¹ Paulo, Silvano na Timoti, ku mpingo waku Atesalonika mwa Mulungu Atata na Yesu Kristu Ambuye wasu. ² Cisomo na mtendele kwa mweo wofumila kwa ,Mulungu Atata basu na Ambuye Yesu Kristu. ³ Tikoyamika Mulungu nthawi zonse kamba ka mweo, anekwasu, monga kuli koyenela pakuti cikhulupililo canu cukulilako, na cikondi cimulinaco aliyense pa muyake cukulilako. ⁴ Moteto seo tabene tuzitamandila za mweo mu machalichi ya Mulungu pakudekha mtima kwanu na cikhulupililo canu mumazunzo yanu yonse, na visausho vumupilila. ⁵ Ici ni cisimikijyo ca ciweluzo colungama ca Mulungu, kuti mukabelengewe oyenela mu ufumu wa Mulungu, wamumvwila vobaba. ⁶ Pakuti inde, nikolungama kwa Mulungu kuwejyela cisausho kwa bala okusaushani, ⁷ na mpumulo kwa mweo musaushiwa nase pamozi. pamene Yesu Kristu ooneshewa kucokela kululu na angelo bake bamphamvu ⁸ mu mulilo oyaka, na kuwejyela cilango kwa bala osaziba Mulungu na bala osamvwila uthenga wabwino wa Yesu Kristu. ⁹ Akalandile cilango ca cionongeko cobasiyanisha ku cinso ca Ambuye naku ulemelelo wa mphamvu yake. ¹⁰ Akacite ici pati akawele siku ila kuzopasiwa ulemelelokuzo mwa banthu bake atuba ndipo nakuzodabwishika nabala onse okhulupilila, ndaba umboni wasu wekhulupilika. ¹¹ Kamba ka ici tukupemphelelani kosalekejya kuti Mulungu wasu akubelengeleni oyenelela kuitiwa kwanu, na mphamvu yake akakwanishe colinga conse cabwino na nchito yonse ya cikhulupililo. ¹² Tupemphela teti kuti zina la Ambuye wasu Yesu Kristu likapasiwe ulemelelo mwa mweo, namwe mwa yeve, kulingana na cisomo ca Mulungu wasu na Ambuye Yesu Kristu.