¹ Kali mbantu bangi abo baswanera kuba bazyiizi, bakwangu. Tuzyi kuti ye twara wana e nkaturo e nene hawa. ² Kakuli bantu bonshe bakwanga munjira zingi. Heba zyumunya ka kwanga mu ku amba mazywi mabbi, ozyo muntu akulite hawa, awora nanga kuyendisa o mubili wakwe wonshe. ³ Hanu heba netu bika e ntoli mukanwa ke nkambe kuta ye itu kutike, tuwora oku yendesa e mibili yayo. ⁴ Muremuhe kuti ye a mato manene, nanga neali manene a timbiwa kuruho rugorete, a yendeswa kuchi rabo echinini konshe oko ashaka o muyendisi wao kuti ayende. ⁵ Kenjira iswana o rulimi chibbamu chinini ha mubili, kono ruki nanuna ke zintu zinene. Mu bone aka liro kanini omu kawora ku yisikiza o mutemwa o munene. ⁶ O rulimi noro muliro, e fasi lye zibbi likere mukati ke zibbamu zemibili yetu. U sihisa omubili wonshe mi no ku bika ho muliro o buharo bonshe. Ndoro rwini rukibika ha muliro ke here. ⁷ Ezi pau zo mu mutemwa zonshe, zizyuni, ziyenda ke bumo, nezi bumbantu zo muwate zikwesi zitengururwa mi kazi tengururwanga kubantu. ⁸ Kono ko rulimi, kwazya o muntu o zyo awora kuru tengurura. Mbubbi bo kabuwoli ku yendeswa, ruzywire omuzwakera uyaya. ⁹ Tutemba o Nfumu ne Shwetu karo, mi tukuta bantu karo, abo niba tendwa mu chiswaniso cha Nyambe. ¹⁰ Mu muromo uswana kuzwa e nfuyauzi ne chikuto. Bakwangu, ezi zintu kazi swaneli kutendahara. ¹¹ Nga eziba lyonke liwora kutira amenji a lyoha nawo a rura? ¹² Ba kwangu, nga e chikuni che feiga, chi bika olivera? Kapa e chishamu cha manjembele chibike feiga? Kapa amenji e zwai kuba menji a lyoha. ¹³ Ndini atalifite no ku shuwisisa mukati kenu? Mu musiye ozyo muntu a sunde buharo burotu ke misebezi yakwe muku kibika hanshi ko butali. ¹⁴ Kono heba okwesi o munna urura no kushaka zintu zo mozyo wako, osiye kuki nanuna no kuhoma kurwisa buniti. ¹⁵ Obu kali mbutali buzwa kuwiru. Kono, bwe fasi, bwazya o Ruho Ruchena, bwa mademona. ¹⁶ Kakuli oko kwina o munna nechi shaka mozyo, kwina kulyangana ne zitendantu zibbi. ¹⁷ Kono o butali buzwilira kuwiru buchenete hawa kokutatika, mi ne mpore, kuliketa, kubiraera za bamwi, kuzyura chishemo ne chiyangantu chirotu, kwazya chishweka, nokuba ne niti. ¹⁸ Mi echiyangantu cho kuchena chi byalitwe mu mpore mukati kabo ba tenda e mpore.