¹ Ngket pengetuo epo Ine yo kono pili ai pea-peaiyo yo beta-beta tengkosangku. Mbadi aku tingen yo kosang se ikam, tapi eka ulun yo sundok tau yo beta, ² koe yo kono yo dor lang taka ai yo anta lumpat diang taka sampe turai-turai. ³ Kasih Karunia, rahmat ai damai sejahtera ngket Allah Bapa, ai ngket Yesus Kristus Pea Bapa, anta lumpat diang taka lang yo beta ai pengkosang. ⁴ Aku ego beta, koe aku krapet, se tenu-tenu ngket pea-pea ko bolum lang yo beta sengkono diang prenta yo sundok trima taka ngket Bapa. ⁵ Ai tmpo ndo aku tindu epo iko, Ine - belo di ungka-ungka aku nulis prenta yo bayu nte ngko, tapi ngaya prenta yo sundok keo mbo taka ngket tla - apa taka bako tengkosang. ⁶ Ai endo doko pengkosang ene, yoene se taka arus bolum ngaya prenta-Iyo. Ai endo doko prenta ene, yoene se ikam arus bolum mbo lang pengkosang, sama kati yo sundok dingo kam ngket tla. ⁷ Koe deo tukang ngwewong sundok nyoret ai malan epo mupus denia, yo belo di ngangkan, se Yesus Kristus sundok ulet jadi ulun. Ene doko tukang ngwewong ai antikristus. ⁸ Bejaga-jaga, apa nang mapos ngket ikam ise yo sundok tampa kain ene, tapi apa ikam kuli upa kam bol-bol. ⁹ Tongku ulun yo belo di makai tutuy batuk Kristus, tapi yo ngendikah baling ngket ene, belo di ngmpun Allah. Ise-ise ulun makai tutuy batuk ene, io ngmpun Bapa ai ngmpun Pea low. ¹⁰ Ena ka keo ulun ulet epo ikam ai io belo di moit tutuy batuk endo, aut ka ikam nerima io lang lou kam ai nang ka miye salam epoiyo. ¹¹ Koe ise-ise ulun miye salam epoiyo, io lumpat low lang gawi gataiyo yo triaw. ¹² Beta ko deo yo arus tulisku epo ikam, aku belo di kakan nggawiiyo diang buyang ai tentah, tapi aku se klawo ulet epo ikam ai besara sangko wae, apa sempurna pengego taka. ¹³ Salam epo ikam ngket pea-pea erai buntung kam yo kono pili.