¹ Paulo, muapositola wa Kirisiti Jeeso cho kusuna kwe Ireeza, ne Timoti mwetu, ² ku varumeri ne vamweetu veena itumero kwa Kirisiti veena mwa Kolosia. Muve ne mikoonde ne kuzuwana kuzwa kwe Ireeza Isheetu ne Simwiine Jeeso Kirisiti. ³ Tulyitumera kwe Ireeza, Tayo wa Simwiine Jeeso Kirisiti, mmi tukuraperera inaako zoonse. ⁴ Tuvazuwi zetumero yenu mwa Kirisiti Jeeso ne irato lyimwiina nalyo kuvoonse vazumina kwe Ireeza. ⁵ Mwiina ilyi irato cheevaka lyokuzumina kweenu ku sepiso imuviikirwa kwiiwulu. Muvazuwi cheyi isepiso imuviikirwa lyinzwi lyo vusakusima, le ivangeri, ⁶ lyiveeza kweenu. Iyi ivangeri ikweete iviika zihantu maane ikweete izwiira havusu munkaanda yoose. Kuvenavulyo ne kweenu kuzwa izuva lyimuva zuwi ne kwiiziva iinse ze Ireeza chovusakusima. ⁷ Ilyi nje ivangeri moona mumuvailyituti kwa Epafurasi, muhikana wetu yosunitwa, muhikana wiiina vusakusima wa Kirisiti mu chiziimo cheetu. ⁸ Epafarasi avachiti kuti twizive irato lyaako cho Luhuho. ⁹ Chevaka lyeri irato, kuzwa iizuva lyituvazuwi izozintu kana tuvazimiki ku muraperera. Tuvalyi ku kumbira kuti mwizuzirizwa cha maano ee izivvo yo kusuna kwaakwe mukwiiziva zoonse ne kuzuwiseza zoluhuho. ¹⁰ Tuvalyi kurapera kuti muyende cho vusakusima bwa Simwiine munzira zisangisa. Tuvalyi kurapera kuti muve ne zihaantu munzira imwi ne imwi ishiyeeme ne kuti muzwirekuvusu mukwiiziva Ireeza. ¹¹ Turapera kuti mukozwa muchimwi ne chimwi chamaano kuya che ziho zaakwe mukuwoodesa ne inkulonde. ¹² Turapera kuti muoolye kusangaahulu ne kulyitumera kwa Taayo, yava muchiti kuti muoolye kuva nechibalyi muvuswa vwa varumeri mwiiseri ¹³ Ava tusumununi muvusimwiine vwe ififi natu kuzikiza mu vusimwiine vo Mwanaakwe yo sunitwa. ¹⁴ Mu Mwanaakwe twiina kusumununwa chamalaha aakwe, ne kuwooderwa zivi. ¹⁵ Mwaana nje chiswano che Ireeza yaasa vonwa. Njo mwaana we ntanzi we zivumbantu zonse. ¹⁶ Mukuti zintu zoonse ziva vuumbwa chaakwe, izo ziina kwiiwulu ne ziina munkaanda, zivoneka ne ziintu zisavoneki. Nangati vasimwiine va vusa nandi vusimwiine nandi muvuso nandi vahitizi, zintu zoonse ziva vuumbwa naye ni ziiri zaakwe. ¹⁷ Wiina havusu lyeziintu zoonse, mmi chaakwe zintu zoonse ziwoondinzene. ¹⁸ Mmi njo muhitizi wo muviri, ikereke. Nje wa katanzi nalyi muntaazi kwavana vafwiire, lyinu njiwentaazi muzintu zoonse. ¹⁹ Mukuti Ireeza a vasaangi kuti kwizuzirizwa kwaakwe koonse kuve kwaalyi, ²⁰ ne kuvozekeza ziintu zoonse kwaalyi cho Mwaane. Ireeza ava lyeti kuzuminzana cha malaha aha chifapano chakwe. Ireeza ava shiyamisa ziintu zoonse kwaalyimwiine, naandi zintu zoonse ziina munkaanda kapa ziintu ziina kwiwulu. ²¹ Mmi unwe nanwe, imwi naako, muvalyi mumabukweenda kwe Ireeza hape nimulyi muzira zaakwe mukuzeza ne mumiteendo yenu mivilala. ²² Mmi hanu chava mishiyamisa cho muviri waakwe cho lufu. Ava chiti ichi kuti amivooza nimulyingeene, nimusena mulandu, nikusena kuzekiswa havusu vwaakwe. ²³ Chikuti nimuzwira havusu mukuzumina, nekuwondesa, ni musazwi munzira yo vusakusima ni mulyiindire ivangeri imu va zuwi. Iyi nje ivangeri iva lwiirwa muntu umwi ne umwi ya va vuunbwa mwikoonde lye iwulu. Iyi nje ivangeri ivachiti kuti Iime, Paulo, nive ni muhikaana. ²⁴ Hanu nisaanga mu kusukuluka kwaangu cheenu. Mmi ni lyi zuwa mu muviri waangu chitayere mu kusukululwa kwa Kirisiti cheevaka lyo muviri waakwe, ulyi ikereke. ²⁵ Ivaaka lyeyi ikereke kuti nive nimuhikana, kuya cho kutokomera kuzwa kwe Ireeza kuni vahewa cheenu, kwizuziriza lyinzwi lye Ireeza. ²⁶ Iichi nje ikunutu yo vusakusima iva wungwirwa zirimo ziingi ne kuya kumamanimani. Mmi hanu chiiva toondezwa kwa avo vazumina kwaalyi. ²⁷ Ivaalyi kuvalyi avo Ireeza va valyi kusaka kuti vezive vuhumi vokuteemba kweyi ikunutu yo vusakusima mu Vasazumini. Mukuti Kirisiti wiina mwenu, vusakusima vokuteembwa kwe inako ikeeza. ²⁸ Uzu njeye utu waamba chaakwe. Tu kalyimera umwi no umwi muuntu, mane tu ruta umwi no umwi muuntu chamaano oonse, kuti tu woolye kutwala muuntu umwi no umwi na manininee kwa Kirisiti. ²⁹ Chechi ni teenda ne kutundamena kuya cheziho zakwe ziteenda kwaangu chokulaulwa.