¹ Ngati pali kubindishana mwa Kristu, ngati pali kulimbikisha mwa Kristu, ngati pali kukatijyana mwa mumzimu, ngati pali cifundo nana cisoni, ² teto pangani cimwemwe cangu kuzula ponkhala na nzeru imozi, kunkhala na cikondi cimozi, kunkhala ogwirzana mumzimu, nakunkhala na colinga cimozi. ³ musacite kanthu kufuma mu kuzikonda olo ulemelero uliye kanthu. M'malo mwake kuzicepesa aliyense ayese muyake opambana eve. ⁴ Lekani aliyense asalange pa vofuna vake tla koma na vofuna vayake soti. ⁵ Nkhalani nazo nzeru izi muli mweo zimene zenzesoti mwa Kristu Yesu, ⁷ nibani, ngakhale elingana na Mulungu, oziyesa lini kulingana Mulungu monga cinthu cokatilililako. ⁶ M'malo mwake, ezikhutula eka mwa kutola maonekedwe ba wanchito, ndipo eve ebadwa mukulinganijyiwa na muthu. ⁸ Ezicepesa eka nonkhala wakumvwa mpaka kufwa, ngakhale imfwa ya pamtanda! ⁹ Moteto Mulungu soti emkweza eve. Emupasa zina eve yupambana mazina yonse. ¹⁰ Ecita ici kuti nkhokola iliyonse yufunika kumgwadira, nkhokola za bala ali kululu na pa calo, na pansi pa calo. ¹¹ Ecita ici kuti lilime iliyonse yufunika kuvola kuti Yesu Kristu ni Ambuye, ku ulemelero wa Mulungu Atata. ¹² Teto, okondewa bangu, pa kumvwa nthawi zonse, osati tyala panilipo neo koma lomba ngako ngako paliye neo, sebenzelani cipulusho canu na wowa na kunjenjemela. ¹³ Poti ni Mulungu amene osebenza muli mweo monse kufuna na kusebenza kamba ka kufuna kwabwino kwake. ¹⁴ Citani vinthu vonse mosadandaula olo kukangana ¹⁵ teto kuti munkhakle osalakwa na acendi, bana ba Mulungu aliye cirema pakati pa mibadwo yokhota na yosalongoka, mwamene mweo muyaka monga nyale mziko ya pansi. ¹⁶ Katishani ku mau a moyo kuti pa siku Kristu nikazikweze kuti nilye utuke pa tyala olo ku kata nchito pa tyala. ¹⁷ Koma angakhale nuthiliwa monga nsembe monga copelekewa nsembe na kutumikira kwa cikhilupiliro canu, n'ne okondwa, na kukondwela namwe monse. ¹⁸ Cimozi -mozi na mweo soti mufunika kukondwa na kundwela na neo. ¹⁹ Koma nuyembekeza mwa Ambuye Yesu ku tumijya Timoteyo kwa mweo lombapano, kuti na neo nilimbikishiwe ngati naziba vinthu pali mweo. ²⁰ Poti niliye muyakine soti olingana na eve, amene okhuziwa na mweo. ²¹ Poti onse osakila za vofuna zao, osati vinthu va Yesu Christu' ²² Koma muziba kuyenela kwake, cifukwamonga mwana na awisi, teto etumikila na neo mu uthenga wa bwino. ²³ Teto nuyembekeza kumtumijya lombapano nikaona vinthu mwati viniyendele. ²⁴ Koma nina cikhulupiliro mwa Ambuye kuti neo nikawele soti lombapano. ²⁵ Koma nuganiza kuti nkofunikira kutumijya Epafrodito kuwelera kwa mweo, eve ni mnekwasu ndipo niwanchito muyangu ndipo msilikari muyangu, niye otumiwa mwa mweo na wanchito wa zofuna zangu. ²⁶ Poti evutika ngako, na kufunishisha kunkhala na mweo monse, cifukwa mwecimvwa kuti eve ni olwala. ²⁷ Poti zoona enze olwala ngako kuti enkhala patontho kufwa. Koma Mulungu ecimvwa cifundo na eve, ndipo osati pa eve eka yai, koma soti na neo, kuti nisankhale nacisoni cikuleni. ²⁸ Teto mofunishisha numtumijya eve, kuti ngati mwamuona soti eve mukakondwele, ndipo nikankhale na cisoni citontho. ²⁹ Mulandileni Epafrodito mwa Ambuye na cikondwelero. Citirani ulemu banthu monga eve. ³⁰ Poti eve yenze nchito ya Kristu kuti eve ewela pafupi kufwa, ethwala moyo wake kuti akwanilishe camene ccamungacite lini mukutumiwa kwangu.