¹ Nizaka tamigny Mosesy i Yaveh, nanao ho: ² ''Zakao gny vahoak'Israely ho: 'Raha misy olo manota se gny misiry gny hanota, nanao ereo raha izay andidian'i Yaveh dra sy ho atao, ary raha manao raha izay voarara izy, dra sy mahisy atao itaho nagnoriky itaho. ³ Raha toa ka ny mpaisorombe vo manota dra minday fahoria eo amigny vahoaky, dra aokoa izy hagnome vatosagn'oby lahy sy misy kilema ho an'i Yaveh ho fagnatisy nohonigny ota. ⁴ Ao izy hinday agn'omby lahy eo amy filira gny tragno ao amy gny fihaogna eo anatrehan'i Yaveh, hametraky gny tagnany eo amy lohany , dra hamono gny agn'ombilahy eo anatrehan'i Yaveh. ⁵ Gny mpisoro voahososy dra hangalaky gny tavelany amy liony agn'ombilahy dra hinday anizay ho ao amy gny fihaogna. ⁶ Hagnasoboky gny tagnany ao amy lio gny mpisoro ka hamafy impito aby zay eo anatrehan'i Yaveh, eo anoloany lamba gny fitoera masy indrindra. ⁷ Laha teo gny mpisoro dra hangalaky amy lio ho eo amin'ereo tandrokiny alitarany litin-kazo magnisy eo anatrehan'i Yaveh, zay ao amy lay fihaogna, dra handraraky gny sisa aby agnabonigny liony agn'ombilahy agny amy fagnambania gny alitara filira gny fihaogna. ⁸ Hagnalaky gny sabora aby amy agn'omby atao fagnatisy noho gny ota izy;gny sabora zay mandrakoky gny farisy agnatiny, gny sabora aby ze mipitiky amy farisy agnatiny, ⁹ reo vihiny ro vo gny sabora ze ao amin'ereo, ze mariny valahiny, dra gny taliavi-agnatiny, miaraky amin'ereo vihiny-hangalaky anizay aby zay Izy. ¹⁰ Ho alany iaby zay aby zay, manahaky gny nangalany anizay taminigny agn'omby natao soro gny fagnati-pihavana .Laha teo gny mpisoro dra hagnoro reo tampany reo eo amy alitara ho fagnatisy oroha. ¹¹ Gny holisiny gny agn'ondry vo zay hena tavela, miaraky amy lohany vo reo tambony dra reo tao agnatiny vo gny zeziny, ¹² gny ambiny vatanigny agn'omby aby ho andesiny ambaliky gny toby avo koa reo ampahany reo ho agny amy toera ze fa niliovin'ereo ho anahy, zay nandrarahan'ereo lavenigny;hagnoro reo ampahany reo eo agnabony gny hita izy reo.Ao reo ampahany reo ho oroan'ereo eo aminigny nandrarahan'ereo lavenoky. ¹³ Raha manota sy sitrampo gny fiangonan'Israely aby, dra sy mahafatasy gny fingona fa nanota izy reo dra nanao ze nandraran'i Yaveh sy ho atao, dra taha hory ereo, ¹⁴ dra fa gny fatasy gny ota natan'ereo, dra ao gny fiangona hanolosy vantonagn'omby ho fagnatisy noho gny otadra hinday anizay eo anoloanigny tragno lay fihaogna. ¹⁵ Reo loholony gny fiangona dra hametraky gny tagnan'ereo eo amy lohanigny agn'omby anoloan'i Yaveh, dra ho vono eo anoloan'i Yaveh gny agn'omby lahy. ¹⁶ Gny mpisoro voahososy dra hinday sombiny amy liony agn'omby ho agny amy tragno lay fihaogna, ¹⁷ dra hagnasoboly gny tagnany ao amy lio dra hamafy anizay impito eo anoloan'i Yaveh, eo anoloan'i lamba. ¹⁸ Hagnososy kelikeliky amy lio eo amin'ereo tandroky gny alitara ze eo anoloan'i Yaveh izy, zay ao amy tragno lay fihaogna, dra handraraky gny lio aby eo amy fagnambanigny alitara ho fagnatisy oroha ,zay eo amy filira amy tragno lay fihaogna . ¹⁹ Hagnalaky gny sabora aby eo aminizay izy dra hagnoro anizay eo amy alitara. ²⁰ Tokony zay gny ataony amy agn'omby.Manahaky gny fa nataony tamy agn'omby natao fagnatisy noho gny ota, gny ho ataony amin'io agn'omby io, dra gny mpisoro dra hanao fagnavota ho agny vahoaky, ka ho voavela ereo. ²¹ Ho andesiny ambaliky gny toby gny agn'omby dra hagnoro anizay manahaky gny nagnoroany gny agn'omby ze manahaky gny nagnoroany gny agn'omby volohany izy.Zay gny fagnatisy noho gny ota ho agny fiangona. ²² Fa gny manota sy sitrsmpony gny mpazaka, amy fanova gny raiky amin'ereo raha aby ze nandidian'i Yaveh ba sy atao, la hory izy, ²³ dra hampahafatary anazy gny ota ze nataony , ao izy hinday osy, osilahy sy misy handrany ho sorony. ²⁴ Hametraky gny tagnany eo amy lohanigny osy izy dra hamono anizay eo amy toera zay namonoan'ereo gny fagnatisy oroha eo anoloan'i Yaveh.Fagnatisy noho gny ota zay. ²⁵ Gny mpisoro dra hangalaky gny liony fagnatisy noho gny ota amy tagnany dra hametraky anizay eo amin'ereo tandroky gny alitara ho fagnatisy oroha, dra handraraky gny liony eo amy fagnambania gny alitara gny fagnatisy oroha. ²⁶ Ho oroany eo amy alitara gny sabora aby, manahaky gny sabora tamy sorony fagnati-pihavana.Gny mpisoro dra hanao fagnavota ho agny mpazaka mahakasiky gny otany,dra ho voavela gny mpazaka. ²⁷ Raha misy raiky amin'ereo sarambabem-bohoaky manota sy sitrampo,amy fanova reo raha nandidian'iYaveh anazy reo sy ho atao, ²⁸ dra ho ampahafatary anazy gny ota ze nataony, dra hinday osy raiky,osivavy sy misy handrany ho sorony izy, ho agny ota zay nataony. ²⁹ Hametraky gny tagnany eo amy lohany gny fagnatisy noho gny ota izy dra hamono gny fagnatisy noho gny ota eo amy toerany gny fagnatisy oroa. ³⁰ Gny mpisoro dra handramby gny tavelany amy lio amy tagnany dra hametraky anizay eo amy tandroky gny alitara ho fagnatisy oroa.Handraraky gny ambiny gny lio aby eo amy fagnambany gny alitara izy. ³¹ Hangalaky gny sabora aby izy, manahaky gny nangala gny sabora tamy soro gny fagnati-pihavana.Ho oroa gny mpisoro eo amy alitara zay ba hamoaky fofo magnisy ho an'i Yaveh.Hanao fagnavota ho an'olo gny mpisoro , dra ho voavela izy. ³² Raha minday zanakagn'ondry ho ataony soro ho fagnatisy noho gny ota gny lelahy, dra hinday agn'ondry vavy sy misy handrany izy. ³³ Hametraky gny tagnany eo amy lohanigny fagnatisy noho gny ota izy dra hamono zay ho fagnatisy noho gny ota eo amy toera zay hamonon'ereo gny fagnatisy oroa. ³⁴ Gny mpisoro dra hangalaky gny tavelany amy gny liony fagnatisy noho gny ota amy rasa-tagnany dra hametraky anizay eo amin'ereo tandrokygny alitara ho fagnatisy oroa,dra ho ararany eo amy fagnambany gny alitara avo koa gny liony. ³⁵ Hangalaky gny sabora aby izy,manahaky gny nangala gny saborany gny zanakagn'ondry tamy soro gny fagnati-pihavana, dra ho oroa gny mpisoro eo amy alitara eo agnabonigny fagnatisin'i Yaveh natao tamy afo zay.Hanao fagnavota ho anazy gny mpisoro noho gny ota zay nataony, dra ho hangany gny lelahy.