¹ Okhulupilila ayangu, muziba za malamulo. Muziba bwino kuti banthu ofunikila kumvwila malumulo pekapeka bakali na moyo. ² Mwa cisanzo, linina lufunika kukhulupilika kwa mwanalume wake malinga niwa moyo. Koma ngati mwanalume wafwa sofunikila kunkhala monga akali okwatiliwa. Lamulo yumumasula kucikwati. ³ Ngati oluta ku lidoda liyake pemene mwanalume wake niwamoyo, onkhala wa cigololo. Koma ngati mwanalume wake wafwa onkhala lini omvwila lamulo ila. Lomba ngati wakwatiwa soti ku lidoda liyakine, sazankhala wa cigololo. ⁴ Ni cimozi-mozi, anekwasu, pemwecifwa na Kristu pamtanda, lamulo la Mulungu yuku lamulila lini soti. Mwenze omasuka kulumikijyana na Kristu, kuti mukalemekeze Mulungu. mungacite ici ndaba nimwe amoyo soti. Mulungu wakulumikijyani na Kristu, ndipo wausha Kristu kubakufwa. ⁵ Petenzocita venzokutiujya maganizo yayipa, niyepetenzo phunzila ngako lamulo, niyepetenzo funa soti kucimwa. Tenzocita vinthu viyipa venzoononga ubwenzi wetenzofunikila kunkhala nao na Mulungu, ndipo yenzoti patula kutifumwa kwa Mulungu kosasila. ⁶ Koma lomba Mulungu watimasula ku lamulo ya Mose-cili monga kuti tafwa, ndipo lamulo lingatiujye lini soti vocita. Mulungu wacita ici kwa seo kuti timupembeze munjila ya nyowani yakutionesha Mzimu, Kusiyana na njila yakale yonzofuna lamulo. ⁷ Pakuti banthu ofuna kucimwa ngako bakaziba malamulo ya Mulungu, niyekuti malamulo ayo niyayipa? Yayi, Lamulo niliyipa lini! Koma nicacendi kuti nenzoziba lini kuti cimo nicinji mpakana penephunzila mu lamulo. Mwa cisanzo, Nenzoziba lini kuti nicimo kukhumbwila cinthu cisali cako mpakana peneziba kuti lamulo likuti, "Osakhumbwila cisali cako." ⁸ Ndipo kamba ka vuyulabila lamulo, cikhalidwe cangu caucimo cofuna vinthu vabene necizosintha munjila zinyinji. koma paliye lamulo, paliye cimo. ⁹ Kale, nikaliye ziba lamulo ya Mulungu vuyufuna, nenzocimwa kopanda kuda nkhawa pavenenzocita, koma peneziba kuti Mulungu watipasa lamulo lake, nezindikila kuti nenzo cimwa, ¹⁰ Ndipo nezindikila kuti nacoka kwa Mulungu. Lamulo yenzo funika kunilola kunkhala moyo wosasila,ngati nayimvwila, yenzo nipelekejya kukufwa. ¹¹ Penenzofuna kucimwa, Nenzoganiza kuti ninkhale moyo kosasila ngati numvwila ngako lamulo. Koma nenzozinamijya: Nenzoganiza kuti ningocimwa pa nthawi imozi-mozi. Koma, Mulungu akuyonipatula kufuma kwayeve kosasila ndaba niliye mwvile zoona lamulo. ¹² Teto tuziba kuti lamulo yepasa Mose Mulungu niyolungama ndipo niyabwino. Cili conse cakulamula Mulungu kuti ticite ciliye vuto, nicolungama ndipo nica bwino. ¹³ Lomba tinga labile kuti lamulo yecipasa Mose Mulungu, ya bwino, yeticosa kwa Mulungu? Yayi iliye cite teto! Lamulo, ya bwino. yeni lengesha kufuna kucimwa. Neziba kuti nenze kutali na Mulungu, Koma peneziba ngako zenzofuna Mulungu kuti nicite, niye penenzo ziba ngako kuti nenze muucimo. ¹⁴ Tuziba kuti lamulo lefuma kwa Mulungu ndipo yutisintha zicitidwe, Koma nine munthu nina cikhalidwe cuyezemila ku cimo. Cili monga kuti nekakamijyiwika muujya wa cimo- nenzo cita vilivonse vacanijya cifuno kuti nicite. ¹⁵ Vinthu vunucita, Kanyinji numvwisha lini. Nthawi zinyinji nivinthu va bwino vunufunika kucita vinisacita. Ndipo nthawi ziyakine nivinthu vunuzonda vunucita. ¹⁶ Pakuti nucita viyipa vunusafuna kucita, nuvumela kuti lamulo la Mulungu lunitwala munjila yabwino. ¹⁷ Teto nukambalini kuti nufuna kucimwa kuti nucimwa. Nucimwa ndaba cifuno caucimo cufuna kuti nicimwe. ¹⁸ Nuziba kuti nikafuna kusatila cikhalidwe cangu nicitepolini cabwino. Nuziba ici ndaba nufuna kucita cabwino, koma nucita lini cabwino. ¹⁹ Nucitalini vinthu vabwino vunufuna kucita. nivinthu viyipa vunusafuna kucita vunucita. ²⁰ Punucita vinthu viyipa vunusafuna kucita, sikuti nufuna kuvicita. Nicikhalidwe cangu cukonda cimo, niye cunilengesha kucita ucimo. ²¹ Nupeza, kuti, ngati nufunakucita cabwino, kuli cifuno ciyipa cili mukati mwangu cunilesha neo kuti nicite cabwino. ²² Mucikhalidwe canyowani nine okondwa na lamulo la Mulungu. ²³ Nuzindikila kuti muli mphamvu iyakine muthupi yangu, yushushana na vuyofuna maganizo yangu kucita. ²⁴ Nikaganizila pa ici, nuona kuti nine munthu ovulazika. Nufuna anganimasule ku ulamulilo wa zofuna thupi langu kuti nisacoke kwa Mulungu. ²⁵ Nuyamika Mulungu kuti ni mwa Yesu Kristu Ambuye wasu kuti animasule kuzofuna za thupi langu. Lomba namaganizo yangu, nufuna kumvwila lamulo ya Mulungu. Koma soti, kanyinji nulekelela zofuna ziyipa kunilamulila ndaba ya cikhalidwe cangu cakale caucimo.