¹ Uku nikutatika kwa mbila iweme ya Yeso Kilisitu, Mwana wa Mulungu. ² Namwamene mchenze cilembekela na Yesaya muwilizi, "Lolesha, nutuma muwilizi pacinso cako, umo wamene akuwamyile njila. ³ Lizu la umo oita cokuwa mucilambo, 'Kupanga njila ya Wata; kumupangila njila yo yondoloka."' ⁴ Yohane eciza, nobatiza mumalambo mowinzyazya ubatizo woyalusha wanthu nowalekelela ku miluvyo yao. ⁵ Calo conse ca Yudeya na wanthu amu Yelusalemi emukonkha yeve. Nakuti onse ebatiziwa mu cimana ca Yolodano, nolapa miluvyo yao. ⁶ Yohane evwala mukupo wa usako wa ngamila na lamba ya mukupo mululunda, nipo enzokulya zombe na uci wamusanga. ⁷ Yeve ewilikizya eciti, " Umo okuza pavulu pangu ali na vizo vinyinji kupula neo, nipo nthambo zya nsapato zyake paliye angazimangusule. ⁸ Nikubatizani na manzi, koma yeve akakubatizeni na muzimu utuwa." ⁹ Vicitika muli ao masiku kuti Yeso eciza kufuma ku Nazareti mu Galileya, nakuti ebatiziwa na Yohane mucimana ca Yolodani. ¹⁰ Yeso penzovuuka mu manzi, eona mikumbi ivulika namuzimu mutuwa wisikila yeve nga ni nkhunda. ¹¹ Nipo lizu limvwika kufumila kumulu, "Niwe Mwana wangu otemwewa. Nine otemweshewa nawe." ¹² Cokonkhapo muzimu wimutwala mu cipululu. ¹³ Enkhala mu malambo masiku makumi wane, kuyezyewa na satana. Enzenkhala na vinyama vamusanga, na amalaika emupuzumusha. ¹⁴ Pavuli pake Yohane emangiwa nsinga, Yeso eciza ku Galileya nowilizya mbila iweme ya Mulungu, ¹⁵ nipo ewauzya, " Nsita yakwanishika, nipo ufumu wa Mulungu wafwindikila. Yalulani mitima yanu nocetekela mu mbila iweme." ¹⁶ Penzolamba mu mbali mwacimana ca Galileya, eona Simoni na Andeleya munansi wa Simoni enzopoza kombe mu cimana, pakuwa wenze acipaya ca ma sawi. ¹⁷ Yeso eciti kuli weve, " Izani, nikonkheni neo, nipo muwe okasha wa wanthu." ¹⁸ Natetyo lomba lomba eleka makombe nomukonka yeve. ¹⁹ Yeso penzokuya panthanzi patontho, eona Yakobe mwana wa Zebedayo na Yohane mkwao; enze mu wato kuwamya akombe. ²⁰ Ewaita nowasiya ausuwao Zebedayo mu wato na anyanchito, nipo emukonkha. ²¹ Pavuli pake, eciza ku Kapenao, nipo zuwa la sabata, Yeso eciyo sambizya mu sunagoge. ²² Ezizwa namasambizyo wake, pakuti masambizyo wake enzopala a munthu wa ucindami osati nga ni alembi. ²³ Pamene pala mwanalume enze na ciwanda ca lunsa elila mu sunagoge yao, ²⁴ eciti, " Ticite nawe tyani, Yeso waku Nazareti? Mwazoticeneka? Numuzibani kuti nimwe wani. Nimwe mutuwa ngako wa Mulungu. ²⁵ Yeso evikana viwanda nonena kuti, "Myalala nipo fumamo muli yeve!" ²⁶ Nipo ciwanda calunsa cimupoza pansi nofumamo akalulila mu lizu lapamulu ngako. ²⁷ Nipo wanthu onse ezizwa, nokonshana umo na muyake, "Nicinji ici? Masambizyo alomba na vizo?Ouzya viwanda valunsa nomumvwila!" ²⁸ Nipo mbila yake imvwika paliponse mucitwa conse ca Galileya. ²⁹ Nipo pavuli pofumamo mu sunagoge, weciza mu nanda ya Simoni, Andeleya, pamo na Yakobe na Yohane. ³⁰ Lomba anyavyala wake wa Simoni elwala nthenda ya mphepo mu muwili, nipo euzya Yeso zya yeve. ³¹ Tetyo eciza, emukata kumanja nomuimya; mphepo yamubili ipola, nipo eyamba kubasewenzesha. ³² Cingulo cala, zuwa pailowa, emuletela onse enzelwele nawenze okutililiwa kano wa viwanda. ³³ Yonse walale yekumana pamo pamulyango. ³⁴ Epozya wanyinji wenze wolwala nthenda zyosiyana siyana noutusha viwanda vinyinji, koma aliyovilole viwanda kuti vilawile pakuti vimuziwa. ³⁵ Ecelela, kukali mudima; eciya kumalo a cete nipo kwamene kwala esenga. ³⁶ Simoni na wala wenze nawo enzomusakila. ³⁷ Emufwana nipo eciti kwa yeve, " Aliyense osakila mweo." ³⁸ Eciti,"Tiyeni kumbi, kufuma nolowa mu ma walale yozengulila, kuti nikawilizye mbila iweme nako. Nicikomo cake naza kuno." ³⁹ Eciya mu Galileya yonse, kuwilizya mu masunagoge mwao nofumya viwanda. ⁴⁰ Wamambombo eciza kwake. Enzomupapatila; egwada pansi nomuuzya, " Kano upangwa, unganisuke." ⁴¹ Efwendela na mutima wopangwishisha, Yeso emufwika notola kwanja kwake nomukata, emuuzya, " Nupangwa.Iwa waunyino." ⁴² Pamene apo mambombo efuma, etuvyiwa. ⁴³ Yeso mosanyengelela emucinkhula nomuutushapo. ⁴⁴ Emuuzya, "Simikizya kuti su uzya aliyense, koma nkhoya, kazioneshe kwa wansembe, nipo akufunile unyino Mose wecilamula, kuwa cisimikizyo kuli weve." ⁴⁵ eciya kunja noyamba wilizya momangusula lizu liweme, motetyo kuti yeso asalowemo soti mu chalo cila noonekela namomangusuka nipobewilizya kuza kwake kufuma konse.