¹ Ivuuka yo luzuvo lwa Jeeso Kirisiti, mwaana wa Daafita wa Aburahama. ² Aburahama a vaa zaalyi Isaka; Isaka a vaa zaalyi Jaakovo; Jaakovo a vaa zaalyi Judaasi nneva zaalwa naavo vonse; ³ Mmi Judaasi naa zaala Phareesi nne Zara wa Tamari; mmi Phareesi nna zaala Esiromu; mmi Esiromu choku zaala Aramu; ⁴ Mmi Aramu a vaa zaalyi Aminadabu; naaye Aminadabu choku zaala Naassoni; mmi Naassoni nna zaala Salumoni; ⁵ Mmi Salumoni a vaa zaalyi Boozi wa Rakabu; mmi Boozi choku zaala Obeedi wa Ruute; mmi Obeedi choku zaala Jeese; ⁶ Mmi Jeese a vaa zaalyi Daafita simwiine; mmi Daafita simwiine choku zaala Solomoni iiye inyina a vaalyi muka Yuriyaasi. ⁷ Mmi Solomoni naa zaala Robvwaamu; mmi Robvwaamu naa zaala Abiya; mmi naa zaala Asa; ⁸ Mmi Asa naa zaala Josefati; mmi Josefati naa zaala Joramu; mmi Joramu naa zaala Oziyaasi; ⁹ Uzia a vaalyi isi wa Jotamo,Jotamo isi Ahazi,Ahazi isi Hezekia ¹⁰ Mmi Ezekiyasi naa zaala Manasesi; mmi Manasesi naa zaala Amoni; mmi Amoni choku zaala Josiyasi; ¹¹ Mmi Josiyasi a vaa zaalyi Jekoniyasi nne voonse va vaa zaalwa naavo, mmi yooyo iiyo njiyi vaalyi nje inako yoku hapiiwa kwa vanyu kuya kwa Babiloni: ¹² Kuzwa muku hiindikirwa kwa Babilona, Jekoniya a vaalyi nje iisi wa Sheyelyetiyere, Shiyeretiyere nna alyi nje isikulwa a Zeruvavere. ¹³ Zeruvavere a vaalyi nje iisi wa Abiyudi, Abiyudi cho kuva iisi wa Elyiyakimu, Elyiyakimu nna a va nje iisi wa Azori. ¹⁴ Azori nna a va nje iisi wa Zadoki, Zadoki cho kuva nje iisi wa Achimu, nne Achimu iisi wa Elyiyudi. ¹⁵ Elyiyudi a vaalyi nje iisi wa Eliyaza, Eliyaza iisi wa Matani, nne Matani iisi wa Jaakovo. ¹⁶ Jaakovo cho kuva iisi wa Joosefa muihaavwe wa Mariya, ya a va zaalyi Jeeso, yo u suumpwa Kirisiti. ¹⁷ Lu zuvo loonse vulyo kuzwa kwa Aburahama kuka sika kwa Daafita yi vaalyi vaana va vaana va woonda ikumi nne toonne, kuzwa kwa Daafita kuya kuku hindikirwa kwa Babilona vaana va vaana veena ikumi nne kamwiina, nne kuzwa kuku hindikwa cho kuya kwa Babilona kuiiza kwa Kirisiti vaana va vaana veena ikumi nne toonne. ¹⁸ Ku zaalwa kwa Jeeso ku vaa pangahalyi che iiyi inzira. Inyina Mariya, a vaa veereezwa nne Joosefa, mmi piri nni va seeni kuva haa mwiina, nna waanika nne imiinsi cho luhuho lu jolola. ¹⁹ Muihaavwe Joosefa a vaalyi uunkosi yoo jolola, mmi ka heena a vaa suni kumu fwiisa insoni ku vantu. Mmi nna maniseza kuti a mu kaane mu chipirii. ²⁰ A vaati cho u sii kweete ku nahana che iizi zintu, ingiloyi lye Ireeza choku voneka kwaalyi mu chilooto, nni lyiti, ''Joosefa, mwaana wa Daafita, siye ku tiya ku hiinda muiheenu Mariya, ka kuti iiye yo wiina mu ivumu lyaakwe wiina mwa teni cho luhuho lu jolola. ²¹ Ka a hwizumuke mwaanaswiisu, mmi nno umu wulyike izina kuti nje Jeeso, ka kuti kaa hululye vantu vaakwe mu zivi zaavo.'' ²² Iizi zoonse zi vaalyi ku pangahalyirira kuti chi vaati nni chaa waambwa nne Ireeza cho muporofita, cho uti, ²³ ''Vone, ka mwalye ke imite choku zaala mwaanaswiisu, mmi kava suumpe izina lyaakwe kuti Imanyuwere''--lyi tarusa kutio, ''Ireeza wiina nnaaswe.'' ²⁴ Joosefa nna vuuka mu ingoonzi zaakwe mmi nna chitahaza siina ingiloyi mulyi va mulawiiri mane nna muhiinda cho kuva muihaavwe. ²⁵ Mmi nna vula ku laala nnaaye mbwiteeri chinga a hwizumuka mwaanaswiisu waakwe. Mmi choku mu wulyika izina nnaati nje Jeeso.