¹ Neo, Paulo, nutumikila Kristu Yesu, nulemba kalata iyi kwa mweo onse okhulupilila mu muzinda wa Aroma. Mulungu enisankha neo kunkhala otumiwa, ndipo enizoza kuti nikalalikile uthenga wa bwino ufumila kwa yeve. ² Kale- kale Yesu akaliye wela pa ziko la pansi, Mulungu elonjeza kuti akavumbulushe uyu uthenga wa bwino mwa njila aneneli yelemba mu malemba atuba. ³ Uyu uthenga wa bwino ni wapa Mwana wake. Uyu mwana wake kulingana na cibadidwe ca umunthu niwa mufuko la mfumu Davide. ⁴ Pa cilengedwe cauzimu, ceoneshewa mwa mphamvu kuti nimwana wake Mulungu yeve. Mulungu ecionesha ici Mzimu wake Utuba pewemuusha nonkhala na moyo soti penzecifwa. Niye Yesu Kristu Ambuye wasu. ⁵ Wationesha cikondi cikulene ndipo watizoza kunkala otumiwa. Ecita ici kuti anyinji mwa mayiko akakhululupilile mwa yeve nakumumvwila. ⁶ Mweo okhulupilila munkhala mu Aroma muli pakati pa ao esankhiwa kunkhala ba Yesu Kristu. ⁷ Nulemba kalata iyi kwa mweo monse mu Aroma ba kukonda Mulungu ndipo besankha kunkhala banthu bake. Nupemphela kuti Mulungu atate basu na Yesu Kristu Ambuye wasu kuti apitilijye kuonesha cikondi kwa mweo ndipo apitilijye kumpani Mutendele. ⁸ Punuyamba kulemba kalata iyi, Nuyamika Mulungu wangu kamba ka mweo monse okhulupilila mu Aroma. Nikamba ka vawaticitila Yesu Kristu kuti nucita teti. Numuyamika ndaba banthu onse mu Ufumu wa Aroma okamba za mweo mumukhulupilila mwa yeve. ⁹ Mulungu, unutumikila mwanthunthu punulalikila ku banthu uthenga wa bwino wa mwana wake, oziba kuti nulabila vacendi panulabila kuti nukutomolani nthawi zonse popemphela kwa Mulungu. ¹⁰ Numupempha makamaka kuti ngati ofuna yeve kuti nikuyendeleni, pothela nika citeteto. ¹¹ Nupemphela teti ndaba nuyewa kukuyendelani kukuthandizani kuti mukhulupilile naku lemekeza Kristu ngako ngako. ¹² Nuthanthauza kuti nufuna kuti tilimbikisane poujyana mutinga khulupilile Yesu. ¹³ Okhulupilila ayangu, nthawi zinyinji nenzofuna kuwela kwa mweo. Nufunishisha kuti muzibe ici. Koma niliye kwanishe kuwela ndaba yakuti nthawi zonse cinthu ciyakime cankhala cukangisha. Nankhala nufunisnisha kuwela kuti banthu banyimji pakati panu banga khulupilile mwa Yesu, monga tyala muzilili mu mizinda iyakine pakati pa asali-Ayuda. ¹⁴ Nukumvwa ngati nicoyenera kulalikila uthenga wabwino kwa onse asali- Ayuda, kwa ao olabila cigiliki na kwa ao osalabila, ku banthu ocenjela na kwa bala aliye nzelu. ¹⁵ Mwa ici, cenenzo funa ngako nicakuti ningalalikile uthenga wabwino uyu soti kwa mweo munkhala mu Aroma. ¹⁶ Nusimikijyila uthenga wa bwino pa za wacita Kristu ndaba uyu uthenga wabwino ndiye njila ya mphamvu Mulungu yakupulumushilamo awo okhulupilila mu cawacita Kristu kwa beve. Mulungu poyamba opulumusha Ayuda okhulupilila mu uthenga wabwino, ndipo ndiye pomulumusha asali-Ayuda. ¹⁷ Mukupitila mu uthenga wabwino Mulungu ovumbulusha mwakulungamishila banthu kwa yeve. Ici cili monga mwelembela muneneli kale- kale mumalemba: "Awo Mulungu baku lungamisha kwa yeve bankhale na moyo ndaba bomukhulupilila." ¹⁸ Mulungu kululu waciyika pamutete kuti niokalipa na onse aliye ulemu kwa yeve na ocita vinthu viyipa. Obaonesha kuti ofunika kuti abape cilango. Ndaba ocita vinthu viyipa, koma soti bolengesha banthu kusaziba cazoona pa Mulungu. ¹⁹ Onse asali- Ayuda angazibe bwino bwino Mulungu mwalili, ndaba Mulungu mwine wavumbulusha kwa aliyense, ²⁰ Banthu sibangaona na meso yao Mulungu mwalili. Koma kufumila pelenga ziko, vinthu vilimo vulengasha kuti tizibishishe vinthu pa yeve- mwa cisanzo, nthawi zonse ankhala ocita vinthu vamphamvu. Cisanzo ciyakine nicakuti aliyense oziba kuti Mulungu niosiyani kotheratu na vinthu vonse vecilenga. Ndiye kuti paliye aliyense angalabile mucendi, "Tenzoziba lini za Mulungu." ²¹ Ngankhale asali-Ayuda enzoziba Mulungu mwalili, baliye nomulemekeze ngati Mulungu, kapena kumuthokoza pavecita, Koma mumalo moteto, beyamba kuganiza vinthu mopusa pa yeve, ndipo balikwanishe kuziba venzofuna kuti bazibe pa yeve. ²² Ngankhale kuti benzoziona ngati nibanzelu, besanduka visilu, ²³ ndipo bekana kuvumela kuti Mulungu ali na waulemelelo ndipo sazafwa. Beumba na kupembeza mafano benzeoneka monga banthu sikuliyakine bati bakafwe, ndipo beumba soti mafano yayakine monga nyoni na nyama za mendo folo, pothela pake beumba mafano yonzolingana na nyama za mumanzi. ²⁴ Teto Mulungu elola asali- Ayuda kucita vinthu vaciwelewele vebonzo funa ngako, vinthu vebonzo ganiza kuti ofunika kuvicita, ndaba benzofuna ngako kuvicita. Kamba kaici, beyamba kusalemekeza mathupi yao muzocita zao za ciwelewele. ²⁵ Soti, besankhapo kupembeza milungu yaboza mumalo movumela cazoona pa Mulungu. benzopembeza vintu veumba Mulngu mumalo mopembeza yeve, yeve eumba vonse, yeve utufunikila kuyamika tonse koseleka! Amen. ²⁶ Teto Mulungu elola asali-Ayuda kucita vintu vaciwelewele vonvwesha soni vebonzo funangako kucita. Mwa ici, manina yanyinji yeyamba kulalana na manina yayao- cintu cukanana nacilengedwe. ²⁷ Molingana soti, madoda betaya ubwenzi wa cilengedwe pa manina. Benkhala na cilakolako caciwelewele cikulu pabekanabeka. Becita za ciwelewele na madoda ayao, zocita zonvwesha soni. Mwa ici, Mulungu ebapasa cilango polola matenda muma thupi yao, yamene ili mphoto yacimo yoteti. ²⁸ Mopitilijyapo, ndaba beganiza kuti nicosayenera kuziba Mulungu, elolo maganizo yao yaliye fundo kuti yabalamulile kosililalatu. Mwa ici, beyamba kucita vinthu viyipa vakuti aliyense ofunikila lini kuvicita. ²⁹ Befuna ngako kucita vinthu vonse vosalungama na yiyipa. Otola vinthu va ayao naku baononga munjila zinyinji, nthawi zonse okhumbwila banthu; ofuna kupaya banthu. Oleta mukangano nocita ndeo nayao, soti onamijya banthu nokamba viipa pa beve. ³⁰ Anyinji okamba viipa payao. Onamijya ayao ndipo ocita viyipa kwa Mulungu ndipo nibandeo nozunza banthu. Ozitukumula pabevebeka pakati payao nopanga njila zao zocitilamo viyipa. Bana omvwila lini makolo yao. ³¹ Anyinji ocita vinthu mwausilu njila ukalipisha Mulungu. Ocita lini vebelonjeza. Okonda lini banthu bamu banja yao ndipo oonesha lini cifundo kwa bala ofuna cifundo. ³² Ngankhale kuti oziba kuti Mulungu walabila kuti ao ocita viyipa ofunika apayiwe, ocatalini tyala ivi vinthu viyipa, koma ovomekejyana nao bayakine ovicita.