¹ Jeeso a ve njira naa hita cha Jericho. ² Mmi, muvoone, ku vena onkosi ya vaalyi ku suumpwa Zakayiyo. A valye mukunganyi wo mutero mane na humine. ³ A valyi ku lyika ku vona kuti Jeeso njeeni, ka hena a valyi ku woola ku muvona mu chinavungi, mu kuti a vaalyi mufwiihi. ⁴ Chi ku ngombweera ha vusu vwa vaantu chi ku taanta iisamu lyo musikamuri kuti a mo voone, mu kuti Jeeso a va keeza ku ku hiita cheeyo inzira. ⁵ Jeeso chiinga siika heecho chiivaka, a va lolyi kwiiwulu na mu cho kuti, '' Zakayiyo, suuke kwi isamu cho vuhweeru, suunu ni lukeere kuti ni ke kaalye ku iinzovo ya ko. ⁶ A va hweeri, cho ku suuka kwi iisamu cho ku mutaambula cho ku saanga. ⁷ Mmi voonse chiinga va voone chii,ni vaa tongooka, ni vaati, ''Wa ya ku ku poteera unkoosi yo chiita vuvilala.'' ⁸ Zakayiyo na ziima na cho Simwiine kuti, ''Lolye, Simwiine, imwi imbalyi ye zivya zaangu mu ni iihe vahumanehi, cho kuti kwiina u niva ziyeeza mu ni voozekeza icho chilyikanyo koonne. ⁹ Jeeso na mu cho kuti, suunu kuhazwa kweeza mweeyinu iinzuvo, mu kuti naaye mwaana wa Abrahama. ¹⁰ mu kuti mwaana o muntu a ve iziire ku saaka ne ku haza vantu va zoveete. ¹¹ Chinga va zuwa izi ziintu, a va zwiiri ha vusu na waamba cho ku va lwiiira iingolyi, mu kuti a veena ha fwihi ne Jerusalema, ni va zeeza kuti muvuso we Ireeza cho wiina ha fwiihe ne ku sika. ¹² Naati, ''ku veena onkosi umwi ya va shiyeeme na yeenda mu mu siipiri ku inkaanda i keena kulye ku ku kalyi taambwira muvuso cho ku ka voola. ¹³ A va suumpi vahikaana vaakwe ve nna ikumi, na va ha i minas zina ikumi, na va cho kuti, 'mu ka chite muuzo mbwiita heeti ni ni ka voolyere.' ¹⁴ lyinu vantu ve inkanda yaakwe ka na vava musuni niva mu tuminina chitopa cha va vazimanini kwaalyi, ni vaati, 'ka tu suuni kuti u zu unkosi a tu hiitire.' ¹⁵ Cho ku chitahala kuti chiinga a ka voola, chiinga a ka hinda muvuso, cho ku laula kuti vahikaana vaakwe va va hi malyi kuti va suumpwa, kuti a izive kuti va vaa voolyerwa ku ka sika hayi mu muwulu u vaa vi ha teni. ¹⁶ Wa katanzi a veeza ha vusu vwaakwe, naati, Simwiine i mina ya ko i va weereki che ikumi. ' ¹⁷ Unkosi yo shiyeeme na mu cho kuti, 'Wa chita neenza, muhikaana yo shiiyeme. Che ivaaka lyo kuti u va vi ne vusakusima mu zintu zi nini, ko woolye kuhitira mizii mikaando iina ikume.' ¹⁸ Wo vu veeri neeza, naati, 'Simwiine, i minas ya ko e va weereki ku maana iyaanza. ¹⁹ Unkosi yo shiiyeme na mu cho kuti, 'Koohitire mizii mikando imana iyaanza.' ²⁰ O mwi neeza, naati, ''Simwiine, i minas ya ko inu, ini vaa viikite neenza mu ka jiira, ²¹ mu kuti ni va ku tiite, u mu kalyi. U hiinda chiintu cho u seena u va teenderi, ne ku siinza cho seena u va vyaalyi.' ²² Unkosi yo shiiyeme na mu cho kuti, 'Cho kuwamba kwaako mu ni ku atulye, u wee muhikaana muvilala. Wiizi kuti nu unkosi mukalyi, ku hinda chi ni sana ni va teenderi, ne ku choola chi ni sana ni va vyalyi. ²³ Lyinu chiinzi ho seena u va viiki i mina ya ngu ku chi viiko cha malyi, kuti chini siika ni ni va woolyi ku a hiinda ni a weerekete. ²⁴ Unkosi yo shiiyeme na cho va va ziimene he mbalyi naati, 'Mu hiinde i mina kwa lyi, mi yi he muhikaana yo wiina ikumi. ²⁵ Ni va mu cho kuti, 'Simwiine, wiina i mina ziina ikumi. ²⁶ 'Ni mu cho kuti, zumwi no zumwi yo wiina ka heewa ziingi, mmi ya seena, ne cheena naacho ka chi hiindwa. ²⁷ Mmi ava va sa ni suni, vana va sana vava suni kuti ni va hitire, mu va lyeete kunu ve hairwa ha vusu vwangu.''' ²⁸ Chiinga mana ku wamba izi zintu na zwiira ku vusu, na kaya kwa Jerusalema. ²⁹ Lyinu chiinga siika hafwiihi ne Bathphage ne Beteniya, ku iruundu lyi suumpwa Olivet, a va tumi varutwaana vaakwe voo veere, ³⁰ naati, ''Mu kwiiya ha muzi wiina ha vusu. Chi mu njiira, mu mu waane kadonki ka seeni ku tantwa. mu ka sumunune mu ka lyeete kwa ngu. ³¹ Cho kuti kwiina yeeti a mu vuuza, 'Chiinzi ha mu ka sumununa?' mu cho kuti, 'Simwiine u ka saaka.''' ³² Va va tuminwa va va yeende cho ku waana kadonki siina Jeeso mwa va va lwiiri. ³³ Chi va kweete va sumununa kadonki, veene va ko niva va cho kuti, ''Chiinzi ha mu sumununa kadonki?'' ³⁴ Ni vaati, ''Simwiine o ka saka.'' ³⁵ Ni va ka lyeeta kwa Jeeso, chi ku viika majansi avo ha kadonki chi ku tantika Jeeso he wuulu. ³⁶ Cho ya vuyenda, chi ku zala majansi aavo mu inziira. ³⁷ Cho kaya vu chuuta ha fwiihi ne irundu lya Olive ha lyi suukira, vuungi vwa va rutwaana cho ku lyi tumera cho ku temba Ireeza ni va huwiira kwii wulu cho misevezi yoonse mikulu i va va voni, ni vaati, ³⁸ ''Wiina mikoonde iiye simwiine yo wiiza mu iziina lye Ireeza! Ikozo ive kwi iwulu ne ku vereenga ku nyemonwa!'' ³⁹ Vamwi va Mafarasai mu chiina vungi ni va mu cho kuti, ''Muruti, kalyimeere va rutwana va a ko.'' ⁴⁰ Jeeso ne itaava naati, ''Ni mu lwiira, kalyi izi zitontweere, mavwe ka a huwereza kwi wuulu.'' ⁴¹ Jeeso chinga chutira muzi, na u lyirira, ⁴² naati, ''Kalyi mu ve iziivi mwe lyinu izuuva, nangati uunwe, zintu zi mu lyeetera ikoozo! lyinu hanu zi wungwiirwa mu meenso e nu. ⁴³ Mazuva ka e ze o kuti va sa musuni ni va mu zumbuluke, cho ku lyaatiriza mu imbalyi zoonse. ⁴⁴ Ka va mu lyaatiriza haansi ha mwiina ne vaana veenu. Keeti ni va siiye nangati ivwe lyiina he wuulu lye lyimwi, ko kuti ke heena mu va lyemuhi Ireeza cho lyiika ku mu haaza.'' ⁴⁵ Jeeso ne njiira mu isinagoge cho ku taanga ku hindikara hanze va va lyi ku wuuza, ⁴⁶ naa va cho kuti, ''Ku ngolyetwa kuti, 'Inzuuvo yangu ka ive inzuuvo ye tapero,' mmi mu va iichiti mazanino a vasa.'' ⁴⁷ Jeeso a va lyi ku kutaza izuva ne izuva mu isinagoge. Muperisita mukando ne masikiraibi ne va hiitizi va vantu va va lyi ku saka ku mwihaaya, ⁴⁸ mmi ka na va va wani inzira yo ku chiita vulyo, che ivaaka lyeekuti vantu voose va va muteekete nnenza.