¹ Abaka aviô nisy Fariseo ndraiky mpanôratra lalagna sasatsasany baka agny Jerosalema nagnantogno Jesosy. Nambaran'ndrô hoe: ² "Nagnino mba irô mpianatranao mandika fomban-drazagn'ndrô zoky olôgno? Fa tsy manasa tagnany irô alohan'ny hihinagna." ³ Namaly Izy aviô nivôlagna tamin'ndrô: "Kay nagnino basy anarô mandika lalàn-dRagnahary nohon'ny fomban-drazagnanarô? ⁴ Fa Zagnahary nagnambara: 'Hajao babanao ndraiky reninao,' aviô 'Zay mivôlagna fa ratsy babany na reniny, kay ho faty marigny.' ⁵ Fa anarô mivôlagna: 'Na azôvy na azôvy mivôlagna amin'ny babany na reniny magnano hoe: 'Na ino na ino fagnampiagna zay azonarô baka aminaka, kay fagnamaizagna amin-dRagnahary izegny amin'ny niany ty,'" ⁶ izegny olo zegny tsy mila magnaja babany. Amin'ny fomba izegny, nifoagnanarô vôlagnan-dRagnahary nohon'ny tombontsoan'ndrô fomban-drazagnanarô. ⁷ Ô ry mpihatsaravelatsihy! Marigny ny faminaniagnan'Isaia momba anarô izikoa izy nivôlagna nagnano hoe: ⁸ 'Ity vahoaka ity magnaja zaha amin'ny sognin'ndrô, fa ny fon'ndrô lavitra zaha. ⁹ Tsisy dikany ny fideragna zaha, satria irô mampianatra didin'olombelôgno karaha fampianaragn'ndrô.'" ¹⁰ Abaka aviô nikaiky irô vahoaka agnantôgno Izy aviô nagnambara tamin'ndrô nagnano hoe: "Tandrignaisa aviô mahazahoha. ¹¹ Tsy miditra ao ambavan'olo mandoto olo. Fa kanaifa ndraiky, zay amboakan'ny vava, mandoto olôgno." ¹² Abaka aviô hagnantôgno irô mpianatra aviô nivôlagna tamin'i Jesosy hoe: "Tsy hainao fa nampaneloko irô fariseo naharegny izegny vôlagna izegny?" ¹³ Jesosy namaly kay nivôlagna nagnano hoe: "Irô zaka maniry zay tsy nambolen'lay babako agny an-dagnitry ho fongoriny aby. ¹⁴ Ambilah irô hidoko iô, irô mpitarika jamba. Izikoa misy olo jamba araiky mitarika jamba araiky hafa, kay samy hivarigny an-kady izy aroé." ¹⁵ Petera namaly kay nivôlagna tamin'i Jesosy hoe: "Azavaho aminay izegny fagnôharagna izegny." ¹⁶ Nambaran'i Jesosy: "Tsy managna fahalalagna ma koa anarô?" ¹⁷ Tsy hitanao mba fa zay miditry amin'ny vava mandaiha amin'ny kibo abaka aviô haboaka agny amin'ny lava-piringy? ¹⁸ Fa irô zaka zay aboaka'ny vava directy avy amin'ny fo. Irô zaka jiaby iô mandoto olo araiky. ¹⁹ Fa avy amin-po iboahan'ny sain-dratsy, famonôagna olo, fijangajangagna, fangalam-badin'olo, halatra, fijorôagna vavolombelôgno tsy marigny, aviô fivôlagnam-dratsy. ²⁰ Irô zaka iô mandoto olo araiky. Fa mihinagna amin'ny tagnana tsy misasa tsy mandoto olo araiky." ²¹ Abaka aviô Jesosy niala tiô kay nipôdy tagny amin'ny faritanin'i Tyro ndraiky sidona. ²² Igny fa, nisy viavy araiky kananita araiky amin'izegny faritra izegny. Nikaiky mare izy aviô nivôlagna: "Mamindrà fo aminaka, ô ry Tompo, zanak'i Davida ô! Zanako vavy ampahorin'ny demonia mare." ²³ Fa Jesosy tsy namaly izy. Nagnantôgno irô mpianatranany kay niagavy Taminany, nagnano hoe: "Roahy izy, fa mitabataba amintsika." ²⁴ Fa Jesosy namaly aviô nivôlagna nagnano hoe: "Tsy nirahiny ho an'azôvy na azôvy Zaha afa-tsy hoan'ny ondrikôndriky very ao amin'ny ankohonan'Irsaely." ²⁵ Fa nangataka ndraiky niankôhoko tiô agnatrehanany tiô izy, nagnano hoe: "Tompo, vonjeo zaha." ²⁶ Namaly Izy nagnano hoe: "Tsy rariny izikoa alaigna môfon-jaza kay atsipy amin'ny amboa." ²⁷ Fa hoy izy hoe: "Ia, Tômpo, na fandroaka aby mbala mihinagna pôtipôtiky latsaka baka amin'ny latabatran'ny tômpiny." ²⁸ Kay namaly Jesosy nagnano hoe: "Ah viavy ty, maventy finôagnanao; ho tantèraka aminao araka zegny iriny fônao." Janga direct zanany tiô tamin'ny fotoagna iô. ²⁹ Niala tiô Jesosy kay nandaiha amin'ny sisin-dranoasigny Galilia. Abaka aviô niakatra tamin'ny bongo araiky Izy kay nipaitraka tiô. ³⁰ Vahoaka maro nagnantôgno Izy. Nandesin'ndrô niaraka tamin'ndrô mandringa, gila, môaha, kilemaigna, aviô aretigny maro samihafa koa. Napaitrakan'ndrô tiô amin'ny vitin'i Jesosy irô; kay nijangany. ³¹ Kay gaga irô vahoaka izikoa fa nahita irô moha nivôlagna, kilemaigna janga, ny malemy nivadiky afaka mandaiha, aviô ny jamba nahiratra. Nankalaza dRagnaharin'Israely irô. ³² Nikaiky irô mpianatranany mbaika hagnantôgno izy Jesosy aviô nivôlagna nagnano hoe: "Mangoraka irô vahoaka Zaha, satria aifa telo andra sahady irô nipaitraka niaraka taminaka naifa tsy managna hohanigny. Tsy tia handaifa irô tsy mihinagna Zaha, fa mety ho toragna amin'ny lalàgna." ³³ Nambaran'ndrô mpianatra taminany: "Aia hahitanay môfo ampy irô vahoaka maro aby iô aty an'efittra?" ³⁴ Nambaran'i Jesosy tamin'ndrô: "Môfo firy mba aminarô agny?" Namaly irô: "Fito, ndraiky, ndraiky hazandragno madiniky vitsy." ³⁵ Abaka iô Jesosy nandidy vahoaka mbaika hipaitraka amin'ny tany. ³⁶ Nangala môfo fito ndraiky hazandragno Izy, aviô izikoa fa nagnano fisaôragna, namaky môfo aviô namiany irô hoan'ndrô mpianatra. Irô mpianatra nagnamia tamin'ndrô vahoaka. ³⁷ Nihinagna salakady afa-pô irô vahoaka jiaby. Abaka iô irô namory tanty fito feno tapatapany zay tsy lany. ³⁸ Irô zay nihinagna, agny amin'ny efatra arivo lahy, tsy mbola agnatiny ny tsaiky amam-bihiavy. ³⁹ Abaka aviô Jesosy nampody vahoaka kay niôndragna sambohely aviô nandaiha amin'ny faritr'i Magadana.