^{1 2 3} Pawulo, muhikana wa Jeso Kirisiti, usumpirwa ku va muwapositola, na salyirwa manzwi e Ireeza. Aa nje manzwi a va sepisa kuntanzi che vaporofita vakwe mu mingolo i jolola. Nje ka ha mwaana-swisu wakwe, a va zalwa ku zwa muluzuvo lwa Dafita kuya chechinyama. ^{4 5 6} Cho kuvuka mwaavo va fwiire, a va wambwa niiri mwaanaswisu yo kolyte cho luhuho lu kujolola-Jeeso Kirisiti Simwiine weetu. Cha akwe tu va taambulyi isehuhazo ni vuwapositola vo kuteeka kwe itumero mu makaanda onse, che ivaka lye izina lyaakwe. Mwaa makaanda, naanwe mu va sumpirwa kuva kwa Jeeso Kirisiti. ⁷ Ilyi ingolo njilya vonse avo veena mwa Roma, Vasunwa ve Ireeza, va sumpirwa kuva vantu va jolola. Isehuhazo ka ive naanwe, ne ikozo kuzwa kwe Ireeza isheetu ne simwiine Jeeso Kirisiti. ^{8 9 10} Ntanzi, ni lyi itumerisa Ireeza wangu cha Jeeso Kirisiti cheenu mu vonse, mukuti itumero yeenu ku vambiwa chaayo inkaanda yonse. Mukuti Ireeza mu shupi wangu, u ni tendera mu luhuho lwangu mu manzwi o Mwaanaswisu waakwe, mu ni mu sumpira inako zonse. Inako zonse ni kumbira mu mirapero yangu kuti che yimwi inzira ku mamanimani ni wolye ku woola hanu cho ku suna kwe Ireeza mu kwiiza kweenu. ^{13 14 15} Hanu ka ni suni umwi mu vulye kwiziva, vakwangu-chiswisu, kuti kungi ni ni lyi ikayerera kwiiza kwenu, mi ni va vindiswa ku sika hanu. Ni va lyi kusaka ichi kuti kuve ni chihantu mukati keenu vulyo sina mukati ka Vahedani vonse. Ni korota ku vonse Vaherika ne veenaishira, konse ku vatalyifite ne kuvaholo. Lyinu, nava ime, ni lyi tukuseza ku hasa lyinzwi ne kweenu naanwe mwina mwa Roma. ^{16 17} Mukuti ka ni swaviire mulayeza, mukuti ziho ze Ireeza ze kuvulukwa kwa vonse va zumina, kwa Vajuta intanzi ne kwa Vaherika. Mukuti muulyi, kushiyam kwe Ireeza ku voniswa kuzwa kwe itumero kuya kwe itumero, siina mu ku vangolwa, '' Vashiyami ka va kalye che itumero. '' ^{18 19} Mukuti vukalyi vew Ireeza vu tondezwa kuzwa kwi ihulu kulwisanisa kuvulavuireeza vonse ne ku sa shiyama kwa vantu, va va lyatiriri vusakusima che kusashiyama. Ichi ivaka lyo kuti chi izivitwa ka ha Ireeza chi voneka ku valyi. Mukuti Ireeza a va va tondeza. ^{20 21} Mukuti zi sa vonwa chaakwe zi vavi ni zi voneka mutamalyeere kuzwa ku matangiro inkaanda. Zi zuwisezwa che zintu zi vumbitwa. Izi zintu ziho zaakwe zisamani ne kuvumbwa chiireeza. Niiri zivolyera, ava vantu ka veena chiipato. Ichi ivaka lye, nangati va viizi ka ha Ireeza, ka hena va va mu timbi niiri Ireeza, ne haiva ni va muha vuitumero. Kwandevulyo, va vi vaholo mu minahano yaavo, ne inkulo zaavo zi seena chikumbulusi zi va sitwa. ^{22 23} Va valyi kulyihinda sina vatalyi, mi vavi vaholo. Va sandulyi iverengo ye Ireza yasafwi ku kuswaniswa kwe chiswaniso che muntu yo fwa, kwe zizuni, kwe zivatana za matende one, ne kwe zintu zi chumba. ^{24 25} Lyinu Ireeza a vava heeri ku kulakaza kwe inkulo zaavo ze kusajolola, kuti miviri yaavo i twaalwa isuvi mukati kwaavo. Njo vona avo vava sandule vusakusima vwe Ireeza mapa, ne avo vava fukamini ne ku tendera chivumbati kunze lye muvumbi, yo tembiwa kusamani. Ameni. ^{26 27} Cheivaka lye itchi, Ireeza a va va heeri ku kuyera kutwaala isuvi, mukuti vakulwakazi vaavo vava sandwiiri miteendo yaavo kulyivahana kuvumbwa. Inziraiswana, vakwame naavo vava siiyi miteendo kuvumbwa yaavo ne vakulwakazi ni va hiya mu ku lyilakaza. Ava i vaalyi va kwame va va chiti ne vakwame chi sa shiyeme, ne va tambula mu kavuhavo mulaando u va lyivaheni kuhambuka kwaavo. ²⁸ Mukuti ka hena vava taambulyi kuva ne Ireeza mu kwiiziva, a vava heeri ingana i sa shiyeme, kuti va chite izo zintu zi sa lyivahene. ^{29 30 31} Ve izwiire kusashiyama konse, vuvilaala, kulakaza, ne kurofaza. Ve izwiire muna, kwihaya, kulwa, kuziyeza, ne mayikayerero mavilaala. Kwina kusoha, kusinyamazina, ne vasasuni-Ireeza.Va sasamisa, valyinyemuna, ne kulyiteemba. Va tangi ve zintu zi vilaala, ne kusazuwa vazaazi vaavo. Ka veena kuzuwiseza; ka va sepahalyi, vavula kusuna kuvumbitwa, ne kuvulainse. ³² Va zuwiseza milawozana ye Ireza, kuti avo va chita zintu zi swana neezo va lyivahenwa lufu. Mi ka va chiti izi zintu vulyo, va tambula naavo vamwi va zichita.