mulyiro. ⁹ lyiinso lyaako lyiku pangisa mulaandu , lyi ngongomone mwa, cho kulyi sohera kuna. Ka kuti kwiina vutuka kuti wi njire mu vuhalo che lyiinso lyii mwiina, kwaanda kuti uka soherwa mu ibimbiriro lyo mulyiro nno wiina menso oonse. ¹⁰ Mutokomere kuti kamu nyaansi voo vwaava vahwiire. Ka kuti nni mulwiirite ku iwulu mangiloyi aavo ee kala nni a lweera chifateho che isheenu yo wiina ku iwulu. ¹¹ Ka kuti mwaana wo mukwaame a veeza kuku haza [vuluka] vana va zovete. ¹² O zeeza volye? Haiva muntu wiina imberere ziina mwaanda, mmi yimwe yaazo choku zova , aa keeti choo siya zina ziina makumi a mana iyaanza nne oonne nne ku mana iyaanza nne toonne, cho kuya ku maruundu nnaa kasaka yiina yimwiina ya zova? ¹³ Mmi ha iwanika , nni mulwiira kuti, u manina chaa lyitumerera iiyo imberere, ku zaamba ziina makumi a mana iyaanza nne oonne ku mana iyaanza nne toonne, zi sana zi vaa zovi. ¹⁴ Che inziza e swana, ke na ku saka kwa isheenu yo wiina ku iwulu kuti zumwe waava vaniini cho kuzova ¹⁵ Chi kuti mukulwaako yoo zaalwa nnaaye u ku fosekeza, kwiiya u ka mu lwiire mafosisa a kwe, ha kati ka a kwe nawe.Chi kuti u ku teeka, mo ve ku mu wolyete. ¹⁶ Mmi haa saka ku zuwi, mu sumpe omwi o vuveeri kuti za mu teekesa. mwiina nnaangati voovere, kuti cho kuya cho tulomo toovere kamba tootatwe vushupi vu woola ku nitihazwa. ¹⁷ Mmi haa kaana kuva zuwa, mu mulwiire indava ikereke. mmi hape haa kaana ku zuwa ikereke, Lyiinu mu muhiinde kuti muheedani kamba muntu we inkaanda vulyo. ¹⁸ Aaho nni mulwira, chimwe nne chimwe chi mu sumina mu inkaanda kachi suminwa nne ku iwulu. mmi mane hape chimwe nne chimwe cheeti nni musumunune mu inkaanda kachi sumununwe ku iwulu. ¹⁹ Hape ni mu cho kuti, mmi voovere vulyo hava zuminzaana mu inkaanda kuya che chimwe nne chimwe vulyo chiva saka , Taayo yo wiina ku iwulu ka chi chitahaze. ²⁰ Ka kuti voovere kamba vootatwe ha veena choku kuungana che izina lyaangu, nina ha ha kati kaavo. ²¹ Pitorosi chi ku iza kwa Jeeso chi ku mocho kuti,'' Simwiine, muntukuninaangu u swaneezi kuni fosekeza koolye, kuti nni woolye ku mu woondera? Aa mmi yi lukeere kuva kwiina ku mana iyaanza nne toovere? ²² Jeeso chi ku mo cho kuti, '' ku mana iyaanza nne toovere mmi, mbwiita ha kuva makumi a mana iyaanza nne oovere kwiina ku mana iyaanza nne toovere. ²³ Chiingi muvuso woku iwulu u swaniswa nne simwiine zumwe, yaa va hiindi choku siyira zintu zaakwe vahikaana vaakwe. ²⁴ Mmi chiinga taanga ku saka zaakwe, nnaa ka lyeeterwa zumwe yaa vaalyi ku mukorota miyanda miyanda yiina ikumi. ²⁵ Choku waanika kuti cho kaangitwa ku ruwera, simwiine waakwe choku lawula kuti a wuziiwa, iiye koonse vulyo, mwiihaavwe nne vaane, nne chimwe nne chimwe chaakwe chaa veena naacho, ku chitira kuti ituwero yi woolye kuva kwa teni. ²⁶ Mpaaha muhikaana haa va wiiri haansi, choku fukama nna kumbiira nnaati, 'simwiine, nnihe chivaka , mmi kani kuruwere koonse. ²⁷ Mmi simwiine woozo muhikaana, nnaava nno ku mufwiira inse, choku muhulula mane choku mu woondera chikoroti. ²⁸ Mmi muhikaana yoo swana cho kuzwa nnaa kaya mmi choku waana muhikaana siina iiri njeeye, yaa vaalyi ku mukorota malyi a lyikana mwaanda, choku mu ghaanta, choku mu woonda ha mumino, mmi nnaa mucho kuti nni ruwere cho ni kurota. ²⁹ Mwaakwe choku mufukamina nnaaye nnaa mukumbiira nnaati, nni viire inkulo inde kani ku ruwere malyi aako oonse. ³⁰ Mmi iiye choku kaana. Mmi, chokumu hiinda choku ka mu injirika intorongo ku fitera cha na mana ku ruwera chikoroti . ³¹ Mmi lyiinu vamwe vahikaanakunine chiinga vaa vona chi vaa pangahalyi, choku zuwa a hulu vutuku . choku iza ku lwiira simwiine waavo zoonse zi vaa pangahalyi. ^{33 32} Lyiinu simwiine mpaaha haa mu sumpa, choku mucho kuti, 'Ooh uuwe muhikaana yoo fosaheere, nni va ku woonderi chikoroti choonse china ka kuti uva nni kumbiiri . ³³ Uva kaangwa nzi kuti nnaawe u chitire vulyo mwaako siina muni va kufwiiri inse? ³⁴ Mpaaha lyiinu simwiine waakwe haa va nyeerwa, choku muzwiisikiza ku zikevengwa ku manina na ruwera zoonse zaa mukorota. ³⁵ Che inzira yi swana Taayo yo ku iwulu mweeti nnaa mu chitire , Chi ku ti ka mu woonderi vwaakweno cho kuzwa ku mu kati ke inkulo.