¹ Fitalilia mahakasiky an'i Babylona, zay azon'Isaia zanadahin'i Amoza: ² Manangana fagneva agny antezovohisy mangalihaly, mikoiha fatrasy amin'ereo, ahofahofay amin'ereo gny tagna ndrareo so hilirany amin'gny vavahadin'ereo mana-kaza. ³ Fa nandidy reo masoko zaho, eka fa nitoka reo lelahy maheriko ba hagnatateraky gny fahoriako, aka ndre dra reo mibitaky am-pirengirengea aza. ⁴ Gny horakoraky gny maro an'isa agny an-tezovohisy, dra manahaky gny vahoaky maro be! Gny tabataban'gny fazaka manahaky reo firene maro tafaharo! Yaveh tompn'gny maro gny napahery gny tafiky amin'gny aly. ⁵ Avy agny amin'gny firene lavisy ereo, avy agny ami'gny faratapon'gny lagnisy. Yaveh vo reo fitova fisarany zay, ba handrava gny tany manotolo. ⁶ Midradradradra, fa atomosy gny andron'i Yaveh, ho avy mindray amin'gny fahapoteha avy amin'gny Tsitoha zay. ⁷ Noho zay dra hiraviravy gny tagnan'aby vo hivalaketraky gny fo aby. ⁸ Hihorohoro ero; ho azon'gny fahararia vo fagnirifiria ereo, manahaky gny apela miteraky. Samby ho lasa amin'ereo samby ereo ereo, sady hirehisy gny tarehiny. ⁹ Ingo, avy amin'gny fahavignira lozabe vo fahoria manafosy gny andron'i Yaveh, ba hahaavy gnyt tany ho lao vo hamotiky reo panota ao amin'zeho. ¹⁰ Reo kitan'gny lagnisy vo reo telo noho refy dra sy hagnome gny hazava. Gny masoandro dra ho mezy ami'gny fiposahany, sady sy hamirasy gny vola. ¹¹ Hagnasazy zao totolo zao nohon'gny faharasia vo reo rasy fagnahy nohon'gny helok'ereo zaho. Hapisahasy gny fiavognavon'gny pirengirengy vo hapizesy gny fiavognavon'gny masiaky Zaho. ¹² Hahiko keliky noho gny volamena voalio gny olo vo gny olombelo ho sarosy taliavy noho gny volamena sy mifangaron'i Ofira. ¹³ oho zay dra hahiko mihovisovisy amin'gny alalan'i Yaveh Tompon'gny lako, vo amin'gny androm-pahoriany lahibe gny lagnisy, vo hataoko miozongozo eo amin'gny toerany gny tany. ¹⁴ Manahaky gny gazela voahaza na manahaky gny agnondry sy misy piaraky, gny hiheregnan'gny olo kiraidraiky tamin'gny vahoakiny vo hilefany agny amin'gny taniny. ¹⁵ Ze hita aby dra ho faty aby , vo ze trasy aby dra ho fatin'gny mesabe. ¹⁶ Gny zaza madinik'ereo dra hotorotorogny amasony eo. Gny tragnon'ereo dra ho babaoy vo gny valiny ho voasaviky. ¹⁷ Ingo, maporisiky reo Mediana ba hanafiky an'ereo Zaho, zay sy ho voakasiky gny volafosy, na hakamamy gny volamena. ¹⁸ Gny sipikin'ereo handefo gny zatovony. Sy hana atra amin'gny zaza sady sy hamindra fo amin'gny zaza ereo. ¹⁹ Vo Babylona, gny mendri-pidera vatany amin'gny fazaka, gny famirapiratan'gny reharehan'gny Kaldeana, dra horava manahaky an'i Sodoma vo Gomora. ²⁰ Sy honegna na hitoboha zay hatramin'gny taranaky faramandimby. Sy hisy Arabo hagnorin-day agny, na hisy piaraky agnondry hapandry gny agnondriny agny. ²¹ Fa reo bibidian'gny efisy gny hitoby agny. Ho feno vorondolo gny tragnon'ereo, vo ostrisa vo osilahy gny hifafihavaza ao. ²² Hiero agnaty ferovany ao gny kary, vo gny amboahaolo ao ami'ireo toera soasoa. Atomosy gny fotoany, vo sy tara gny androny.