¹ Petulo, mtumwi wa Yesu Kristu, kwa alendo bebalalika, esankhiwa, ku Ponto, Galatiya, Kapadokiya, Asiya, na Bitiniya. ² Monga mwa kuzibilatu kwa Mulungu Atata, mwa ncito yaciyeleso ca Muzimu, mwa kuvwila na ku wajya ngazi ya Yesu Kristu. Cisomo cinkhale na mweo, na mutendele wanu upake. ³ Lekani Mulungu na Atata ba Ambuye Yesu Kristu atamandike! Mucifundo cake cikulu, atipasa seo kubadwa kwalomba mukunkhala kwaciyembekezo kupitila mukuuka kwa Yesu Kristu kwa akufa. ⁴ Ici nicoloba cosasila, sicinga thimbilile, ndipo sicinga sukuluke. Okusungilani kululu. ⁵ Nimwe otetezewa na mphavu ya Mulungu kupitila mu cikhulupililo ca cipulumuso cokonzeka kuoneshewa munthawi yothela. ⁶ Nimwe okondwa paici, olo kuti nicofunikila lomba kuti mweo mungavwe kusakondwa mumayeselo anyinji osiyana-siyana. ⁷ Ici nikuyesa cikhulupililo, camene nicabwino kopambana golide wamene usila, olo kuti uyesewa mu mulilo. Ici cicitika kuti cikhulupililo canu cipezeke mukuyamika, ulemelelo, na ulemu pa kumuonesha Yesu Kristu. ⁸ Mukaliye kumuona, koma mumukonda. Mumuona lini lomba, koma mukhulupilila mwa eve na kukondwela mucikondwelelo camene sicingafotokozeke na kuzula kwa ulemelelo. ⁹ Mulandila lomba zanu kamba kacikhulupililo canu, cipulumuso ca moyo wanu. ¹⁰ Za cipulumuso ici, aneneli enenela za cisomo cenzefunika kuwela kwa mweo, besanthula bwino nakuonesheshangako, ¹¹ kufufuza kuti ni munthu wanji olo nthawi Muzimu wa Kristu muli beve wenzosonyeza pepeleka umboni poyamba zamanzunzo ya Kristu na za ulemelelo wati ukakonkhepo. ¹² Cevumbulushiwa kwa beve kuti benzozitumikila lini beka, koma mweo, pebelabila za zinthu zamene zamwaujyiwa lomba nabala belalikila uthenga kwanu mwa Muzimu Utuba wetumiwa kufumila kululu- zinthu zimene angelo olaka-laka kuona. ¹³ Mwaici mangani luunda yamalingalilo yanu. Nkhalani wodekha. Ikani ciyembekezo canu conse pa cisomo camene cati ciletewe kwa mweo akavumbulushiwa Yesu Kristu. ¹⁴ Ngati bana bamatu, musasatile zofuna zemwenzokonkha pamwenzosaziba. ¹⁵ Koma pakuti ekuitani ni mutuba, mweo, namwe, nkhalani atuba mucinkhalidwe conse. ¹⁶ Pakuti nicolembeka, ''Nkhalani atuba, pakuti ninemutuba.'' ¹⁷ Ngati muita ''Atata'' yeve oweluza mosakondela na kulingana na zocita za munthu aliyense, luta mu nthawi yako ya ulendo mozilemekeza. ¹⁸ Muziba kuti sikamba ka siliva na golide yusila kuti mweombolewa kucoka kucikhalidwe copusa cemwephunzila kwa ziusuwanu. ¹⁹ Mumalo mwaici, mwaombolewa na ngazi ya Kristu, enze monga mbelele iliye banga olo donthi. ²⁰ Kristu esankhiwa maziko aziko yakaliye kuikiwa, koma lomba wavumbulushiwa kwa mweo mu nthawi zino zosilijya. ²¹ Kupitila mwa yeve mukhulupilila Mulungu, emuusha kwa akufa na kumupasa ulemelelo, kuti cikhulupililo na ciyembekezo canu cinkhale mwa Mulungu. ²² Mwepanga moyo wanu kunkhala yoyela kamba kovwila coonadi. Ici cenze colinga ca cikondi ca zoona pa abale; kondanani kufuma pansi pamitima. ²³ Mwabadwa soti, osati mwa mbeu zoola, koma mwa mbeu zosaola, kupitila mu zamoyo na mau okhalila ya Mulungu. ²⁴ Pakuti, ''Zonse za thupi zili monga mauzu, na ulemelelo wake uli monga maluba amusanga amauzu. Mauzu aya oyuma, na maluba opona, ²⁵ koma mau ba Ambuye okhalako nthawi yonse.'' Aya mau ni uthenga wabwino welalikiwa kwa mweo.