2 ¹ Pagkatapos palihim na ipinadala ni Josue dalawang lalaking anak ni Nun mula sa Sittim bilang mga espiya. Sinabi niya, "Lumakad kayo at manmanan ang buong lupain, lalung-lalo na ang Jerico." Umalis sila at dumating sa bahay ng isang bayarang babae na nagngangalang Rahab, at nanatili sila doon. ² Sinabi ito sa hari ng Jerico, "Tingnan ninyo, dumating ang mga lalaki ng Israel para magmanman sa lupain." ³ Ang hari ng Jerico ay nagpasabi kay Rahab at sinabi, "Palabasin mo ang mga lalaking pumunta sa iyo na tumuloy sa iyong bahay, dahil naparito sila para magmanman sa buong lupain." ⁴ Ngunit pinapasok ng babae ang dalawang lalaki at itinago sila. At sinabi niya, "Oo, pumunta ang mga lalaki sa akin, pero hindi ko alam kung saan sila galing. ⁵ Umalis sila nang takipsilim, oras iyon para isara ang tarangkahan ng lungsod. Hindi ko alam kung saan sila pumunta. Marahil maaabutan ninyo sila kung magmamadali kayong sundan sila." ⁶ Pero dinala niya sila sa bubong at itinago sila gamit ang mga tangkay ng lino na kaniyang nilatag sa bubong. ⁷ Kaya sinundan sila ng mga lalaki sa daang papunta sa mga tawiran ng Jordan. At isinara ang mga tarangkahan pagkalabas ng mga humahabol. ⁸ Hindi pa nakakahiga ang mga lalaki para sa gabi, nang umakyat siya sa kanila sa bubong. ⁹ Sinabi niya, "Alam ko na ibinigay ni Yahweh sa inyo ang lupain at ang takot sa inyo ay dumating sa amin. Ang lahat ng naninirahan sa lupain ay manghihina sa inyong harapan. ¹⁰ Nabalitaan namin kung paano pinatuyo ni Yahweh ang tubig ng Dagat na Pula para sa inyo noong lumabas kayo sa Ehipto. At nabalitaan namin kung ano ang ginawa ninyo sa dalawang hari ng mga Amoreo sa kabilang dako ng Jordan—Sihon at Og—na winasak ninyong ganap. ¹¹ Nang marinig namin ito, natunaw ang aming mga puso at nawala ang aming lakas ng loob—sapagkat si Yahweh na inyong Diyos, siya ang Diyos sa langit at sa lupa. ¹² Kaya ngayon, pakiusap, mangako ka sa akin sa pamamagitan ni Yahweh katulad ng aking kabutihan sa inyo, pakitunguhan rin ninyo ng may kabutihan ang sambahayan ng aking ama. Bigyan ninyo ako ng isang tiyak na palatandaan ¹³ na ililigtas ninyo ang buhay ng aking ama, ina, mga kapatid na lalaki at babae, at ang kanilang buong pamilya, at ililigtas ninyo kami mula sa kamatayan." ¹⁴ Sinabi ng mga lalaki sa kaniya, "Buhay namin para sa inyong buhay, kahit hanggang kamatayan! Kung hindi mo sasabihin ang aming pakay, sa gayon, kapag ibinigay ni Yahweh ang lupaing ito magiging mahabagin kami at matapat sa iyo." ¹⁵ Kaya pinalabas niya sila pababa mula sa bintana gamit ang isang lubid. Ang bahay kung saan siya nakatira ay nakatayo sa loob ng pader ng lungsod. ¹⁶ Sinabi niya sa kanila, "Pumunta kayo sa mga burol at magtago kung hindi ang mga humahabol sa inyo ay makikita kayo. Magtago kayo doon ng tatlong araw hanggang makabalik ang mga humahabol sa inyo. Pagkatapos, lumakad na kayo sa inyong pupuntahan." ¹⁷ Sinabi ng mga lalaki sa kaniya, "Wala kaming pananagutan sa pangakong ipinagawa mo sa aming sumpaan, kung hindi mo gagawin ito: ¹⁸ Kapag dumating kami sa bayan, dapat itali mo itong pulang-pulang lubid sa bintana na siyang pinagbabaan mo sa amin, at magtitipon kayo sa bahay ng iyong ama at ina, iyong mga lalaking kapatid at ang buong sambahayan ng iyong ama. ¹⁹ Ang sinumang lalabas sa mga pintuan ng iyong bahay patungo sa lansangan, ang kanilang dugo ay nasa kanilang sariling mga ulo at wala kaming pananagutan. Ngunit kung may isang mananakit sa sinumang kasama mo, ang kaniyang dugo ay nasa aming mga ulo. ²⁰ Pero kung ipagsasabi mo itong aming pakay, kung gayon wala kaming pananagutan sa pangakong aming sinumpaan sa iyo." ²¹ Sumagot si Rahab, "Matupad nawa ang inyong sinabi." Pinaalis niya sila at sila'y umalis. Pagkatapos itinali niya ang pulang-pulang lubid sa bintana. ²² Umalis sila at umakyat sa mga burol at nanatili sila doon ng tatlong araw hanggang sa makabalik ang mga humahabol sa kanila. Naghanap lahat ng dako ang mga humahabol at walang natagpuan. ²³ Bumalik at tumawid ang dalawang lalaki at nagtungo kay Josue na anak ni Nun, at isinalaysay nila ang lahat ng bagay na nangyari sa kanila. ²⁴ At sinabi nila kay Josue, "Totoong ibinigay ni Yahweh sa atin ang lupaing ito. Kaya'y ang lahat ng mga naninirahan sa lupaing ito ay natatakot dahil sa atin.