¹ Paulo, Otumukila wa Yesu Kristu monga mwa malamulo ya Mulungu mupulumusi wasu na Yesu Kristu ciyembekezo casu. ² Kwa Timoti, mwana wa zoona mucikhulupililo: Chisomo,chifundo na mtendele ofumula kwa Mulungu Atata na Yesu Kristu Ambuye wasu. ³ Monga mwene kuujyilani kucita penenzekuya ku Masidoniya, Nkhalani kwa Aifenso kuti mulamulile banthu ayake kusaphunzisa ciphunziso ciyakine. ⁴ Asamvwile nkhani na mibadwe iliye polekejyela. Izi zuleta mukangano osati kumangilijya pamozi kwa nchito ya Mulungu, ucitika mwa cikhulupililo. ⁵ Lomba colinga ca lamulo ni cikondi cofumula mumtima uweme, kufuma mu malingalilo yabwino, na kufuma mucikhulupililo conkhazikika. ⁶ Banthu bayake betayika muvinthu ivi nakucungulukila kuvolabila viyipa. ⁷ Ofuna kuba ophunzisa lamulo, koma, akumvwa lini vakulabila olo vakusimikijya. ⁸ Koma tuziba kuti lamulo niyabwino ngati munthu oigwilishila nchito mwa lamulo lake. ⁹ Tuziba ici, kuti lamulo liliye ikiwile munthu wa cilungamo, Koma olakwa na Opandukila, osaziba Mulungu na munthu ocimwa, nabala asali atuba nabala osaweluzika, nabala opaya aziwisi bao na amanyina bao, na vigabenga, ¹⁰ Nabala banthu baciwelewele, nabala olalana analume beka-beka, nabala okata banthu nakubaika ngati bajya, nabala awenye, nabala onkhalila umboni wa wenye, na vili vonse vushushana na zophunzisa ziweme, ¹¹ Ulamulilo uyu ufumila mu uthenga wolemekezeka wa Mulungu odala wenipasa. ¹² Nuyamika Kristu Yesu Ambuye wasu. Enilimbisha neo, pakuniika okhulupilila, nakuni zoza pa nchito. ¹³ Nenze onyozela neo, omanga ndipo nenze lidoda la ciwawa. Koma nelandila cifundo kamba kakuti nenzo cita ivi muumbuli mukusa khulupilila. ¹⁴ Ndipo Chisomo ca Mulungu ca Ambuye wasu cesefukila mwa cikhulupililo na cikondi cili mwa Kristu Yesu. ¹⁵ Uthenga uyu niokhulupilika novomelekejyeka kuulandila mulimonse, kuti Kristu Yesu ewela pa ziko lapansi kuzopulumusha ocimwa, nine othelatu pa onse. ¹⁶ Koma kamba ka ici nepasiwa cifundo, kuti mwa neo, poyamba,Kristu aoneshele kudekha mtima kwake. Ecita ici kuba cisanzo kwa bala bati bakakhulupilile mwa yeve kumoyo osasila. ¹⁷ Lomba kwa mfumu ya muyaya, Yosasila, Yosaoneka, Mulungu yeka kube ulemu na ulemelelo osasila ku nthawi zonse. Ame. ¹⁸ Nuika iyi lamulo kwa weo, Timoti, Mwana wangu, molingana na uneneli wenenewa zokhuza weo kuvuli uku, Kuti ufunika kucita ndeo yabwino. ¹⁹ Kukata cikhulupililo na malingalilo yaweme, Pokana ici, bayake betaya cikhulupililo cao, ²⁰ Monga Hymeneya na Alexanda, nabatwala kwa satana kuti baphunzisiwe kusanyozela.