¹ Kale kale Mulungu elabila na makolo ya makolo basu kupitila mwa aneneli nthawi zinyinji na munjila zinyinji. ² Koma mu masiku yano yosilijya, walabila nase kupitila mu mwana, wesankha kuti abe oloba wa vinthu vonse. Nikupitila soti mwa yeve kuti Mulungu epanga ziko lonse. ³ Niye nyale ya ulemelelo wa Mulungu, cizindikilo cene cene ca kubako kwake. Ndipo oika vinthu vonse pamozi na liu la mphamvu yake. Pavuli posuka macimo, ,enkhala ku kwanja la kwendi la Ukulu wa kululu. ⁴ Wangonkhala wapalulu ngako kuposa angelo monga mwa zina leloba luposa zina lawo. ⁵ Ndaba ni kwa mungelo otyani Mulungu kwelabila kuti, "Niwe mwana wangu, lelo nankhala uso?" olo ni kwa mungelo otyani Mulungu kwelabila kuti, "Ninkhale wisi wake, ndipo naye ankhale mwana wangu?" ⁶ Koma soti Mulungu akaleta mwana wake oyamba, yeve akuti, "Angelo onse a Mulungu ofunika kumupembeza." ⁷ Za angelo akuti, "Niyeve opanga angelo bake mizimu, na atumiki bake vimbilimbili va moto." ⁸ Koma ku mwana akuti, "Mpando wako, Mulungu, niwamuyaya. Ndodo ya ufumu wako ni ndodo ya cilungamo. ⁹ Wakonda cilungamo nozonda cisalungamo. Mwa ici Mulungu, Mulungu wako, wakuzoza na mafuta yacimwemwe kuposa ayako." ¹⁰ "Poyamba, Ambuye, mweika maziko ya ziko lapansi. Kululu ni nchito ya manja yanu. ¹¹ Vikacenekeke, koma mweo mukapitilijye. Vonse vikajujuke monga malaya. ¹² Mukovipeteka monga coyambata, ndipo vikasinthiwe monga malaya. Koma mweo muli cimozi mozi, na zaka zanu zusila lini." ¹³ Koma niku mungelo otyani Mulungu kwelabila kuti, "Nkhala pa kwanja yangu ya kwendi mpaka nipange adani bako cokandapo mendo bako?" ¹⁴ Ko angelo onse nimizimu lini yotumikila, notumiwa kusamilila bala oloba mucipulumuso?