¹ Hisy solofony hisimoky avy amin'gny fotos'i Jese, vo hisy rasana avy amin'gny fakany hinday tegnany. ² Hitoby aminazy ao gny Fagnahin'i Yaveh, gny fagnahin'gny fahendre vo fahazava say, gny fagnahin'gny fapianara vo hery, gny fagnahin'gny fahalala vo tahosy an'i Yaveh. ³ Gny sitrany gny ho tahosy gny tompo, sy ho saray amin'ze hitany maso izy, na hanapa-kevisy amin' ze ren'gny sofiny. ⁴ Fa kosa, hisara gny mizaly amin'gny fahamarigna izy sady hanapa-kevisy ar-drariny amin'gny pagbetry tegnan'gny tany. Hamely tany amin'gny sorakazon'gny vavany izy, vo hamono gny rasy fagnahy tamin'gny fofon'ain'gny molony. ⁵ Gny fahamarigna gny ho fehi-trokin'gny andilany, vo fahatokia gny fehi-troky mihodidy gny valahany. ⁶ Gny amboadia dra hindray hiay amin'gny zanak'agnondry, vo gny leoparda hindray mandry amin'gny zanak'osy, gny zanak'agnomby, gny liona tanora vo gny zanak'agnomby mifahy. ⁷ gny agnomby vavy vo gny bera dra hindray hiroaky,dra zanak'ereo hindray mandry. Gny liona dra hihina mololo manahaky gny agnomby. ⁸ Hihisa eo andavaky gny menarana gny zaza,vo gny zaza nisara-nono hanoby gny vatany eo andavaky gny bibilava. ⁹ Sy handrasy na handrava egny amin'gny tezovohisy masy aby ereo; akory ho feno fahalala an'i yaveh gny tany, manahaky gny rano mandrakosy gny ranomasy. ¹⁰ Amin'zeho andro zeho, dra hisanga manahaky gny fagneva ho an'gny vahoaky gny fotos'i Jese. Hitalia an'ereo firene vo ho be voninahisy gny toera fisaharany. ¹¹ Amin'zay andro zay,dra hagnasarosy gny tagnany ndraiky gny Tompo ba hagnery reo sisa tavela amin'gny vahoakiny zay mitoby agny Asyria, Egypta, Patrosa, Kosa, Elama, Sinara, Hamata, vo reo nosin'gny ranomasy. ¹² Hanoby fagneva ho an'ireo firene izy vo hagnango reo voaroakin'Israely vo reo voaelin'i Joda avy agny ami'gny vazatany efasy. ¹³ Hamalosy gny fialognan'i Efraima Izy, sady ho fongora gny fandrafian'in Joda. Sy hialo an'i Joda gny Efraima, vo Joda sy handrafy an'i Efraima sasy. ¹⁴ Fa hizoro hanafiky amin'gny Filistiana agny avarasy koa ereo, vo hindray hagnababo gny vahoaky agny asignana. Hanafiky an'i Moaba ereo, vo hakato an'ereo gny vahoakin'i Amona. ¹⁵ Hamotiky taterakygny sakeli-dranomasin'i egypta i yaveh. Mindray amin'gny rivosy mahama dra hagnefoefo gny tagnany eo amin'gny ony Eofrata izy vo hagnasaraky anazy ho sapa fito, dra ho afaky hisaky mindray amin'gny kapa zay. ¹⁶ Hisy lalam-be ho an'gny sisa amin'gny vahoaky ze mihery avy agny Asyria, manahaky gny nisian'zay ho an'Israely tamin'gny niakaran'ereo avy agny amin'gny tany Egypta.