^{1 2} Tu va zuwi Iviho yiti kwiina vuvilaala vo kulyi laala mukati keenu, uvo mane vusa zumininwa mukati ka vantu va seena Ireeza. Iviho njo kuti umwi weenu u laala ne muka veesi. Mane mwiina maheha! A ka mu swaneerwa ku zunguvalyirwa? Uzo ava chiti vulyo u lukeere ku zwiiswa mukati keenu. ^{3 4 5} Mukuti,nangati kani hena mu muviri mi ni siinaho mu luhuho, chi na watula kalyi iyi ava chiti ichi,siina iri ku ni veena. Ha mu kungana mwi izina lye Ireeza weetu Jeeso,mane ne luhuho lwaangu lwiina hateni naalo mwi inunuho ya Simwiine weetu Jeeso, chi na watula kalye uzu muntu. Ni va chiti ichi kuhera uzu unkosi mu manza a saatani mu ku ihayiwa kwe inyama, kuti luhuho lwaakwe ne luvulukwa. ^{6 7 8} Kulyi nyemuna kweenu kaku shiyeme. A ka mwiizi kuti chiviriso chinini chi virisa vuroto vonse? Mu lyi shanza chiviriso cha kalye kuti mu woolye kuva ifulawa e viriswa inhya, kuti mu woolye kuva vuroto vu viriswa.Mukuti Kirisiti, emberere yeetu ye kulutwa, ava vambulwa. Lyinu katu lye itumerere mukiti,insini che chiviriso cha kalye,chiviriso che vuntu vuvi ne vuvilaala.Kwaandeuvulyo,ka tu itumere che vuroto vo kusakusima ne vuniti. ^{9 10} Ni va mu ngolyeere mwi ingolo lyaangu sanzi muvi ne vulyikani ne vantu vo vuvilaala vo kulyi laala.Ka kwiina che yimwi inzira muni taa vantu va vilaala ve inkaanda, nandi valya vovona, nandi vaziyeza, nandi varapeera veireeza vo kolyi chitira, mukuti ku va chunduluka mu lukeere kuzwa kunze lye inkaanda. ^{11 12 13} Mi hanu ni mu ngolyeera sanzi muvi ne vulyikani ne umwi no umwi yo sumpwa mweetu mi na halyira mu vuvilaala vo mulyilaalo, nandi yo sa kuva ne zintu zonse, nandi yo rapeera veireeza vo kulyi chitira, nandi munyandisi, nandi yolyi chidakwa, nandi muziyezi. Sanzi mulyi nandi chilyo ne muntu yo wiina vulyo. Mukuti ni lyivehene hayi ne ku watula avo veena kunze lye ikereke? Kwande uvulyo, a ka muveere ne ku watula avo veena mwi ikereke? Mi Ireeza u watula avo veena kunze. '' Mu zwiisa muntu mu vilaala mukati keenu.''