¹ Fa gny atisy Davida dra mariny hofara gny andro iaignany, dra nataony mpazaka hanapaky an'Israely i Solomona zanadahiny. ² Nahorony niaraky reo mpitariky gny Israely aby, niaraky tamin'ereo mpisoro vo reo Levita. ³ Reo Levita telopolo tao gny ho mihoasy gny nisay. Niisa valo arivo vo telo aly ozy reo. ⁴ ''Amin'ereo, dra efasy arivo vo ro aly gny niandraikisy gny asa tao an-tragnon'i Yaveh, dra enina arivo reo manam-boninahisy vo mpitsara. ⁵ Efasy arivo gny mpiamby fefy, dra efasy arivo gny mpidera an'i Yaveh miaraky amy fitova ze namboariko ho fagnomeza fidera,''Hoy Davida. ⁶ Nizarany ho vondro zay mifagnaraky amin'ereo zanadahin'i Levy izy reo:Gersona, Kahata, dra Merary. ⁷ Laha tamin'ereo foko taranak'i Gersona , gny nisy an'i Ladana vo Simey. ⁸ Telo gny zanadahin'i Ladana:Jehiela gny mpitariky, Zetama, dra Joela. ⁹ Telo gny zanadahin'i Simey:Selomota, Haziela, dra Harana. Reo gny mpitariky reo fokon'i Ladana. ¹⁰ Efasy gny zanadahin'i Simey:Jahata, Ziza, Jeosy, dra Beria. ¹¹ Jahata gny zokiny indrindra, dra Ziza gny faharo, fa Jeosy vo Beria koa sy ba nana zandahy maro, ka dra natao ho foko raiky mitovy asa ereo. ¹² Efasy gny zanadahin'i Kehata:Amrama, Jizara, Hebrona,dra Oziela. ¹³ Tahoky avy gny zanadahin'i Amrama:Arona vo i Mosesy.Voasafily ho mpanoka reo raha-masy indrindra i Arona, ka izy vo reo taranany gny hanolosy gny litin-kazo magnisy eo anatrehan'i Yaveh, hanompo anazy dra hagnome sandrano amy agnarany mandrakizay. ¹⁴ Fa raha gny amin'i Mosesy gny lelahin'Agnahary koa, dra natao ho Levita reo zanadahiny. ¹⁵ Reo zanadahin'i Mosesy dra i Gersona vo Eliezara. ¹⁶ Gny taranak'i Gersona dra i Seboela gny zokiny indrindra. ¹⁷ Gny taranak'i Eliezara dra i Rehabia. Sy nana-zanadahy hafa i Eliezera, Kanefa Rehabia dra nana taranaky maro. ¹⁸ Gny zanadahin'i Jizara dra i Selomita gny mpitariky. ¹⁹ Gny taranak'i Hebrona dra i Jeria, zokiny insdrindra, Amariagny faharo, Jahaziela gny fahatelo, dra Jekameama gny fahefasy. ²⁰ Reo zanadahin'i Oziela dra i Mika zokiny indrindra, dra Isaih gny faharo. ²¹ Reo zanadahin'i Merary dra i Maly vo Mosy. Reo zanadahin'i Maly dra i Eleazara vo Kisy. ²² Maty sy ba nitera-dahy i Eleazara. Zanakapelany avo koa gny nanagnany . Reo zanadahin'i Kisy dra nanambaly anazy reo. ²³ Reo zanak'i Mosy telo lahy dra i Maly, Edera, dra Jeremota. ²⁴ Reo gny taranak'i Levy araky gny fokon'ereo. Izy reo gny mpitaroky , voaiky dra voahiaky araky gny agnarany foko ze nanao gny fanompoa tao an-tragnon'i Yaveh, manomboky eo amy ropolo tao gny ho miakasy. ²⁵ Fa hoy Davida ho:''Yaveh, Zagnaharin'Israely, dra fa nagnome Fisahara ho agny olony. Nataony ao Jerosalema mandrakizay gny tragnony. ²⁶ Sy hinday gny tabernakely vo reo fitova fampiasa amy fanompoa aby sasy reo Levita.'' ²⁷ Fa tamy alalany zakan'i Davida farany gny nagnisa reo Levita , ropolo tao gny ho miakasy . ²⁸ Gny raharahan'ereo dra magnatriky reo taranak'i Arona amy asa ao an-tragnon'i Yaveh .Izy reo dra mikarakara reo kiaza, reo efitragno, gny fomba fagnaliova reo raha aby ze an'i Yaveh, dra gny asa fanompoa hafa aoa an-tragnpn'Agnahary. ²⁹ Izy reo avo koa gny mikarakara gny mofony fanatreha , gny koba soa lisa ho vary fagnatisy, gny mofo matify sy misy masirasira, fagnatisy voahendy, fagnatisy mifangaro dililo, dra gny famarana gny hamaroa vo habe-draha aby. ³⁰ Nisanga isa-maray avo koa izy reo ba hisaosy vo hidera an'i Yaveh. Nataon'ereo avo koa zay gny hariva ³¹ dra na ombia na ombia gny magnatisy fagnatisy oroa ho an'i Yaveh, na amy Sabata na amy fankalaza gny voloham-bola vo amy andro fanasa.Gny isa raikisy , zay voatendry didy, dra sy maisy aseho eo anatrehan'i Yaveh mandrakariva. ³² Izy reo gny nisahana gny tragno lay fihaogna, gny toera masy , dra nagnampy reo taranak'i Arona naman'ereo tamy fanpmpoan tao an-tragnon'i Yaveh.