¹ Mahakasiky reo fagnomaizam-pagnahy, rahalahy, dia tsy tiako tsy hahay areo. ² Hainareo fao tamin'ny areo mpanompo sampy, dia voavily nagnagny amin'ny reo sampy tsy manam-peo areo, tagny amin'ny zay lalagna jiaby nitarihin'ny regny areo. ³ Noho zany tiako ho hainareo fao tsisy ôlogno zay mivaolagna amin'ny Fagnahin-Jagnahary afaka mivaolagna: "Jesôsy dia voahôzogno." Tsisy afaka mivaolagna magnanjao: "Jesôsy dia Tompo,'' koa tsy amin'ny alalan'ny Fagnahy Masigny. ⁴ Ary misy fagnomaizam-pagnahy samihafa, fao Fagnahy mitôvy faogna. ⁵ Misy fanompoagna samy hafa, fao Tompo mitôvy faogna; ⁶ ary misy karazagn'asa samihafa, fao Zagnahary mitôvy faogna no magnano zareo ho azo atao amin'ny tsiaraikiaraiky. ⁷ Ary hoan'ny tsiaraikiaraiky no namiagna fanehoagna ambailan'ny Fagnahy hoan'ny tombontsoan'ny jiaby. ⁸ Fao amin'ny ôlogno araiky dia namiagna avy amin'ny Fagnahy ny vaolagna fahindriagna, aveo hoan'ny araiky hafa ny vaolagna fahaizagna amin'ny alalan'ny Fagnahy mitôvy faogna. ⁹ Hoan'ny araiky hafa dia namiagna ny finoagna amin'ny alalan'ny Fagnahy mitôvy, ary ho an'ny araiky hafa reo fagnomaizam-pahasoavagna hampahivagna amin'ny alalan'ny Fagnahy araiky. ¹⁰ Hoan'ny hafa dia namiagna reo asan'ny ngôvo, aveo hoan'ny araiky hafa faminaniagna. Hoan'ny araiky hafa dia namiagna fahafahagna magnavaka reo fagnahy, hoan'ny araiky hafa reo karazagna fivolagnagna samihafa, ary hoan'ny araiky hafa ny fandikagna vaolagna. ¹¹ Fao ny Fagnahy araiky sady mitôvy faogna no miasa ao amin'ny zany jiaby zany, namiagna reo fagnomaizam-pagnahy hoan'ny ôlogno tsiaraikiaraiky aby, araka zay nifidiany. ¹² Fao satria ny vatagna dia araiky managna rantsagna maro ary ny jiaby dia rantsan'ny lehy vatagna faogna, noho zany dia miaraka amin'i Kristy zany. ¹³ Fao tamin'ny alalan'ny Fagnahy araiky no nitsaboagna batisa atsika jiaby koafa ho vatagna araiky, na reo Jiosy na reo Grika, na voafatotra na afaka, ary ny jiaby dia natao mbô higiaka amin'ny Fagnahy araiky. ¹⁴ Fao ny vatagna dia tsy rantsagna taokagna, fao maro. ¹⁵ Raha mivaolagna ny tongotro magnanjao: "Satria tsy tagnagna zaho, dia tsy rantsagna amin'ny vatagna zaho," zany dia tsy hely amin'ny rantsan'ny vatagna aby. ¹⁶ Ary raha ny sôfigny no hivaolagna magnanjao: "Satria tsy maso zaho, dia tsy rantsagna amin'ny vatagna zaho," zany dia tsy hely amin'ny rantsan'ny vatagna aby. ¹⁷ Raha maso ny vatagna jiaby, dia ho aiza ny fandrignaisagna? Raha sôfigny ny vatagna jiaby, dia ho aiza ny fanimboloagna? ¹⁸ Fao Zagnahary nandamigny ny rantsan'ny vatagna tsiaraikiaraiky araka ny namoraonany zany. ¹⁹ Raha rantsagna mitôvy faogna izy jiaby, aiza no hoisy vatagna? ²⁰ Kay zao dia rantsagna maro zareo, fao vatagna araiky faogna. ²¹ Ny maso tsy afaka mivaolagna amin'ny tagnagna magnanjao: "Tsisy ilàko anao." Na ny laoha tsy hivaolagna amin'ny hongotro magnanjao: ²² "Tsisy ilàko anao." Fao reo rantsagna amin'ny vatagna zay miboaka ho taigna malemy dia taigna ilaigny, ²³ ary reo rantsan'ny vatagna zay heverintsika fao tsy dia manan-danja, dia amiantsika lanja taigna gaida reo, ary reo rantsantsika tsy faboaka dia managna fahamendrehagna mihoatra. ²⁴ Avakeo ny rantsantsika faboaka dia tsy mila ndesigny amin'ny fahamaindrehagna, fao reo dia afa managna fahamendrehagna. Fao Zagnahary nampikambagna ny rantsagna jiaby miaraka, aveo izy nagnamia lanja reo zay tsy ampy zany. ²⁵ Nagnano zany Izy mbô tsy hoisy fisarahagna eo amin'ny vatagna, fao mbô hifampikarakara amin'ny fitiavagna mitôvy re rantsagna. ²⁶ Noho zany koafa mijaly ny rantsagna araiky, dia miara-mijaly reo rantsagna jiaby; na koafa amian-danja ny rantsagna araiky, dia miaraka ravo ny rantsagna jiaby. ²⁷ Ary areo dia vatan'i Kristy ary rantsagna amin'ny zany ny tsiaraikiaraiky. ²⁸ Ary Zagnahary nanendry tao amin'ny fiangonagna reo apostoly alaoha, faharoa reo mpagnazary, fahatelo reo mpampianatra, aveo reo zay magnano asa mahagaga, aveo reo fagnomaizam-pahasoavagna hampahivagna, reo zay magnamia fagnampiagna, reo zay magnano ny asan'ny fitantagnan-draharaha, ary reo zay managna karazagna fivolagnagna samihafa. ²⁹ Apostoly moa zareo jiaby? Mpagnazary jiaby moa? Mpampianatra jiaby moa? Magnano asa mahagaga jiaby moa? ³⁰ Managna fagnomaizam-pahasoavagna hampahivagna moa izy jiaby? Mivaolagna amin'ny fivolagnagna tsy hay moa izy jiaby? Mandika vaolagna moa izy jiaby? ³¹ Taigna tadiavo reo fagnomaizam-pagnahy taigna gaida. Fao hagnaboaka areo lalagna taigna tsara.