¹ Dra namaly i Joba dra nizaka ho: ² " Tenoy soa gny zakako, dra angao ho fankahereza omendrareo anahy zay. ³ Mahareta aminahy, fa hizaka avo koa zaho; afaran'gny zakako, dra manesoa hatragny. ⁴ No gny aminahy, amin'gny olo raiky se gny fitarainako? Nanao akory zaho gny sy tokony sy hanam-pahareta? ⁵ Atio zaho dra ao ho talanzona, dra apetraho eo amin'gny vavandrareo gny tagnandrareo. ⁶ No fa mamesivesy reo fizaliako zaho, dra mihorohoro, sady tora-kovisy gny vatako. ⁷ Nagnino gny olo rasy fagnahy gny bo miay, trasy antisy, vo mitombo hery amin'gny fahefa? ⁸ Miory mindray aminazy eo amason'ereo gny taranany, vo reo zanany dra miory eo amason'ereo. ⁹ Gny tragnon'ereo dra lavisy gny tahosy; sady sy amin'ereo eo gny zeran'Agnahary. ¹⁰ Mapagnaraky gny agnombilahiny ereo; vo dra mahavagno; gny agnomby vavin'ereo dra miteraky sady sy mamosotry gny zanany sy apy vola. ¹¹ Mampiboaky reo zanany manahaky gny agnondry vo osy ereo, dra mandihy reo zanany. ¹² Miansa amin'gny apongatapaky vo lokanga ereo sady mifaly mindray amin'gny feon-sodina. ¹³ Miay gny androny amin'gny fa ereo, vo mizoso moramora ho agny amin'gny fiaigna-sy hita. ¹⁴ Ho ereo amin'Agnahary ho: 'Miala aminay fa sy magniry gny hahay gny lalanao zahay. ¹⁵ Ino moa gny Tsitoha, gny tokony hanopo Anazy zahay? Ino gny tombosoa azonay no mivavaky aminazy zahay?' ¹⁶ Ingo, moa se sy eo an-tagnan'ereo avo gny fagnazarian'ereo? Sy misy hirarahiako gny toro-hevisy gny olo rasy fagnahy. ¹⁷ Impiry maty gny ziron'gny olo rasy fagnahy, na avy eo aminazy gny lozan'ereo? Impiry gny mizara alahelo amin'ereo amin'gny fahoriany Zagnahary? ¹⁸ Impiry ereo gny avy manaheky gny mololo andesin'gny sioky na manahaky gny aloky tafio-drivosy? ¹⁹ Ho andrareo ho: ' Zagnahary mihaza gny helony bo havahin'ireo zanany.' Angao gny vatany avo gny hagnavaky zay, bo hahafatarany gny helony. ²⁰ Angao gny masony hahita gny faharavany, vo angao izy hino gny fahorian'gny Tsitoha. ²¹ Akory ino gny hirarahiany gny mahakasiky reo taranany mandimby anazy no fa tapaky gny isan'ireo volany? ²² Moa se misy olo afaky mapianasy fahalala an'Agnahary akory ndre dra ereo ze ambony aza dra Izy gny misara? ²³ Gny olo raiky dra maty ao agnatin'gny heriny feno, tony tateraky sady miada. ²⁴ Feno ronono gny vatany, vo gny nisikin'gny tolany dra mando sady salama soa. ²⁵ Misy olo raiky hafa maty ao agnatin'gny faitrin'gny fagnahy, olo ze sy bo niay raha soa. ²⁶ Samby mandry agnaty vovoky ereo; vo manafosy gny vatan'ereo ro reo kankana. ²⁷ Ingo, fatako gny vesivesindrareo, vo reo fomba zay irindrareo bo handiasoa anahy. ²⁸ Fa ho andrareo ho: ' Eza zao gny tragnon'andriandahy? Eza gny lay zay nonenan'gny rasy fagnahy taloha?" ²⁹ Sy bo nagnotany gny olo pandeha lavisy mihisy se andrareo? Sy fatandrareo se gny porofo azon'ereo zakay, ³⁰ fa voaaro amin'gny andron'gny loza reo rasy fagnahy, vo havio lavisy gny andron'gny fahoria izy? ³¹ Ia gny hagnasiaky gny fomban'gny rasy fagnahy eo anatrehany? Ia gny hagnavaky anazy amin'gny raha vitany? ³² Fe mbo ho lanzay ho an-dolo agny izy; reo olo ddra hiamby gny lolony. ³³ Ho mamy aminazy gny baingan-dohasaha; hagnaraky anazy boakao afara gny olo aby, manahaky gny nandehanan'ireo olo maro sy voaisaky teo alohany. ³⁴ Nanao akory dra andrareo gny napiono anahy amin'gny raa sy misy dikany, akory ao amin'ireo valitenindrareo dra sy misy afa-sy vandy avo?"