¹ Ka mialo reo ze rasy, na magniry gny hiombon'amin'ereo, ² akory miteti-drasy hanao herisetra gny fon'ereo dra mizaka fahoria gny molos'ereo. ³ Aminigny fahendrena gny agnaranigny tragno dra aminigny fahazava-say gny agnoregnan'anazy. ⁴ Aminigny fahalala gny hamenoa harena sarobily vo mahafinarisy aby reo efitrgno. ⁵ Mahery gny pialinigny fahendrena, dra gny olony gny fahalala dra mapitombo gny heriny; ⁶ fa aminigny torolala hendry gny ahafahanao mialy gny alinao dra amireo panolo-say maro gny misy fandresena. ⁷ Abo loasy ho anigny mola gny fahendrena; sy manoka-bava eo am-bavahady izy. ⁸ Misy olo mitetiky hanao rasy__ tokavinigny olo ho toponigny tetiky izy. ⁹ Gny tetiky gny mola dra fahota vo gny olo dra manao sinosino gny panirasira. ¹⁰ Raha avy maleminigny tahosy aminigny andro-pahoria hanao, dra masaiky gny herinao. ¹¹ Avoty reo ze nalaiky hovono dra arovy reo ze mivembe eo aminigny famonoa. ¹² Raha mizaka hanao ho: "Ingo, sy nahay na ino na ino momba anizay zahay", moa ra gny raiky ze mandaza gny fo sy hahatakasy ze zakanao? Gny raiky ze miamby gny ainao, moa ra izy sy mahay anizay? Moa ra Zagnahary sy magnome gny sirairay aby ze mendriky anazy? ¹³ Ry zanako, mihinana tately akory soa zay, akory mamy gny tately mitete aminigny toho-tately raha andrama. ¹⁴ Manahaky anizay gny fahendrena ho anigny fagnahinao__raha hitanao zay, dra hisy hoavy dra sy ho foana gny fanatenanao. ¹⁵ Ka magnotriky manahaky gny olo rasy fagnahy ze manafiky gny tragnonigny olo-mary. Ka mandrava gny tragnony! ¹⁶ Fa lavo ipito gny olo-mary fa tafarin'avo, fa lavo aminigny loza gny olo rasy fagnahy. ¹⁷ Ka mifaly raha lavo gny fahavalonao dra aoky sy ho ravoravo gny fonao raha tafitohy izy, ¹⁸ raha sy zay dra ho hitan'i Yaveh dra sy hakasitrahany dra halany aminazy gny fahatezerany. ¹⁹ Ka matahosy noho reo panao rasy, dra ka mialo gny rasy fagnahy, ²⁰ fa sy ba mana hoavy gny olo rasy dra gny zironigny rasy fagnahy dra ho maty. ²¹ Matahora an'i Yaveh, dra matahora gny pazaka, ry zanako; ka miombon'amireo ze mikomy amin'ereo, ²² fa ho avy tapoky gny loza ho anereo dra iza gny mahay ho hatreza gny faharava ze ho avy amin'ereo? ²³ Tahoky avo koa reo fizakanigny hendry. Sy soa fengara aminigny fisaran-draharaha aminigny lala. ²⁴ Na iza na iza mizaka aminigny rasy fagnahy ho: "Olo-mary hanao", dra ho ozognin'ireo vahoaky dra ho halan'ireo firenena. ²⁵ Nefa reo ze magnafay gny rasy fagnahy dra hahazo sitraky dra ho avy amin'ereo gny fagnomeza-soa. ²⁶ Gny olo ze mamaly ami-kisi-po dra magnoroky eo aminigny molony. ²⁷ Omano gny asanao agny ivelany, dra atovy vonona honao agny asaha gny raha aby; afaran'izay, dra amboaro gny tragnonao. ²⁸ Ka mizoro vavolombelo hanohisy gny piara-belon'aminao aminigny sy atony dra ka mamitaky aminigny moloso. ²⁹ Ka mizaka ho: "Hataoko amininazy ze fa nataony taminahy; ho valiako aminazay araky ze fa nataony." ³⁰ Nandalo tegny asahanigny olo kamo zaho, nizaka taminigny tanim-boaloboky gny olo sy mana say. ³¹ Nisiry tegny rehetr'egny gny silo; rakosy gny amiana gny tany, dra reo vatanigny manda dra rava. ³² Dra nahita zaho vo nandiniky anizay; nagnety zaho vo nahazo anasy. ³³ Hangalaky torimaso kely, faharendreha kely, toho-tagna kely ba hisahara__ ³⁴ dra ho avy hagnisaky anao gny fahatra, dra reo filanao dra hanahaky gny ,miaramila feno felia.