¹ Mwe iyeyina inaako, vaamwi vaantu va veena hateni vaava mulwiiri cha Magalalia vasi malaha aa va kopanya Pilato ne zitavero zaavo. ² Jeeso a va veetavi naati, "A muzeeza kuti aava Magalalia va veena zivi ku zaamba Magalilia voonse mukuti vavaa sukuluki cheyi inzira? ³ Naanta, ni milwiira. Mi chikuti ka mulyinyansikiza zivi zeenu, muvoonse ka muzove che inzira iiswana. ⁴ Kapa vana vantu veena ikumi ne ku maana iyaanza ne mwinwee yoo tatwe veena mwa Saloma va va wiirwa itawa mi ni va fwa voonse, aa va veena zivi zizamba za vantu va Jerusalema? ⁵ Naanta, nicho kuti. Mi chokuti ka mu vakiri zivi zenu, mu voonse ka mufwe.'' ⁶ Jeeso a va waambi iyi iingulyi, "Wumwi muuntu a va vyalite isamu lye ifeegi mu iiwa lyaakwe, mi neeza ku ku saka zihaantu kulyiri mi kakwiina cha va waani. ⁷ Mukwaame naacho yo tokomera iwa naati, 'Voone, mu zirimo zotatwe ni zaanga kukusaka zihaantu mweelyi iisamu mi ka kwiina chini va wani. Lyiteme. Chiinzi ho lyisiya ni lyisinya inkaanda?' ⁸ Mutokomeri weewa netava naati, 'Lyisiye vuulyo chinu chirimo ni lyise mu mabalyi ne ku viika musutero. ⁹ Chikuti ni lyiha chirimo chikeeza, kushiyeeme; mi chikuti ni lyisahi, u lyiteme!''' ¹⁰ Aha Jeeso a valyi kuruta mu iimi isinagogi lwe Insavata. ¹¹ Muvoone, ha veena mukulwakazi ya veena zirimo ziina ikumi ne minwe i maana iyaanza ne yo tatwe, a veena luhuho luvi lo kusuntika, mi a va buteeme na sa oolyi ku zima na woolokete. ¹² Mmi Jeeso chingaa muvona, namu suumpa naati, ''Mukulwakazi, chi wa sumunuka mu ku suuntika kwaako.'' ¹³ Na muviika maanza aakwe, ahaahwaaho na wooloka na teemba Ireeza. ¹⁴ Mi muhitizi we sinagogi a va veengi mukuti Jeeso ava hooza lwee Insavata. Mi muhitizi a ve taavi chiinavungi naati, "Kwiina mazuva a mana iyaanza ne kamwiina a lukeere kuti ku teendwa. Mwiize lyinu ze muhozwa, kuunzee izuuva lye Insavata." ¹⁵ Simwiine a va mwiitavi naati, ''Valyizinantizi! A umwi kweenu ka woolyi ku sumununa indonki kana ingombe yaakwe hayi sumininwa cho ku itwaala ku ku nywa meenzi lwe Insavata? ¹⁶ Linu uzu naaye mwaana Aborahama wo mukazaana, ya va sumiinwa ne Sataani zirimo ziingi ziina ikumi ne kumana iyaanza ne minwe yo taatwe, a kusuminwa kwaakwe ka ku lukere ku sumununwa lwe Insavata?'' ¹⁷ A vaati cho waamba izi ziintu, voonse va valyi kumukanana va va fwi insoni, mi ikuunga lyoonse lyiva lyitumereri zintu zoonse zikulu za va chiti. ¹⁸ Lyinu Jeeso naati, "Muvuso wee Ireeza u swaana ne chii, mane ni woola ku vuswanisa ne chiinzi? ¹⁹ Ku swaana ne intaanga ye masitadi ya va hiindi mukwaame cho ku isohera mwiiwa lyaakwe, mi nilyaa kula ku va iisamu ikaando, ne zizuni zo mwi iwuulu ni za zaaka zizuumbu zazo mu mitaavi yalyo." ²⁰ Hape naati, ''Ni woola kuswanisa muvuso wee Ireeza che chiinzi? ²¹ Ku swana ne mukulwakazi ya va hiinda chiviriso cho ku chikopanya ne zirikanyo zoo tatwe ze ifulawa chi ku manina chi za kopakopana ne ifulawa.'' ²² Jeeso a va poteri mizi mikaando ne mizi mi niini chiwiina muunzira na kaya kwa Jerusalema mi na varuta. ²³ Umwi na mucho kuti, "Simwiine, a vaantu vache vulyo va keeza ku kuhazwa?'' Mi na vacho kuti, ²⁴ Mulyiike kwiinjira cho mulyaango munini, mukuti, ni milwiira kuti, vuungi ka vasake kwiinjira, mi keeti ni va woolye kwiinjira. ²⁵ Hakuti sinzuvo che njira cho ku kiya mulyaango, lyinu u ziima hanze cho ku kavakava ha chiyazo cho kuti, 'Simwiine, Simwiine, tuzuminine kwiinjira.' Ka mwitaave kuti, 'Kani miizi mane kaniizi ne kumukazwa.' ²⁶ Lyinu ka mucho kuti, 'Tu vali ku lya ne kunywa ha vusu vwaako maane u valyi kuruta mu nzira zeetu.' ²⁷ Mi ke taave, 'Ni mi cho kuti, Ka ni izi ku mu kazwa. Muzwe kwaangu, Uunwe mu chita vuvilala!' ²⁸ Ka va ve kulyiira ne ku kweenga meeno ha mu voona Aborahame, Isaka, ne Jaakovo, ne voonse vaporofita mu muvuso wee Ireeza, mi uunwe ka musoherwa haanze. ²⁹ Kava zwe ku vuzweezuva, vwiimino, vuruwa ne vulyiizi, ni veekeere he tafulye mu mu vuuso we Ireeza. ³⁰ Mwiizive ichi, avo valolyerwa haansi ka vave ventaanzi, mmi vana va lolyerwa kwi iwuulu ka vave va mamanimani." ³¹ Cho vufwiihi, vamwi va Mafarasai vaveza kwaalyi ni vaati, ''Yeende uzwe aaha, mukuti Heroda usaka ku kwiihaya,'' ³² Jeeso naati, "Muyende muka lwiire uuzo usiimbwe, 'Muvoone, iime ni zwiisa madimona maane ni hooza suunu ne izoona, maane iizuva lyo vuutatu ka nive kusikite ha chikonkwaani chaangu.' ³³ Naagati kwiina vuulyo, kuniswaneere kuti ni zwiire havusu suunu, izoona mane ne izuuva likeeza, Mukuti ka kuzumininwa kwi haya muporofita haanze lya Jerusalema. ³⁴ Jerusalema, Jerusalema, uwee wihaaya va porofita ne ku goovoola va tumwa kwaako. Koolye ni nisaka ku kungaanya vaana vaako sina inkuku i vutamine tu kukwaana mu mavava ayo, mi kana muva suni ichi chiintu. ³⁵ Muvoone, inzuuvo yeenu chee itoongo. Ni mu lyiira, keeti ni mu nivoone mbwiita chiina ni mwaacho kuti, 'Ku teembwa yo keeza mwiizina lya Simwiine."'