¹ Simoni Petulo, Kapolo na mtumiki wa Yesu Krist, kwa bala elandila cipulumuso cimozi-mozi ca mtengo wa patali mwatalandilila nase, cikhulupililo mucilungamo ca Mulungu wasu na Mpulumusi Yesu Kristu. ² Cisomo na mtendele vionjezelewe mu muyeso, mkuziba Mulngu na Yesu Kristu Ambuye wasu. ³ Vinthu vonse volinga pa moyo na umulungu vapasiwa kwa seo kupitila mkuziba Mulungu, etiyita mwa ulemelelo nakupambana kwake. ⁴ Kupitila mwa ziz, etipa lonjezo likulu, la mtengo wa patali, kuti mube ogabana naye mucilengeledwe ca umulungu, pavuli pothaba cionongeko mcalo cupangika na vokhumbwila viyipa. ⁵ Kamba ka ici, citani ubwino wanu kuti muonjeze cikhulupililo canu, ndipo kuubwino onjezankoni cizibisho, ⁶ ku cizibisho onjezankoni kuzilesha, kukuzilesha onjezankoni kupilila, kukupilila onjezankoni umulungu, ⁷ ku umulunug onjezankoni unekwao, na kuunekwao onjezankoni cikondi. ⁸ Ngati ivi vinthu vili mwa mweo nakuti vukula mwa mweo, simuzankhala vyumba nosabala vipaso mucizibisho ca Ambuye wasu Yesu Kristu. ⁹ Koma aliyense osobeka ivi vinthu niyekuti olangalini ndipo ni mphofu, kuluwa kuti esukiwa ku macimo yake yakale. ¹⁰ Mwa ici, anekwasu, citani bwino kuti maitanidwe na masinkhidwe yanu asimikijyike, pakuti mukacita ivi vinthu, simuzakhumudwa, ¹¹ Munjila iyi mukalemele mukupasiwa mwai woloba mu ufumu wamuyaya wa Ambuye na Mpulumusi wasu Yesu Kristu. ¹² Mwa ici nthawi zonse ninkhale okonzeka kukukumbushani za ivi vinthu, olo kuti muviziba, olo kuti nimweolimba mu coonadi cemweziba. ¹³ Naganiza kuti nicabwino kwa neo malinga nikali mu msasa uyu, kukusisimushani munjila yokukumbushani. ¹⁴ Pakuti nuziba kuti kusiyana nao uyu msasa kuli pafupi, ndaba Ambuye Yesu Kristu eniululila ici cinthu. ¹⁵ Nionesheshe kuti neo nikacoka pavuli pake mukokumbukila ivi vinthu. ¹⁶ Pakuti niliye konkhe miyambi yatyalatyala petekuzibishani mphamvu nakuza kwa Ambuye Yesu Kristu, koma tenze mboni zoona na meso ukulu wake. ¹⁷ Ndaba elandila ulemu na ulemelelo kufumila kwa Mulungu Atata pelemvwika lizu kwayeve mwa ulemelelo wa mphamvu, lakuti, "Uyu ni mwana wangu okondewa, mwa yeve nukondwela." ¹⁸ Seo seka telimvwa ili lizu fufumila kululu petenze pa lupili lituba. ¹⁹ Pakuti tili na mau auneneli onkhazikika kuti mukaike nzelu kubamvwa mungacitebwino ndaba yali monga ni nyale yusanika mumalo ya mdima mpaka kuche na nyenyezi ya mumawa iyake mumitima yanu. ²⁰ Koma pa zonse muzindikile kuti kuliye uneneli ufumila kucimasulo ca munthu. ²¹ Ndaba kuliye uneneli wewela kufumila mucifuno ca munthu, koma banthu onena zokokela kwa Mulungu pebekhuziwa na Mzimu Utuba.