¹ Yuda, mtumuki wa Yesu Kristu na mkwao wa Jemusi, kwa bala oitiwa, mwa Mulungu Atata, nakusungiwira Yesu Kristu. ² Cifundo na mtendele na cikondi vipake mwa mweo. ³ Okondewa, pocita cangu conse kulembela kwa mweo za cipulumuso seo tonse nekulembelani kuti nikulimbikisheni. Kuti mukosope za cikhulpililo cepasiwa kwa mweo kamozi tyala kwa banthu atuba ba Mulungu. ⁴ Pakuti banthu bayakine baloba mwa cinsinsi pakati panu. Aba banthu belembewa mazina bao kuti bakasushiwe. Ni banthu osapembeza bamene basintha cisomo ca Mlulungu wasu kunkhala cilako-lako conyansa, nokana Ambuye m'mozi yeka Yesu Kristu. ⁵ Lomba nufuna kukumbushani- olo kuti kale mwenzoziba ici -kuti Ambuye epulumusha banthu kubacosa mu calo ca Aigupto, kuti pasolgolo pake ecizoononga bala baliye khululpilire. ⁶ Soti, angelo baliye sunge malo yoa ya ulamulilo, koma besiya malo yao yabwino yonkhalamo- Mululngu wabasunga mu unyolo wosasila, mu mdima wene-wene, mpaka ciweluzo pa siku likulu. ⁷ Lomba soti, Sodomu na Gomola na mizinda yenze nayo bezitwala beka ku za dama na macitilo acilwendo yaciwelewele osati mwa cilengedwe. Bankhala ngati cisanzo kwa bala bepisiwa cilango cosasila. ⁸ Koma munjila yamene iyo, bala olotalota bazionongela mathupi yao beka. Okana ulamulilo, nocitila mwano bala ba ulemelelo. ⁹ Koma olo Mikayeli mungelo mkulu, penzo sushana na mdelekezi za thupi ya Mose, aliye mupe ciweruzo ca mwano, koma eingokuti, "Ambuye akuzuzule." ¹⁰ Koma aba banthu ocitila mwano cili conse casamvwishisha; na vakumvwishisha mucibadidwe, monga nyama zakuti zuganiza lini, ivi niye vinthu vubaononga. ¹¹ Soka kwa beve! Pakuti bayenda munjila ya Kaini nakuponela mu citayiko ca Balamu pofuna phindu. Baonongeka mu kupanduka kwa Kora. ¹² Aba banthu niba ngozi yoyofya pa madyelelo yanu, okulya namwe ciliye soni, Abusa okulya tyala beka. Ni mikumbi iliye mvula yoyanyamuliwa na mphepo; vimiti va mumalanga, viliye vipaso-nivakufwa kale, nakunyuliwa. ¹³ Ni mafunde ciwawa pa nyanja, ozimvisha soni beka; nyenyezi zosankhazikika, zamene mfinzi ya bii yasungikila zeve kosalekejya. ¹⁴ Enoki, wa namba seveni kucoka pali Adamu, enenela za beve, kuti, ''Onani! Ambuye akuza na oyela bake sauzande na sauzande. ¹⁵ Okuza kuzocita ciweluzo pali aliyense. Akuza kuzosusha osapembeza onse pa zincito zonse za becita mu njila ya cisapembezo, na mau yonse yoipa yaocimwa osapembeza yelabila pali eve.'' ¹⁶ Aba niye ongu'nguzila, odandaula, okonkha vilako-lako vao voipa. Niozitukumula, na kufuna phindu, potama bayakine. ¹⁷ Koma mweo, okondewa, kumbukilani mau yelabiliwa kuvuli na atumwi ba Ambuye Yesu Kristu. ¹⁸ Eciti kwa mweo, ''Mu masiku osilijya kukabe otojya bati akakonkhe vilako-lako vao va osapembenza.'' ¹⁹ Aba niye bamene boleta kupatukana; niba mu calo nipo baliye Muzimu. ²⁰ Koma mweo, okondewa, muzimangilile mweo mweka mu cikhulupililo canu cituba, nakupephela mu Muzimu Utuba. ²¹ Muzisunge mweo mu cikondi ca Mulungu, na kulindila cifundo ca Ambuye Yesu Kristu cukuletelani moyo wosasila. ²² Nkhalani na cifundo kwa bala okaika. ²³ Pulumusani bayakine pakubasomphola ku mulilo. Kwa bayakine bacitileni cifundo na mantha. Muzonde na vovwala voifyiwa na thupi. ²⁴ Lomba kwa wamene okwanisha kukusungani kuti musakhumudwe na kuti muimilile pamenso pa ulemelelo wake uliye cilema na kukondwela kukulu, ²⁵ kwa Mulungu m'mozi eka Mupulumusi wasu kupyolela mwa Yesu Kristu Ambuye basu, ulemelelo, ukulu, ulamulilo, na mphavu, zikaliyoyamba nthawi, lomba, na nthawi zonse. Amen.