¹ Pakuti mweo mweka muziba, anekwasu, kuti kuwela kwasu kwa mweo kwenze lini kwa tyala-tyala. ² Muziba kuti tevutika poyamba nakuvwishiwa nsoni ku Filipi. Tenkhala olimbika mwa Mulungu wasu kulabila kwa mweo uthega wabwino wa Mulungu movutikila ngako. ³ Pakuti kulimbikisa kwasu kwenze lini kolakwika, olo kofifya, olo kwa cinyengo. ⁴ Mumalo mwake, mwamene Mulungu wativomelejyela kudalilika na uthenga wabwino, teto tulabila, osati kuti tikondweleshe banthu, koma Mulungu. Niye wamene oziba mitima yasu. ⁵ Pakuti tiliyewele na mau osyasyalika, monga muziba, olo kuti tioneka monga tubisa chigolo- Mulungu niye mboni yasu. ⁶ Olo kufuna ulemelelo ku banthu, kwamweo olo kwa bayakine. Sembe tefuna zotiyenela monga otumiwa ba Kristu. ⁷ Mumalo mwake, tenze odekha pakati panu monga mama ofukatila bana bake. ⁸ Munjila iyi tenze na cikondi na mweo. Tenze okondwela kugabana namwe osati uthenga wa Mulungu weka koma na miyoyo yasu. Pakuti mwecizonkhala okondewa kwa seo. ⁹ Pakuti mukumbukila, anekwasu, kutumikila na kuvutika kwasu. Usiku na muzuba tenzosebenza kuti tisalemeshe aliyense wamweo polalikila uthenga wa Mulungu. ¹⁰ Nimwe mboni, na Mulungu naye, mwetenkhalila atuba, olungama nabaliye banga mucikhalidwe casu kwa mweo mukhulupilila. ¹¹ Munjila yamene iyi muziba mwetenzeli na aliyense, monga tate na bana bake, ¹² kukucishani na kukulimbikishani kuti muyende munjila yoyenela Mulungu, okuitani mu ufumu wake na ulemelelo. ¹³ Pacifukwa ici tuyamika Mulungu kosalekejya, kuti pemwelandila uthenga wa Mulungu wemwecivwa kuli seo, mweulandila osati monga mau a munthu, koma mwamene mwaulili mucoona, mau a Mulungu, amene ogwila ncito mwa mweo mwekhulupilila. ^{14 15 16} Mweo, anekwasu, mwecizonkhala otola cisanzo ku machalichi a Mulungu yali ku Yudeya mwa Kristu Yesu. Pakuti namwe mwevutishiwa cimozi-mozi kuli banthu ba mutundu wanu, mwecitila Ayuda epaya Ambuye Yesu na aneneli, notipilikisha. Okondweleshya lini Mulungu. Mumalo mwake, ozondana na banthu onse. Etileshya kulabila na a Mitundu kuti apulumuke. Cokonkhapo nicakuti ozujya macimo yao kufwika pa muyeso. Koma mukwiyo ukabapeze posilijyila. ¹⁷ Koma seo, anekwasu, tenzepatuliwa kwa mweo kwa ka nthawi katontho, mu mubili osati mu mutima. Tenze okonzekela, nolaka-laka kuona nkhope zanu. ¹⁸ Pakuti tenzofunishisha kuwela kwa mweo- inde neo, Paulo, kamozi na kacibili- koma satana etilesha. ¹⁹ Pakuti ciyembekezo casu ni cinji, olo cimwemwe, olo mphoto yakuzitukumula pamenso ya Ambuye Yesu pakuwela kwake? Simweo nanga? ²⁰ Pakuti nimwe ulemelelo na cimwemwe casu.