¹ Paulo, kaidi wa Kristu Yesu, na munekwao Timoti, kwa Filimoni, muyasu wokondewa ndipo wa nchito muyasu, ² na kwa Apiya mulongosi wasu, na kwa Arkipo msilikali muyasu, naku mpingo ukumana mung'anda mwako. ³ Lekani cisomo cibe pa weo na mtendele ocokela kwa Mulungu Atata na Ambuye Yesu Kristu. ⁴ Nthawi zonse nuyamika Mulungu punutomola weo mumapemphelo yangu, ⁵ ndaba nukumvwa za cikhulupililo cauli naco mwa Ambuye Yesu na cikondi cauli naco pa banthu bake atuba. ⁶ Nupemphela kuti kugabana kwako cikhulupililo kube kwa phindu. kuti ube omvwishisha mu vinthu vonse vitili navo mwa Kristu. ⁷ Ndaba nili na cimwemwe ngako na citonthozo kamba ka cikondi cako cifukwa mitima ya banthu atuba a Mulungu ya sisimushiwa na weo, mkwasu. ⁸ Mwa ici, olo kuti nili nako kulimba mwa Kristu kukulamulila kucita vuufunika kuti ucite, ⁹ koma kamba ka cikondi, nukupempha- Neo, Paulo, lidoda likulene, ndipo lomba kaidi wa Kristu Yesu. ¹⁰ Nukupempha pa mwana wangu Onesimo, wanavyalila mu ndende. ¹¹ Pakuti kale enze watyalatyala kwa weo koma lomba niwaphindu kwa weo na neo. ¹² Namuwejya soti kwa weo, yeve ali mutima wangu wenewene. ¹³ Sembe nakonda kumusunga kuti akonitumikila mumalo mwako panikali mu ndende kamba ka uthenga wabwino. ¹⁴ Koma niliyefune kucita ciliconse cosaziba weo. Niliyefune nchito yako yabwino kuti ifumile pa kukakamijyiwa koma mwaufulu. ¹⁵ Mwina kamba ka ici epatuliwa kwa weo kwa ka nthawi kuti ukankhale naye mpaka kosasila. ¹⁶ Sakankhala soti kapolo, koma woposa kapolo, munekwasu okondewa. makamaka kwa neo, ngakongako na kwa weo, konsekonse ku thupi na mwa Ambuye. ¹⁷ Lomba ngati neo nine wanchito muyako, mulandile mulandilila neo. ¹⁸ Ngati ekulakwila kapena ekongola ciliconse niujye neo nikalipile. ¹⁹ Neo, Paulo, nalemba teti na kwanja yangu. Neo neka nikalipile- osati nilabile kuti nawe weo niwe nkhongole weo weka kwangu! ²⁰ Inde, munekwasu, leka niphunduleko mwa Ambuye; sisimusha mtima wangu mwa Kristu. ²¹ Molimba kamba kumvwila kuulinako, nukulembela. Nuziba kuti ucite kupambana na pempho langu. ²² Pa nthawi imozimozi, unikonzele cipinda colalamo alwendo, ndaba ninaciyembekezo kuti mwamapemhelo yanu, nipasiwe soti kwa mweo. ²³ Epafra, kaidi muyangu mwa Kristu Yesu, ati moni. ²⁴ Naye Maliko, Aristarko, Dema, Luka, banchito ayangu opeleka moni. ²⁵ Cisomo ca Ambuye Yesu Kristu cibe na mzimu wako. Ame.