¹ Ngket tuo-tuo sidang epo Gayus yo knosang,yo knosang koe ku lang yo beta. ² Erai buntung ku yo knosang,aku bdoa,apa iko buen-buen ai slomai-slomai ka lang eka ise masam, sama kati kesong ko buen-buen ka. ³ Koe aku bol pengego,des tenu-tenu erai buntung ulet ai mie pngesah nau umbang bolum ko lang yo beta,koe memang iko bolum lang yo beta. ⁴ Nte oki belo keo pengego lengkat olai se kringo, se pea-pea ku bolum lang yo beta. ⁵ Erai buntung ku yo knosang,iko keo gawi kati ulun persaya,mbo mone iko nggawi eka ise masam nte erai buntung-erai buntung,betako dero ene ulun-ulun nyumba. ⁶ Dero sundok miye pngesah mbo onon jemaat nau umbang kosang ko.Buen beta gawi gata ko,ena iko ngawat dero lang ju lang dero,diang sara yo sengkono epo Allah. ⁷ Koe karan-Iyo dero sundok bju diang ndok belo nrima ise-ise ngket ulun-ulun yo belo tau se Allah. ⁸ Taka arus nrima ulun-ulun yo ketine,apa taka kate ngalek bagian lang gawi gata dero nte yo beta. ⁹ Aku sundok nulis idi-idi epo jemaat,tapi Diotrefes yo kakan jadi ulun pinokolay mbo ekang dero,belo kakan ngangkan se kain. ¹⁰ Koe ene,ena des aku ulet,aku anta tindu apa ikam tau beta gawi gata yo sundok nlaku koe iyo,koe io nampa surah kesah yo dat; ai belo pian puas diang ene, io se belo di suma belo kakan nrima erai buntung-erai buntung yo ulet,tapi io low ngusan ulun-ulun,yo kakan nrima dero ai nembaling ulun-ulun ene ngket jemaat. ¹¹ Erai buntung ku yo knosang,nang nyarak yo dat,tapi yo buen.Koe ise keo gawi buen,io ulet ngket Allah,tapi ise yo keo gawi dat,io belo pini kito Allah. ¹² Nau umbang Demetrius eka ulun miye pnyurah yo buen, yo kono se ube mie pnyurah ketine. Ai kain low mie pnyurah yo buen nau umbang io, ai iko tau,se pnyurah kain ene beta. ¹³ Deo nau umbang yo arus tulisku epo iko,tapi aku belo kakan nulis epo iko diang tenta ai pena. ¹⁴ Aku kundong resi-resi mangkoruku diang iko ai bekesah sangko wae. ¹⁵ Damai sejahtera sama-sama diang iko!Salam ngket teman-teman ko.Sampe ko salam ku epo tongku kongo teman-temanku.