¹ Loza ho anize mamoro-keloky, ho anize mandrafisy gny hanao rasy eo apandriany. Aminigny maray gny anovan'ereo anizay akory mana fahefan'ereo. ² Magniry saha ereo dra giazany zay; magniry tragno ereo dra mangalaky anizay. Mapahory olo vo gny akohonany ereo, dra olo vo gny lovany. ³ Niho zay dra izao gny zakan'i Yaveh ho: "Ingo, fa minday loza hamely anizay fianakavia zay Zaho, ze sy hangalandrareo gny tendrandrareo. Sy handeha ami-piavognavogna handrareo, akory dra ho fotoa rasy zay. ⁴ Amizay andro zay dra hivety hira momba andrareo reo fahavalondrareo, dra handala aminigny hira fandala. Ereo hihira ho: 'Rava tateraky zahay Israelita; Yaveh magnova gny faritaninigny vahoako. Nagnino gny hangalany anizay aminahy? Mizara reo sakanay ho an'ireo pamadiky Izy!"' ⁵ Noho zay, handrareo ry panakarena dra sy ba hana taranaky hizara gny faritany aminigny loka ao aminigny fengonan'i Yaveh. ⁶ "Ka maminany," hoy ereo. "Aoky ereo sy haminany reo raha reo; aoky sy ho avy gny fahafam-baraka." ⁷ Ry taranak'i Jokoba, moa tokony zaka vatany ra zao ho: "Ory ra gny Fagnahin'i Yaveh? Moa tena asany ra reo?" Moa sy mapahasoa anizay mandeha mahisy ra gny zakako? ⁸ Agny afara kely dra hisanga manahaky gny fahavalo gny vahoako. Manala gny tohitegna, gny akazo, egny amize mandalo sy ami-piahia handrareo, manahaky reo miaramila mihery boak'agny agnaly ho agny amize heveriny fa mandry fahalema. ⁹ Alandrareo amireo tragno tiatiany gny apela vahoako; sitonindrareo aminigny zanak'ereo mandrakizay gny fitahiako. ¹⁰ Misangana ka mela, fa sy toera ahafahandrareo mitoby etiky, noho gny fahalotoany; nipotehy taminigny fahapoteha tateraky ty. ¹¹ Raha misy olon'avy agny amindrareo aminigny fagnahinigny favandia vo dra manao anizahoky ho: "Haminany aminao momba gny divay vo raha finomy mahery zaho," dra hahery ho paminany ho anizay vahoaky zay izy. ¹² Hamery andrareo aby vatany Zaho, ry Jakoba. Hamory gny sisa amin'Israely vatany Zaho. Hinday anereo manahaky gny agnondry ao aminigny andiany, manahaky gny agnondry maro eo agnevonigny fihinanam-bilony Zaho. Hisy feo fatrasy noho gny fahamaronigny vahoaky. ¹³ Ze olo mamaky dra manokaky gny lalan'ereo ho anereo dra handeha eo agnoloanereo. Handeha hamaky gny vavahady ereo dra hiboaky; gny pazakan'ereo gny handeha eo agnoloany. Yaveh gny ho pitariky anereo.