¹ Tamin'ny fotoagna izegny Jesosy nandaiha namakivavy ny tanimbary tamin'ny andro Sabata. Silogno irô mpianatranany kay nanomboko nioty salohim-bary kay nihinagna irô. ² Kanaifa noho hitan'drô Fariseo izegny, kay nivolagn'ndrô tamin'i Jesosy: "Zahava, irô mpianatranao aby iô magnano zay tsy ara-dalàgna magnano izy amin'ny Sabata." ³ Fa Jesosy nivôlagna irô nagnano hoe: "Mbola ty nivakianarô fekiny mba zaka nataon'i Davida, izikoa silôgno izy, ndraiky irô lelahy jiaby niaraka taminany? ⁴ Niditra tao amin'ny tragnon-dRagnahary izy aviô nihinagna mofon'ny fanatrehagna, zay tsy ara-dalàgna hoan'ndrô izikoa hanigny aviô tsy ara-dalàgna hoan'drô zay niaraka taminany, kanaifa ara-dalàgna hoan'drô lohan'ny mpisorona araiky fo. ⁵ Tsary mbola nivakianarô mba ao amin'ny lalàgna, fa amin'ny Sabata irô mpisorona agny an-tempoly manota sabata naifa tsy manan-tsigny? ⁶ Kanaifa ambarako aminarô fa eto araiky maventy noho tempoly. ⁷ Izikoa hainarô hevitry magnano hoe: 'Famindram-po iriko fa tsy sorôgno,' tsy nagnamelôko ny tsy manan-tsigny anarô. ⁸ Fa Zanak'Olo tegna tompon'ny Sabata." ⁹ Abaka aviô Jesosy niala tao kay niditry tao amin'ny Synagogan'ndrô. ¹⁰ Igny fa, nisy lelahy zay malemy tanagna tiô. Nagnatogno Jesosy irô Fariseo,nagnano hoe: "Ara-dalàgna mba magnasitragna amin'ny Sabata?" mbaika hiampangan'drô Izy amin'ny fahotagna. ¹¹ Nambaran'i Jesosy tamin'ndrô: "Olo azôvy aminarô, azôvy, izikoa ondrikôndriky araiky fô anagnany, kay izikoa latsaka agnaty lavaka laligny ondrikôndriky amin'ny andran'ny sabata, tsy anambotra izy aviô tsy hampiakatra izy? ¹² Tsy manan-danja, mba olo nohon'ny ondrikôndriky! Kay noho izegny, ara dalàgna magnano tsara amin'ny andra Sabata." ¹³ Abaka aviô Jesosy nivôlagna tamin-dralelahy nagnano hoe: "Ahinjiro tagnanao." Kay nahinjiny, aviô nipody fahasalamagnanany, karaha tagnanany ilany. ¹⁴ Fa niboaka irô Fariseo kay nitetiky hamono Izy. Nitady hevitry amin'ny fomba mety hamonôagna Izy irô. ¹⁵ Izikoa fa nahay izegny Jesosy, niala tiô Izy. Olo maro nagnaraka Izy, aviô nijangany jiaby. ¹⁶ Izy nandidy irô mbaika tsy hahaizagna Izy amin'ny hafa, ¹⁷ mba ahatantairaka, zay aifa nambarany tamin'ny alalan' Isaia mpaminany, magnano hoe: ¹⁸ "Zahava, mpanômpoko zay nifidiko; ô ry malalako, zay tegna sitrakin'ny fanahiko. Apaitrako amin'ny fanahiko, aviô hagnambara fitsaragna amin'ny Jentilisa izy. ¹⁹ Tsy hifanditra na koa hikaiky maresaka izy; aviô tsary nisy olo haregny feônany amin'ny lalàgna. ²⁰ Tsy hanapaka volotara tôrotôro izy; tsy hamôno zay lahin-jiro manentona, mandra-pagnanaovany rariny ho fandresena, ²¹ aviô amin'ny agnaranany hananan'ndrô Jentilsa fanantenana." ²² Abaka aviô nisy olo gila ndraiky môaha, nipetrahan'ny demony, nandesiny tamin'ny Jesosy. Nijangany izy, vokatr'izegny nivôlagna ndraiky nahita lay môaha. ²³ Gaga irô vahoaka jiaby kay nivôlagna nagnano hoe: "Mety lelahy iô donko zanaka Davida zegny?" ²⁴ Kanaifa izikoa fa naharegny izegny fahagagagna izegny irô Fariseo, kay nivôlagna irô nagnano hoe: "Io lelahy iô tsy magnambôaka demony izikoa tsy amin'ny alalan'i Belzeboba, chefon'ny demony." ²⁵ Kanaifa hain'i Jesosy eritreritrin'drô kay nivôlagna irô izy nagnano hoe: "Fanjakana jiaby miady an-tragno tsy haharitra, aviô tanàna na tragno jiaby miady an-tragno ho rava. ²⁶ Izikoa magnamboaka Satana ny Satana, miady an-tragno izy. Amin'ny fomba akôry noho izegny hijôroan'ny fanjakany? ²⁷ Aviô izikoa magnamboaka irô demony amin'ny alalan'i belzeboba Zaha, amin'ny alalan'azôvy izegny adroahagn'ny zanakanarô irô? Noho antony izegny hitsaragnao irô. ²⁸ Kanaifa izikôa magnabôaka irô demony amin'ny alalan'ny Fagnahin-dRagnahary Zaha, efa navy aminarô Fanjakan-dRagnahary. ²⁹ Amin'ny fomba akôry ahafahan'olo miditry agny amin'ny tragnôn'ny lelahy mahery aviô mangala irô fanagnanany izikoa tsy hafatotra aloha i lelahy mahery? Abaka aviô hagala irô fanagnanany agny an-tragnonany izy. ³⁰ Zay tsy momba Zaha manohitry Zaha, aviô zay tsy mitambatra miaraka Aminaka miparitaka. ³¹ Noho izegny aminarô fa, ho voavela heloko olo amin'ny fahotaha ndraiky amin'ny fivôlagnan-dratsy jiaby, fa fivôlagnan-dratsy amin'ny fagnahy Masigny tsy hahazôagna famelan-kelôko. ³² Na azôvy na azôvy mivôlagna manôhitry Zanak'olo, ho voavela izy. Fa na azôvy na azôvy mivôlagna manohitry Fagnahy Masigny, tsy ho voavela izy, na amin'ny fiainagna ity na amin'izay mbola ho avy. ³³ Ataôva tsara kakazo mbaika hamôha tsara izegny, na ataova ratsy kakazo fa hamôha ratsy izegny, fa hay amin'ny voany kakazo. ³⁴ Anarô taranaka menarana, satria ratsy fagnahy anarô, kay amin'ny fomba akôry ahafahanarô mivôlagna zaka tsara? Fa avy amin'ny haben'ny ao am-po ivôlagnan'ny vavany. ³⁵ Ny olo tsara avy baka amin'ny fanagnana tsara ao am-po, mamôkatra zay tsara, aviô olo ratsy avy amin'ny fanagnana ratsy ao am-pony mamôkatra zay ratsy. ³⁶ Ambarako marigny aminarô fa amin'ny andrôn'ny fitsaragna ho adigniny amin'ny volagna tsy voahevitra nambarany baka amin'olo. ³⁷ Fa vôlagninao hagnamarinana anao, aviô volagninao hagnamelohagna anarô." ³⁸ Abaka aviô nisy mpanôro-dalàgna ndraiky Fariseo sasantsasany namaly i Jesosy aviô nivôlagna nagnano hoe: "Ô ry Mpampianatra ô, magniry ahita famantaragna baka aminao zahay." ³⁹ Fa namaly Jesosy aviô nivôlagna irô nagnano hoe: "Misy taranaka ratsy fagnahy ndraiky mijangajnaga mitady famantaragna. Kanaifa tsisy famantaragna amiagna izy afa-tsy famantaran'i Jaona mpaminany. ⁴⁰ Fa karaha i Jonah zay telo andra ndraiky telo aligny tao an-kibon'ny laôko maventy, ho karaha izegny koa hipitrahan'ny Zanak'Olo telo andra ndraiky telo aligny ao agnatin'ny tany. ⁴¹ Irô olon'i Ninive hitsangana miaraka amin'ity taranaka ity aviô nagnamelôko izegny. Fa nibaibaka irô tamin'ny toriten'i Jona, aviô igny fa, olo maventy noho Jona eto. ⁴² Mpanjakavavin'ny tatsimo hiaraka hitsangana amin'ndrô lelahin'ny taranaka amin'ny andran'ny fitsaragna aviô hagnamelôko izegny. Directy avy agny amin'ny faran'ny tany izy mbaika haregny fahendregnan'i Salomona, aviô igny fa, nisy olo maventy nohon'i Solomona eto. ⁴³ Izikoa fa nisy fagnahy ratsy niala tagnatin'ny lelahy araiky, mandalo tany karakaina izy aviô mitady fitsaharagna, naifa tsy mahita izegny. ⁴⁴ Izegny midika hoe: 'Hipôdy agny amin'ny tragnôko niaviako zaha.' Aviô izikoa fa navy tagny, nahita fa avoafafa tragno aviô nilamigny. ⁴⁵ Abaka aviô nandaiha izegny aviô nitôndra fagnahy ratsy fito niaraka taminany zay ratsy mihoatra izy. Kay niditry nipaitraka tao izy jiaby. Abaka aviô nahay ratsy noho'ny voalohany fiafaran'izegny lelahy izegny. Aviô ho karaha izegny koa amin'ity taranaka ratsy fagnahy ity." ⁴⁶ Izikoa mbola nivôlagna tamin'ndrô vahoaka aby iô Jesosy, igny fa, reniny ndraiky irô ralahinany aby iô nitsangana tagny ivailany, hitady hikôragana aminany. ⁴⁷ Nisy olo araiky nivôlagna taminany nagnano hoe: "Zahava, reninao ndraiky irô ralahinao mitsangana ao ivelany, mitady hikôragna aminao." ⁴⁸ Fa namaly Jesosy aviô nivôlagna tamin'olo nivôlagna Izy, "Azôvy reniko aviô azôvy irô ralahiko?" ⁴⁹ Abaka aviô nahijiny tamin'ndrô mpianatranany tagnanany aviô nivôlagna nagnano hoe: "Zahava, indreto reniko ndraiky irô ralahiko! ⁵⁰ Fa zay magnano sitrapon'ny Babako zay agny an-dagnitra, izegny olo izegny ralahiko, ndraiky anabaviko, aviô reniko."