¹ Aliyense okhulupilila kuti Yesu ni Kristu niobadwa kufumila kwa Mulungu, ndipo aliyense okonda atata okonda soti mwana ebadwa kwa yeve. ² Ndiye mutuzibila kuti tukonda bana ba Mulungu: pamene tikonda Mulungu nakukonkha malamulo yake. ³ Pakuti ici ni cikonda ca Mulungu: kuti tikosunga malamulo yake. Ndipo malamulo yake siovuta. ⁴ Pakuti aliyense obadwa kufumila kwa Mulungu ogonjeshya ziko. Ndipo uku ndiye kupambana kwagonjeshya ziko, nacikhulupililo casu. ⁵ Nibani ogonjeshya ziko? Ula okhulupilila kuti Yesu ni Mwana wa Mulungu. ⁶ Uyu yeve ndiye ewela na manzi na ngazi: Yesu Kristu. Ewela osati tyala na manzi, koma manzi na ngazi. ⁷ Pakuti vinthu vitatu vucitila umboni: ⁸ Mzimu, manzi, na ngazi. Ivi vitatu vugwilizana. ⁹ Ngati tulandila umboni wa banthu, umboni wa Mulungu niukeleni. Pakuti umboni wa Mulungu ni uyu, kuti ocitila umboni wa Mwana wake. ¹⁰ Aliyense okhulupilila muli Mwana wa Mulungu ali naumboni mwayeve yeka. Aliyense osakhulupilila Mulungu amupanga kuba wawenye, cifukwa aliye khulupilile umboni wamene Mulungu wapasa wa Mwana wake. ¹¹ Ndipo umboni ni uyu: Mulungu etipasa moyo wosasila, ndipo moyo uyu uli mu Mwana wake. ¹² Ula ali na Mwana ali na moyo. Ula aliye Mwana wa Mulungu aliye moyo. ¹³ Nalemba kwa mweo zinthu izi kuti muzibe kuti muli na moyo wosasila- kwa mweo mukhulupilila mu zina ya Mwana wa Mulungu. ¹⁴ Soti, ici ndiye cilimbiso citilinaco pameso pake, kuti ngati tapepha ciliconse kulingana nacifunilo cake, otivwa. ¹⁵ Soti, ngati tuziba kuti otivwa- ciliconse catupepha kwa yeve- tuziba kuti tilinaco ciliconse catapepha kwa yeve. ¹⁶ Ngati aliyense aona mbale wake ocita cimo cusalengesha imfa, ofunika kupephela, ndipo Mulungu amupase moyo. Nukamba zabala macimo yao yolengesha lini imfa. Kuli cimo culengesha imfa; sunulabila kuti apephele paico. ¹⁷ Cisalungamo ciliconse ni cimo, koma kuli cimo cusalengesha imfa. ¹⁸ Tuziba kuti aliyense obadwa kufumila kwa Mulungu ocimwa lini. Koma ula ebadwa kufumila kwa Mulungu omusunga bwino, ndipo oipa ula sangamucite ciipa. ¹⁹ Tuziba kuti tufumila kwa Mulungu, ndipo tuziba kuti ziko yonse inkhala mu mphavu ya oipa ula. ²⁰ Koma tuziba kuti Mwana wa Mulungu awela ndipo atipasa kuvwishisha kuti timuzibe eve wazoona. Soti, tili mwa yeve ali wa zoona, muli Mwana wake Yesu Kristu. Uyu ni Mulungu wa zoona ndipo moyo wosasila. ²¹ Bana, muzisunge mweka kumafano.