¹ Paulo, wanchito wa Mulungu na mtumiki wa Yesu Kristu ku cikhulupililo ca osankhiwa a Mulungu na cizibisho cacendi covomelejyana na umulungu, ² na ciyembekezo ca moyo wamuyaya welonjeza Mulungu, aliye wenye, Kalekale. ³ Panthawi yoyenela evumbulusha mau bake mwa ulaliki wenetumiwa kulingana na ulamulilo wa Mulungu mpulumusi wasu. ⁴ Kwa Tito, mwana wa cendi mucikhulupililo. Cisomo na mtendele kufumila kwa Mulungu Atata na Kristu Yesu Mpulumusi wasu. ⁵ Ni kamba ka ici kuti nekusiya ku Krete, kuti uike vinthu mumalo mwake nakuti uzoze azikulu mumuzinda ulionse mwenekuujyila. ⁶ Mkulu wa mpingo ankhale aliye cilema, mulume wa mwanakazi umozi, nabana okhulupilila osati bana bali na mbili iyipa kapena amwano. ⁷ Nikofunikila kuti oyang'anila monga msogololi wa ng'anda ya Mulungu, ankhale aliye cilema. Asankhale osaweluzika, osakalipa mumangu, osati cakolwa, osati munthu wa cigolo. ⁸ Koma ankhale wa wanzi nakuti abe munthu okonda cabwino. Abe munthu oganiza bwino, olungama, mutuba, ndipo ozilesha. ⁹ Ofunika kukatish uthenga weciphunzisiwa, kuti akwanishe kulimbikisha ayake na ciphunziso cabwino, nakulongosola bala omususha. ¹⁰ Ndaba pali banthu anyinji oukila, olabila va zii ndipo onamijyana, makmaka bala amdulidwe. ¹¹ Nikoyenela kubalesha. Okalipisha ma banja yonse pophunzisa kamba ka phindu yomvwisha soni pa vinthu vosafunika kuphunzisa. ¹² Uomozi wa aneneli bao wanena kuti, "Akrete nibawenye, vilombo viyipa, aulesi na cigolo." ¹³ Aya mau ni ya cendi. Mwa ici, ubalongosole mwamphamvu, kuti mwina bangacite bwino mucikhulupililo, ¹⁴ osaikako nzelu ku vikhulupililo vawenye va Ayuda olo kulamuliliwa na banthu othaba coonadi. ¹⁵ Kwa bala atuba, vinthu vonse ni vituba, koma kwa bala ocenekeka na aliye cikhulupililo, paliye cinthu cituba, maganzo yao na cikumbumtima cao nivoonongeka. ¹⁶ Ovumela kuti Mulungu omuziba, koma omukana muzicitidwe zao. pakuti onyanyisa, amwano ndipo niosayenela kucita nchito iliyonse yabwino.