¹ Ndipo mngelo wa faifi elizya lupenga. Ndipo neona nyenyezi kufumira kululu yamene yeponera pa ziko. Ndipo nyenyezi yepasiwa mfungulo yaku chimulindi chiliye polekezyera. ² Evula pamulyango wa chimulindi chiliye polekezyela, na chusi chefumira ku vimulilo vinyinji. Zuba na mphepo vesanduka vifipa na chusi chenzofuma pa mulyango. ³ Kufumira mu chusi zombe lewela pa ziko, ndipo lepasiwa mphamvu monga ya vinkhanila vapaziko. ⁴ Leuzyiwa kuti lisaononge uzu pa ziko kapena vemera vibisi olo chimutu, koma banthu tyala baliye chizindikilo cha Mulungu pamphumi pao. ⁵ Liliyepasiwe ulamuliro wopanya bala banthu koma kubasausha tyala kwa myezi faifi. ⁶ Kusaushiwa kwao kukabe monga kwa munthu kwalumiwa na chinkhanila. Mumasiku ao banthu bakafune imfwa, koma ikabathabe ⁷ Zombe leoneka monga ni mahosi okonzekera nkhondo. Pa mitu yao penze viyakine monga kolona wa golide, na vinso vao venze vinso vabanthu. ⁸ Venze na sisi monga sisi ya mzimai, na meno yao monga meno yankhalamu. ⁹ Benze na vikumba vapachifuba monga va chosulo, na mau ya mapiko bao yenze monga mau yama gareta na hosi outukila kunkhondo. ¹⁰ Enze na michila ya volumila monga nkhanila; Michila yao yenze na mphamvu yocheneka banthu mu miyezi faifi. ¹¹ Venze naye ngati mfumu pa beve mngelo wa chimulindi chiliye polekezyela. Zina lake mu chihebeli ni Abadon, na muchi Giriki ni Apoliyoni. ¹² Soka loyamba lapita, onani! Vikapita ivi kuli soti masoka abili akuza. ¹³ Mngelo wa sikisi elizya lipenga lake, ndipo nechimvwa lizu lufumila ku nsengo za ku guwa la golide lamene pali Mulungu. ¹⁴ Lelabila ku mngelo wa sikisi wamene enze na lipenga, "bamasule angelo bameneenze emangiwa ku msinje ukulu wa Firate." ¹⁵ Angelo bala folo amene enzekonzekela ola lila, siku lila, mwezi ula, na caka cila emasuliwa kuti akapaye limozi la magawo atatu ba banthu. ¹⁶ Chiwelengelo cha asilikali apa pahosi 200,000,000. Nechimvwa chiwelengelo cao. ¹⁷ Umu ni mwamene neonela ma hosi mu masomphenya bangu na bamene bekwelapo: Vapachifuwa vao venze visweta, vobilibila ngako na vachikasu. Mitu yama hosi yenzolingana na mitu ya nkhalamu, na mkamwa mwao mwenzofuma mulilo, chusi na sulufule. ¹⁸ Limozi la magao atatu la banthu bepayiwa na miliri itatu iyi, muliro, chusi na sulufule vefuma mkamwa mwao. ¹⁹ Pakuti mphamvu ya mahosi yenze mkamwa na mumichila-pakuti michila yao yenze monga ni njoka, yenze na mitu yamene venzochitila banthu vilonda. ²⁰ Banthu bonse besalako bala baliyepayiwe na miliri, aliyelapile zinchito zao za manja koma soti aliyeleke kupembeza vibanda na mafano ya golide, siliva, mkuwa, mwala na vimiti-Vinthu vamene vulanga lini, kumvwa olo kuyenda. ²¹ Baliyelapile soti za kupaya kwao, sasenga bao, chigololo cao na machitilo bao boiba.