¹ Jeso na tanga kame ku kuziya bantu he kamba lye wate. Mi ka kwina e dxhandiya nene kali shangene kwakwe, nakabira mucisepe , mwi wate, noku kara hanshi. E dxhandia lyonshe nilya siara he kamba. ² Mi naba zyiza zintu zingi ke nguli, mi mwi zyizi lyakwe ka ta ye, ³ Mushuwe, o mulimi nazwa kuya kuka byara e mbuto yakwe. ⁴ Mi aho kaya bu byara, e mbuto imwinya yokuwira munjira mi ezi zyuni zokukezya kuilya. ⁵ I mwinya e mbuto niya wira mu mabuwe omo kamwina ebu echenya, niya mena haho bulyo kakuli ebu kali kalilizungi. ⁶ Kono aho lika ñatura ezyuba, zokuretuka nokuya kakuli kali kazina e misi. ⁷ I mwinya embuto niya wira mwinshonsho. Enshonsho aho zikura zokuzi yaya, mi e mbuto kali niya bika bweke. ⁸ Imwinya e mbuto niya wira mwibu erotu, mi yokubika bweke bungi noku ekeza, kame imwinya embuto yokubika makumi otatwe, imwi makumi one niobile, imwi mwanda." ⁹ Kame okuta ye, "Ozyo akwesi matwi okushuwisa, ashuwe!" ¹⁰ Aho kakere yenke Jeso, abo kabena hafuhi neye, nabena kumi nibo bile bokumubuza zeyo enguli. ¹¹ Mi akuba sumwina kuta ye, "Enwe muherwe kuzyiba enkunutu zo mubuso wa Nyambe. Kono bahanje ba bikirwa zintu zonshe ke nguli, ¹² kuti ye nanga ne batonda, eni batonda, kono kaba boni, kame habasi shuwa, eni bashuwa, kono kaba shuwisisi, kambesi bulyaho nebara zoka noku bora kwa nyambe wabo abaswarere." ¹³ Kame akuba ta ye, "Kamushuwisisi eyi enguli? Mbuti shaka mushuwisise enguli zimwinya?. ¹⁴ Omubyali abyara embuto yakwe, ndeye abyara ezywi. ¹⁵ Bamwi bantu bafwana mbwe yina embuto iwira kwimbali nenjira, ezywi nilya byarwa kwabo. Mi kumana bulyo kuli shuwa, haho bulyo Satani akezya kuhinda lina ezywi lya byarwa kwabo. ¹⁶ Mi bamwi bantu bafwana mbwe yina mbuto niya gwira mwibu lishangene na mabuwe, abo batenda ye, habasishuwa ezywi, haho bulyo bahwera kulitambura kentabo. ¹⁷ Mi bazya emisi, kono batundamena enako enchenya. Kame obukababu habu shikezya ke baka lye zywi, bazwafa haho bulyo. ¹⁸ Bamwinya kame mbabena bafwana mbwe embuto niza byarwa mwiminga. Bashuwa ezywi, ¹⁹ kono entongoko ze fasi, no kuhomiwa ko bufumu, mi nentakazo yezintu zimwinya, hazishikabira kwabo ziyaya ezywi mi kali biki misero. ²⁰ Kono abo bana tambuli ezywi mwibu erotu. Mbabo bashuwa ezwyi noku tambura mi no kubika misero: ba mwi makumi otatwe, bamwi makumi one na makumi obile, mi bamwi mwanda". ²¹ Jeso aku bata ye "Ha kusi retwa erambi munjuo, muibika mucintu no kufupika ho, kapa kuyibika mwinshi yo mararo? Muireta nokuibika he nkanza. ²² Kakuli kwazya echo chizikitwe kali nechi bonahare, mi kwazya enkunutu eyo kali nei zyibahare. ²³ Haiba kwina ozyo akwesi matwi okushuwisa, mumusiye ashuwe!" ²⁴ Na bata ye, "Muremuhe echo mushuwa, entikanyo eyo muhinda kulinganya, njeyo nemulinganyezwe kayo, nokumi ekezera ho. ²⁵ Kakuli, ozyu akwesi, ara hewa zimwinya, kono ozyo azya, ara tapiwa necho akwesi". ²⁶ Kame akuta ye, "O mubuso wa Nyambe u fwana mbwe muntu a byalite embuto mwibu. ²⁷ Kenako yamasiku arara mi no buka masiku-siku. Mi embuto ikura noku gora, nanga kazyi omo zi pangahalira. ²⁸ E fasi libika obweke elyo lyini: matangiro njisiko, kokukezya chibunga, no bweke bugorete muchibunga. ²⁹ Mi aho bubinzwa o bweke, atumina jekesi, kakuli enako yoku zyangura siya huli." ³⁰ Kame nata ye, "Kwinji tuwora kubapanya mubuso wa Nyambe, kapa nji nguli munji tu wora kusebelisa kutoroka owo mubuso? ³¹ Kufwana mbwe nji mbuto ndana hawa eyo hayisi byaliwa, nje nchenya kwi mbuto zonshe mwifasi. ³² Mi hayisi byaliwa, ikura noku neneha kuhita zonshe mwiwa, mi ipanga e mitabi minene, ye ezi zyuni ze wiru zi pange ho ezizyuwo zazo mu mi zunde yazo." ³³ Ke nguli zingi nawamba ezywi kwabo, kuyenda komo kaba shuwisisa, ³⁴ mi kali kawamba kwabo nazya kuli tusisa enguli. Kono aho kakere yenke, natorokera aba zyizwa bakwe zintu zonshe. ³⁵ Elyo ezyuba, kenako ya mantengu, aku bata ye, "Tuyende mwina shilya." ³⁶ Bo kusiya e dxhandia, bo kuyenda na Jeso, sikakere kare mubwato. Mato amwinya kaena neye. ³⁷ Mi oruho runene rokutanga na mandinda okutanga kukabira mubwato, mane shikau zyulite kare. ³⁸ Kono Jeso kakena he ntanta yo bwato, mi karere ha maro. Bo kukamubusa, ne bata ye, "Muzyizwa, kobirayeli kuta ye shetufwa?" ³⁹ Mi akubuka, no kukalimera oruho, mi oku sumwina e wate ye, "Enkozo, tontore". Mi oruho rokuzyimana, mi kwa kutontora chaha. ⁴⁰ Mi aku bata ye, "Chinji aho mutiyite? Nahanu mwazya entumero?" ⁴¹ Kaba tiyite chaha mi bokutanga kulisumwina, "Ndini zyuzyu, kakuli nanga nduho ne wate zimushuwa?"