5 ¹ Pakupera kwaizvi kudaitika phwando la madjudewu, ese Djeso adakwira ku Djerusalema. ² Ese ku Djerusalema pamusuwo wamabira pana thawale libodzi, kuti na tchiheberu linadaidziwa Betesaida, kuti lina mikana mitchanu iyakuvalika. ³ Menemo mukadalala mbumba ikulu na kukondziwa, mapofu, mancos, na wanyakuwoma tchidzo«, watchiemera kutekenyeka kwamadzi. ⁴ Thangwe ngirozi ibodzi ikatchitha nguwa inango ku thawale, ese ikabvundula madzi; futi wakutanga kui akatchitha mwenemo, pakubuda pakubvundurha kwa madzi, adawoma kwa utenda utchinge ukanaiye.» ⁵ Ese penepo pakana mwamuna mubodzi, kuti kukana magole makumi matatu na masere kuti alikukondziwa. ⁶ Djeso atchiwona kuna uyu adagona, na kudziwa, kuti kukana nguwa izinji kuti alipenepo alikukondziwa, adamuti: Ukulikuda kuwoma? ⁷ Adamudaira mutenda: Tchangamire, apalibe munhu unango kuitira kuti, payo madzi iyana bvundurha muthawale, ese pangu ine ndinauya, unango anatchitha kumasule kwaine. ⁸ Djeso adamuti: Muka, tola ntswimbo iyako, ese famba. ⁹ Futi tchilipo lipotcho mwamuna uneyo adamwoma; ese adatala ntswimbo iyatche, ese adafamba. Fui ntsiku ineyo ikali Mugobera. ¹⁰ Wadalanga nazvinezvi madjuda kuna weneule kuti akawomesiwa: Ndi Mugobera, azvilibe kukutendera utole ntswimbo. ¹¹ Adawadaira iye: Weneule kuti andilapa, uneyo anditi: Tola ntswimbo iyako, ese famba. ¹² Wadamubvundzisa nazvinezvi: Mbani mwamuna akuti: Tola ntswimbo iyako ese famba? ¹³ Ese kuti nyakulapiwa, akadziwalini kuti akali wani, thangwe Djeso nanga akadafundukira, thangwe pambuto ineyo pakana mbumba ikulu. ¹⁴ Pakupezesera Djeso adadzamusanganiza ali Mutembere, ese adauti: Wona kuti wadiwoma; ausa nyangazizve, kuitira kuti zvisadzakuitikirezve zvinhu zvinango zvakunyanya. ¹⁵ Mwamuna weneule adaenda kapalidzira madjuda kuti Djeso akali ndiye amuwomesa. ¹⁶ Ese nazvinezvi madjuda wadateera Djeso, thangwe iye akita zvinhu izvi na mugobera. ¹⁷ Ese Djeso adawadaira: Baba Wangu kuswikira tchintchino alikusendza, ese ine basi ndirikusendza. ¹⁸ Nazvinezvi madjuda wadasagazve kumuulaya Djeso, thangwe akasi kuphwanya mugobera woga, apo basi akalanga kuti Mulungu akali Baba watche tchaiye, atchizviita ndendende na Mulungu. ¹⁹ Djeso nazvinezvi adawadaira, ese adawati: Tchadi, tchadi ndikuku bvundzani, kuti azvingaiti Mwana aite tchinhu tchinango patchatche tchaiye, pane kuti awone zvenezvire kuti Baba alikuita; thangwe zvense zvinhu kuti iye anaita, ntwsibodzibodzizvo Mwana basi anazviitawo. ²⁰ Thangwe Baba ambada Mwana, ese zvense zvinhu kuti anaita anamupangiza, kuitira kuti imwe muchamisike. ²¹ Thangwe ninga Baba kuna wanyakufa adawamusa na kuwalalamisa, nadyali basi Mwana kuna walikuda anawalalamisa. ²² Thangwe basi Basi apalibe watche anatonga, apo wense utongi adapasa Mwana, ²³ Kuitira kuti wense wanamate kuna Mwana, ninga zvinatamata kuna Baba. Weneule kuti anamati kuna Mwana, na,ati kuna Baba kuti amutuma. ²⁴ Tchadi, tchadi ndikuku bvundzani, kuti weneule anabva masoko iyangu, ese anatenda kuna andituma, anaupenyu wakugala nakugala, ese adzauyi katongiwa, apo aiyambuka pakufa kwenda pakulalama. ²⁵ Tchadi, tchadi ndikubvundzani, kuti nguwa irikuuya, ese tchintchino ndiyo, pawo wanyakufa watchadzabva pfala la Mwana wa Mulungu, ese kuna wanadzalibva, wanadzalalama. ²⁶ Thangwe ninga Baba anaupenyu patchatche tchaiye, nadyali basi adapasa kuna Mwana kuti agale naupenyu patchatche tchaiye. ²⁷ Ese adamupasa ntsimba, kuti aite ndzeru, thangwe ndi Mwana wa Munhu. ²⁸ Amusatchamisike na izvi; thangwe nguwa irikuuiya, iyakuti wense wali munhutu watchadzabv pfala latche. ²⁹ Ese wadzabuda wenewale wadaita zvamuche, kuitira kuti wamusiwe paupenyu; ese wenewale wadaita zvakunyangala, wamusiwe kaiyatongwha. ³⁰ Azvikwnisiki ine tchaiye mubodzibodzi ndiite tchinhu tchinango. Ninga ndikubva, nadyali ndikutonga; ese kutonga kwangu nkwamuche; thangwe andiiti kudakwangu, apo kuda kwa Baba kuti andituma. ³¹ Ndingati ine ndidairire patchangu, kudairira kwangu ntsi kwa tchadiko. ³² Unango ndiye adadairira kuna ine, ese ndinadziwa kuti mudairiri, kuti anadairira kwaine, ndi watchadiko. ³³ Imwe mudatumira wanyamasoko kuna Juwau, ese iye adapasa kudairira kwa tchadi. ³⁴ Nazvinezvi ine anditambiri kudairira kwa munhu; apo ndinalanga izvi kuitira kuti muponesiwe. ³⁵ Iye akali tchiezera tchakugaka na kuetimira; ese imwe mudada panguwa idokodoko kufantsisa tchiezera tchanu. ³⁶ Apo ine ndina mudairira mukulu kupinda wa Juwau; thangwe mabasa kuti Baba andipasa kuti iyateezeke, mabasa mabodzibodziyo ndiyo kuti ine ndikuita, iyanadairira kwaine kuti Baba ndiye andituma. ³⁷ Ese Baba kuti andituma, iye mubodzibodzi adadairira kwaine. Tchipo mudabva pfala latche, kana kuwona tchimiro tchatche. ³⁸ Ese nakuleka kugala na masoko iyatche iyatchilambirira kuna imwe; thangwe kuna iye nyakutumiwa, kwauyu imwe amulibe kumutenda. ³⁹ Pfunzani zvilembhra; thangwe imwe mukufunga kuti kunaizvo kuna upenyu wakugala nakugala, ese izvo ndizvo kuti kwaine zvinadairira. ⁴⁰ Ese amudi kuuya kuna ine, kuitira kuti mugale naupenyu. ⁴¹ Anditambiri tchakubonerera tchamunhu. ⁴² Apo ine zvamuche ndina dziwa kuti amulibe tchido tcha Mulungu kuna imwe wabodzi bodzibodzi. ⁴³ Ine ndauya mudzina la Baba wangu; ese imwe amunditendi; angati unango atchiuya mudzina latche tchaiye, kuna uyu munamutenda. ⁴⁴ Ninga munakwanisa imwe kumutenda, mutchinge munatambira zvakubonerera unango na unango, ese amukwanisi kutola zvakubonerera kuti zvinauya Mulungu yega? ⁴⁵ Amusafungi kuti ine ndingada kupomherani kuna Baba; anakupomherani ndi Mozisi, wanu kuti mukuemera. ⁴⁶ Thangwe deka imwe mudatenda kuna Mozisi, kuna ine basi mungadatenda; thangwe kwaine iye adanemba. ⁴⁷ Apo mungati amutendi nazvilembha zvatche, ninga munatenda tani masoko iyangu?