¹ Mwai ici, anekwasu okondewa bangu unuyewa, cimwemwe cangu na korona wangu, mnjila iyi panamani nji mwa Ambuye, okondewa ayangu. ² Nudandaulila Euodiya, ndipo nudandaulila Suntuke, munkhale na nzeru imozi. ³ Ee, nukukonshani, muyangu wa cendi, kuyavya aba manina okata nchito na neo mkufalisa uthenga, pamozi naKlementonso na osala anchito ayangu bala ma zina bao ali m'mbuku ya moyo. ⁴ Kondwelani mwa Ambuye nthawi zonse. Soti nulabila, kondwelani. ⁵ Lekani kufasa kwanu kuzibike ku banthu onse. Ambuye ali pafupi. ⁶ Musankhale na nkhaba pa vilivonse. m'malo mwake mvili vonse na pemphelo na kupembeza na mayamiko, lekani vopempha vanu vizibike kwa Mulungu, ⁷ na mtendele wa Mulingu, upitilila kimvwishisha konse, ulonde mitima yanu na maganizo banu mwa Kristu Yesu. ⁸ Cosiizhyila, anekwasu, vili vonse vinthu vacendi, vilivonse vinthu va ulemu, vili vonse vinthu va cilungamo, vili vonse vinthu vituba, vili vinthu va cikondi, vili vonse va kambiwa va bwino, ngati pali ciliconse cabwino ngako, ngati pali ciliconse coyamikika, ganizilani pali ivi vinthu. ⁹ Vinthu vimwa phunzila na kulandila na kumvwa na kuona mwa neo, citani ivi vinthu, ndipo Mulungu wa mtendele akabe namwe. ¹⁰ Nukondwela ngako mwa Ambuye cifukwa lomba posilizhyila mwayamba soti kuikanko nzeru pali neo. Kuvuli mwenzoikadi nzeru pa neo, koma penzemve mpata wakuti mweo muthandize. ¹¹ Nukamba lini ici cifukwa cakuti neo nufuna thandizo. Pakuti naphunzila kukondweleshewa mvilivonse vocitika. ¹² Nuziba mucubela kunkhala osauka, ndipo nuziba soti mucubela kunkhala navo vonse. Mnjila iliyonse na mvinthu vonse naphunzila cinsinsi mondyeshewela bwino olo kunkhala na njala, na mwakunkhalila na vininji olo kunkhala ofuna thandizo. ¹³ Ningacite vinthu vonse kupitila muli wala onipasa mphamvu. ¹⁴ Mwa ici, mwecita bwino kugabana nane m'mavuto. ¹⁵ Mweo Afilipo muziba kuti mkuyamba kwa uthenga wabwino, penefuma ku Makedoniya, paliye chalichi inithandiza pa nkhani ya kupasa na kulandila kucosako mweo mweka. ¹⁶ Olo pinenze ku Tesalonika, mwetumizhya thandizo pa zofuna zangu kupilila kamozi. ¹⁷ Sikuti nufunushisha mphaso. M'malo mwake, nufunishisha cipaso cati ciikilile nkhongole zanu. ¹⁸ Nalandila vonse mokwanila, na mopitilila. Nalandila mkwanila lomba pakuti nalindila kufuma kwa Epafrodoto vinthu vimwetumizhya. Vinakafungo konvwika bwino, kuzipeleka kwavomelewa nakukondwekoshewa kwa Mulungu. ¹⁹ Mulungu wangu akwanilishe vofuna vanu vonse kulinga na kulemela kwake mu ulemelelo wa Kristu Yesu. ²⁰ Lomba kwa Mulungu na Awisi wasu ulemelelo wanu mpaka kale-kale. Ame ²¹ Moni kwa banthu onse ba Mulungu atuba mwa Kristu Yesu. Anekwasu bala onkhala na neo moni wanu. ²² Banthu onse ba Mulungu atuba bala ali pano moni wanu, maka-maka bal amng'anda ya Kaisala. ²³ Cisomo ca Ambuye Yesu Kristu cinkhale na mzimu wanu.