¹ Abrahamu niye kholo lasu seo Ayuda. Ganizani citinga phunzilepo pavecitika pali Abrahamu. ² Ngati cenze kamba ka nchito zabwino za Abrahamu kuti Mulungu emuika olungama mwayeve, Abrahamu sembe enze na cifukwa cozitukumulila ku banthu, (koma, ngankhale teto, sembe enzeve cifukwa cozitukumulila kwa Mulungu). ³ Kumbukilani kuti nicolembeka mumalemba kuti Abrahamu ekhulupilila vemulonjeza Mulungu, kamba ka ici, Mulungu eona Abrahamu kunkhala olungama mwayeve. ⁴ Lomba ngati tulandila malipilo pa nchito yutucita, ayo malipilo yotolewa lini ngati ni mpaso. Koma, yali ngati talandila malipilo. Cimozi-mozi, ngati tingacite cinthu cingaleshe Mulumgu kuticitila vabwino, niye kuti ubwino wake ungankale lini mphaso. ⁵ Koma cacendi ni ici, Mulungu opanga banthu ulunga mwa yeve ao enzo mulemekeza lini poyamba. koma, lomba okhulupilila mwa yeve, ndipo Mulungu obatola kunkhala olungama mwa yeve. ⁶ Cimozi-mozi, monga mwelembela Davide muma Salimo pa muthu wakutola Mulungu kuti niolungama mwa yeve papanda kucilandila: ⁷ "Amwai ni ao macimo yao ya khululukiliwa,macimo yao olangapo lini. ⁸ Amwai ni ao mbili yamacimo yao ya fafaniziwa" ⁹ Kunkhala na mwai koteti kucitikila lini Ayuda beka. Yayi, koma na Amitundu. tuziba ici ndaba nicolembeka mu malemba kuti Abrahamu ekhulupilila Mulungu ndipo Mulungu emuyesa olungama mwa yeve. ¹⁰ Ganizani Mulungu pecita teti kwa Abrahamu. Ecita ici Abrahamu akilye cita mdulidwe,osati pavula pake. ¹¹ Mulungu elamula kuti Abrahamu aduliwe zaka zinyinji kusogolo atamulandila kale. Mdulidwe wenze cizindikilo kuti Abrahamu enze kale olungama mwa Mulungu. Tuphunzila pano kuti Mulungu emuona Abrahamu kunkhala kholo la aliyense oknulupilila mwa yeve, nabala akaliye duliwa. Munjila iyi Mulungu oona banthu onse aba ngati olungama mwa yeve. ¹² Mulungu eona Abrahamu kunkhala kholo lasu tonse Ayuda bacendi, niyekuti- Ayuda onse balina cizindikilo ca mdulidwe pama thupi yao , koma- cikulene ngako- ao onkhala monga kholo lasu Abrahamu akaliye cite mdulidwe, penzokhulupilila mwa Mulungu. ¹³ Mulungu elonjeza Abrahamu na bana bake kuti baka landile ziko lapansi. Koma pelonjeza teto, cenze lini ndaba Abrahamu enzomvwila lamulo lililonse. Koma ndaba Abrahamu ekhulupilila kuti Mulungu akakwanilishe lonjezo. Ndipo Mulungu emuona Abrahamu kunkhala olungama mwa yeve. ¹⁴ Ngati banthu bakuyolandila ziko lapansi kamba komvwila lamulo, niyekuti kuliye nchito kukhulupilila Mulungu mu vinthu vilivonse, ndipo lonjezo yake iliye kanthu. ¹⁵ Kumbukilani kuti cacendi ni ici, Mulungu olabila teti mu lamulo lake kuit akuyo peleka cilango kwa aliyense osamvwila lamulo. Soti kumbukilani, kuti banthu baliye lamulo, nicosatheka kuicitila mwano. ¹⁶ Nikamba kuti tukhulupilila Mulungu kuti tikalandile vinthu velonjeza ngati mphaso, ndaba niwa bwino. Opasa aliyense wakuziba kuti cacendi ni mwana wa Abrahamu- seo okhulupilila Ayuda,tili na lamulo la Mulungu ndipo tumukhulupilila, ndipo na Amitundu aliye malamulo koma omukhulupilila monga mwenzelili Abrahamu. Ndaba Mulungu etola Abrahamu kunkhala kholo lacendi laseo tonse okhulupilila. ¹⁷ Ici niye celabila Mulungu mumalemba; "Nikakuike kunkhala kholo la mayiko yanyinji," Abrahamu ecilandila ici kucokela kwa yeve, ousha banthu akufwa kumoyo ndipo oumba vinthu kucokela paliye kanthu. ¹⁸ Ekhulupilila mokwana mu lonjezo la Mulungu, nanga kuti enzeve cisimikijyo caku thupi ndaba yeve na mkazi wake benze nkhalamba kuti banga bale bana. Mulungu elonjeza Abrahamu kuti akankhale kholo la mayiko anyinji ndipo eciti, "Bana bako bakabe ngati nyenyezi mumulengalenga. ¹⁹ Aliye mukaikile kuti Mulungu angacitelini velonjeza, ngankhale kutu enzoziba kuti thupilake silingabale mwana (Ndaba enze, na zaka zokwanila ngati handiledi), ndipo enzoziba kuti Sarah sangamite vumo. ²⁰ Aliye mukaikile Mulungu kuti angacitelini velonjeza. Emukhulupilila Mulungu mokwana ndipo emuyamikila Mulungu pavati akacite. ²¹ Ndipo enzesimikijya kuti Mulungu akacite vilivonse velonjeza. ²² Niye cifukwa cake Mulungu emuyesa Abrahamu kuti niolungama mwa yeve. ²³ Mau mumalemba, "Mulungu emuyesa olungama mwa yeve ndaba ekhulupilila yeve," niya Abrahamu tyala lini. ²⁴ Elembeka na kwa seo, Mulungu bayesa olungama mwa yeve ndaba tukhulupilila mwa yeve, wamene eusha soti Ambuye Yesu pecifwa. ²⁵ Mulungu elola banthu kuti amupaye kamba ka zocita zasu ziyipa. Ndipo Mulungu emusha soti Yesu ndaba Mulungu enzofuna kuti tinkhale olungama mwa yeve.