¹ Manahaky gny ora-panala aminigny lohatao na ranon'ora aminigny tao-piziza, gny sy maha-mendri-kaza gny mola. ² Manahaky gny foly mitily vo gny sidisidiky mitily , gny sy hizosoanigny ozo sy mendriky. ³ Gny karavasy dra ho anigny sovala, gny lamboridy dra ho anigny apondra dragny sorakazo dra ho anigny lamosinigny mola. ⁴ Ka mamaly gny mola araky gny hamolany, raha sy zay dra ho afabaraka manahaky anazy hanao. ⁵ Valio gny mola dra mitoviza aminigny hamolany, dra sy ho hendry eo imasony avo izy. ⁶ Na iza na iza mandefa hafasy aminigny tananigny mola dra manapaky gny tombony avo sady mino herisetra. ⁷ Manahaky gny tomboky gny mararinigny paralysisa ze miraviravy gny ohabola ao am-bavanigny mola. ⁸ Manahaky gny mamehy vato aminigny asamotaly gny magnome voninahisy gny mola. ⁹ Manahaky gny silo ze miletiky ao atagnanigny mamo lava gny ohabolan'ao am-bavan'ireo mola. ¹⁰ Manahaky gny pandefa sipiky ze mandrasy gny maro magnodidin'anazy gny olo ze magnarama mola na magnarama ze sendra mandalo. ¹¹ Manahaky gny amboa miheri'aminigny loany, dra manahaky anizay koa gny mola ze magnery gny hadalany. ¹² Mahita olo hendry eo imasony avo ra hanao? Gny mola misy atenay kokoa noho gny aminazy. ¹³ Gny olo kamo manao anizahoky ho: "Misy liona egny an-dala! Misy liona egny akalamazana!" ¹⁴ Manahaky gny ravarava mihodin'aminigny saviliny, dra manahaky anizay koa gny olo kamo eo apandriany. ¹⁵ Gny olo kamo dra mametraky gny tagnany ao andoviany nefa sy mana hery hagnenga anizay ho ao am-bavany izy. ¹⁶ Gny olo kamo dra hendry eo imasony avo noho gny olo fito mindray aminigny faheza-magnavaky. ¹⁷ Manahaky gny mihazo gny sofonigny amboa gny pandolo ze ory aminigny fifamalia sen'azy. ¹⁸ Manahaky gny olo mitapy ze magnary zana-sipiky mirehisy, ¹⁹ gny olo ze mamitaky gny piara-belon'aminazy dra manao anizahoky ho: "Sy nivazivazy ra zaho?" ²⁰ Nohonigny sy fisianigny hita, dra maty gny afo; dra agny amize sy misy pifosa dra misahasy gny fifandrina. ²¹ Manahaky gny hary mapirehisy gny bak'afo vo gny hita aminigny afo, dra manahaky anizay koa gny olo tia aly mandrehisy fifandira. ²² Gny vatanigny pifosa dra manahaky gny hany masiro; Mizosoa ao agnatinigny farisy gny vatan'ireo. ²³ Manahaky gny akososy taim-bolafosy mandrakosy gny vilagny tany gny molosy mirehisy vo gny fo rasy. ²⁴ Ze malaiky gny hafa dra manaro gny fihetseha-pony aminigny molony dra mandrakizay fitaky ao agnatiny avo. ²⁵ Hizaka ami-pahasoava izy, saingy ka mino anazy, akory misy fahavetaveta fito ao apony. ²⁶ Na dre voasaro fitaky aza gny fakahalany, dra haharisy eo aminigny fengona gny faharasiany. ²⁷ ze rehetra mihaly lavaky gny hezera ao amizzay dra gny vato dra hikodia eo amize nandrozin'anizay. ²⁸ Gny lela mavandy dra malaiky gny olo ze torotoron'izay dra gny molosy mandoka minday faharava.