¹ Nizumina kuti lyiinu kwiina mukozeinkulo mwa Kirisiti. Nizumina kuti kwiina kutontoza mukusuna kwaakwe. Nizumina kuti kwiina ku woondinsana ko Luhuho. Nizumina kuti kwiina kuzuwiira vutuku ne ku fwiireinse. ² Muchitekuti kusaanga kwaangu kuve musakusima mumihupulo wuumwiina, ne kulyisuna cho kuswana, ne ku woondinzaana mu Luhuho, ne kuva ne muhupulo wuumwiina. ³ Musiye kuchita chimwi cho kulyivoona kapa che iinkaani. Kono cho vuuntu mulolye vamwi vaantu kuti veena neenza ku mizaamba. ⁴ Wuumwi no wuumwi weenu asiye ku lola vulyo zimukaangite, kono alolye ne zivavulyite vaamwi. ⁵ Muve ne muhupulo wuveena ne kwaa Kirisiti Jeeso. ⁶ Avahalyi neena muchiziimo che Ireeza, mmi kana ava lilyikanya chiziimo chaakwe ne Ireeza ku va chiintu chiimwi cha woola kulyi woonderera chaacho. ⁷ Mmi ava lyivozekeza haansi. Naa hiinda chiziimo cho muhiikaana. Na lyichita kulolyeka muchiswano cha vaantu. Na lyiviika muchiswano cho muuntu. ⁸ Na livozekeza kunsi naava neekute kuya kulufu, lufu lwe chifapaano. ⁹ Chikwiinavulyo Ireeza naaye ava munyemwiini kwiiwulu. Naa muha izina lyiina hewuulu lye iizina lyimwi ne lyimwi. ¹⁰ Ava chiiti vulyo kuti che izina lya Jeeso izwi lyimwi ne lyimwi lyifukame, mazwi aveena kwiwuulu ne munkaanda ne kuunsi lye inkaanda. ¹¹ Mmi ava chiti ichi kuti lulyimi lumwi no lumwi lu waambe kuti Jeeso Kirisiti nje Simwiine, ku kuteembwa kwe Ireeza Taayo. ¹² Lyinu aha, vasunwa vaangu, siina ha muzuwa inako zoonse, kundaavulyo chinina hateni kono hanu ku ve ahulu chini saaheena, mulyi vaakanyeza kuhazwa kweenu che lyoowa ne kuchachalyika. ¹³ Mukuti nje Ireeza yo teenda mukati keenu muvoonse ku suna ne kuteendera kushiyama kwaakwe. ¹⁴ Muchite ziintu zoonse ni musa vireeri ne kulyi kanana. ¹⁵ Muchite che iyi inzira kuti muve va seena mulaandu ne ku sepahala, vaana ve Ireeza va seena vuvilala. Muchite che iyi inzira kuti muveere sina malaambi mu inkaanda, mukati ke inaako ya vaantu ve mihupulo mivilala va sashiyeeme. ¹⁶ Mu woondesa ahulu mulyinzwi lyo vuhalo kuti ni niwoolye kuva ne ivaka lyo kuteemba mwiizuva lya Kirisiti. Lyinu aho kaniizive kuti kana niva ng'ombweeri mahalo kapa kuteendera mahala. ¹⁷ Mmi niha kuvavulyo, malahaangu niha etirwa kuva chitavero ne muteendo wokuzumina kweenu, Ni saanga, mmi nisaanga naanwe muvoonse. ¹⁸ Che iinzira iswana naanwe musaaga, mmi musaanga naame. ¹⁹ Mmi Ni zumina mwa Simwiine Jeeso ku tumina Timoti kweenu cho kuhweera, kuti Naame ni woolye kukozwa inkulo hakuti chi neeziva ziintu kaheenu. ²⁰ Mukuti ka niina wumwi haape simuhupulo wuswana, yiwiina vusakusima. ²¹ Mukuti voonse vasaka zaavo ziva koonda, kuunda ee ziintu za Jeeso Kirisiti. ²² Mmi mwiizi kuwoola kwaakwe, mukuti siina mwaana mwaateenda neesi, lyiinu avateedi naame mwi ivangelyi. ²³ Lyiinu Ni zeeza ku mutuma munnako infwiihi ha niiziva kuti ka ku chitahalye vulye kwaangu. ²⁴ Mmi ni zumina kwe Ireeza kuti Iime naame kaniize cho vufwiihi. ²⁵ Mmi ni zeza kuti kuswanera kuti ni tumine Epafuroditasi wuuko kweenu. Mwaanchangu mane niteenda naaye hape isolye kuninaangu, maane mutumwa weenu ne kuti muhikaana we zinivula. ²⁶ Mukuti aava zunguvalyiirwa ahulu, mane aava nungitwa kuva naanwe muvoonse, mukuti mu vazuwi kuti avaalyi kulwaala. Mmi cho vusakusima avaalyi kulwaala. ²⁷ Mmi cho vuniiti avaalyi kulwaala maane seke naafwe. Mmi Ireeza na mufwiirweinse, ising'i chaakwe vulyo, mmi ne chaangu, chokuti ni siiye kuva neinsoni he wuulu lye insoni. ²⁸ Lyinu chiingi ni mutumina kweenu cho kuhweera, kuti ha mu muvona haape muwoolye kusaanga kuti niwoolye kusumunuka mu kuvireera. ²⁹ Mutambulye Epaforoditasi cha Simwiine cho kusaanga. Mukuteke vaantu vaswana naaye. ³⁰ Mukuti avaalyi cho muteendo wa Kirisiti ku kuti ave hafwihi ne lufu. Ava tovohi vuhalo vwaakwe ku kunihaza ne kuchita chimusana muvawoolyi kuchinichitira.