¹ Kuntanzi Ireeza abawambi kubashemi betu chabapolofita, chenako ziingi ni munzila zishelene. ² Kono munzila zamazuba amanimani, abawambi kwetu cha Mwanakwe yabaketi, kuba swaana wazintu zonse. Ireeza hape ababumbi Inkanda chakwe. ³ Nji yobenyisa ikanya ye Ireeza, muchibumbantu chena muchili. Mane uwondise zintu zonse hamwina chalinzwi lyaziho zakwe. Heti chamana kujoloza zive, nekala hansi kwiyanza lyabulyo lya Nfumwetu wakwiwulu. ⁴ Ababi sina mukando kumañeloi, sina izina lyabayoli halishiyeme kuzamba mazina abo. ⁵ Chakuti Ireeza kanabachiwambi kumañeloi, ''U Mwanangu, sunu chinaba ni Iso''? '' Kanibe ni mushemi kwali, imi iye mwabe mwanangu''? ⁶ Hape, Ireeza haleta bana bentanzi munkanda, nati, ''Wonse mañelo a Ireeza atameha kumulapela.'' ⁷ Kuamana ni mañeloi nati, ''iye yo litendela luhuho lwamañeloi akwe, ni malimi amulilo abahikana bakwe.'' ⁸ Kono kuamana ni Mwanakwe abati, Chihuna chako, Ireeza, chakuya kusena mamanimani. Mubuso wako mubuso wakuluka. ⁹ Usaka kutenda zishiyeme, mi utoyete batenda zibilala. Hakwinabulyo Ireeza, Ireeza wako, yabakusiingi ioli yentabo kuhitiliza bamwenu.'' ¹⁰ ''Kuntanzi, Simwine, ubatendi matangilo enkanda. Iwulu, nje mitendo yamanza ako, ¹¹ Kazimane, kono iwe mozwile habusu. Bonse kabasukehe sina kabaali kejila. ¹² Kamuzibunge sina ngubo imi kazisanduke sina inkalulo yejila. Kono iwe uswana bulyo. imi zilimo zako kazimani.'' ¹³ Kono nji kwelihi kumañeloi Ireeza kwabawambi chenako ihi ne ihi, ''Wikale kwi yanza lyangu lyabulyo kusikila inako yete nitende zila zako chihuna chamatende ako''? ¹⁴ Kahena luhuho lonse lwamañeloi lutusa, mi lutumwa kubabalela kwabo beti nibayole impuluso?