¹ Afarisi, noamweni anyori, angaaguma kubva Djerusarema, akaungana pamwepo naye. ² Paakaona kuti amweni afundi eindiya mukate asikazi kukarawa nyara. ³ ( Afarisi, na ese madjuda, aidha kuremekedza maitiro okare, nokuti akasanatsa kukarawa angaasikandyi ⁴ Paku wirira kufamba, akasa karawa nyara andyi; nozvimweni zvaidhikana kutchengetwa, ingana kusuka ndiko, nozvokukandira zviro noiymweniwo midzio yosimbi). ⁵ Kuzobvepo afarisi na anyori akazomubvudzisa: Ngei afundi ako haana maitiro etchinyakare anondiya mikate asingazi kukarawa nyara? ⁶ Iyena wakadhaira: Zvanga zvakaporofitwa na Isaiya nokudha kwenyu, anhu asikazi kururama! Zvakanyorwa: Anhu anondi namata nomiromo yawo, asi moyo yawo iri kure nainini. ⁷ Aona, anondi pasa nhima zvenhando, eifundisa zvomitemo yotchianhu. ⁸ Imwimwi murikusiya mitemo yaMwari motchiita zvetchi anhu. ⁹ Etchiati: Murukusia sure mitemo yaMwari motchiita zwenyu zwopasi tchigare; ¹⁰ Nokuti Mozesi wakareketa: kudza bhabha wako namai wako. Uye unotuka bhabha namai anodhikana kufa. ¹¹ Uye munoti: Munhu angati kubhabha namai: Tchese tchaunga kwanisa kuona kwandiri ndi Koriiba (itchi ndi tchipo): ¹² Ngokudharo musaasie otchiita tchiro kubhabha namai. ¹³ Maitiro enyuo anopfudza soko raMwari, zwamakaabvunza; motchiita zviro zwakawanda zvakaezana noizwi. ¹⁴ Hino wakadhaidza anhu kuti auye kwaangari, etchiati: Ndipurutanei motchizvi bhata: ¹⁵ Tchese tchinopinda nopamuromo omunhu atchiswipisi; asi zvinobhudha maari, izvi ndizvo zvinoswipisa munhu. ^{16 17} Djesu paakasiya ujinji akapinda mumba, afundi ake akamubvunzisa ngondawa ye muezaniso. ¹⁸ Djesu wakaati: Naimwimwiwo amuzii kuzwibhata? Amuzvizi kuti zvese zvinobhuda nokunza komuiri womunhu azvimuswipisi? ¹⁹ Ngokuti azvipindi mumoyo make, asi zvinopinda mundani zvozobhudhazwe kunza. (nomarekerere aya wakatchenesa zwokundiya zwese). ²⁰ Waiti: zvinobva kumunhu ndizvo zvinoswipisa munhu. ²¹ Ngozvomukati momoyo womunhu ndimo munobhudha mirangariro yakashata, zvitema zvomumaponde, kubha, ubinya, kuhura, ²² kudha zwakashata, kushata myoyo, utsotsi, kushaiwa nhima, kuringira kwakashata, kushoropodza, kuzvikudza, kusabvunzwa. ²³ Ushaishi uhu unobva ngomukati momunhu uye ndizvo zvinoswipisa munhu. ²⁴ Djesu akabhudhepo wakaenda kumutandha we Tiro. Djesu wakapinda mumba imweni, anga asikadhi kuti anhu azviziye uye azvizii kuzoita kuti afindare. ²⁵ Tchiriporipotcho mwanakadzi, wanga anotchimwana sikana tchake tchanga tchino mweya yotswina, apo paakazwa ngozwaDjesu, Wakauya wakamugodhamira mutsoka. ²⁶ Mwanakadzi iyena wanga ari muGirigi mubharwa womutandha waizwi Sirofinisia; waimukumbira kuti adzingire mweya yotswina kumukore wake. ²⁷ Asi Djesu wakati: siyai kutanga ana agute; ngokuti azvizii kunaka kutora mukate yowana kukhandirira zvituha. ²⁸ Hino mwanakadzi akazoti: Zvirokwazvo Ishe; asi zvituha zvinondiyawo matsarirwa anodhonha pasi pothafura yoana adhoko. ²⁹ Kuzobvepo wakamudhaira eiti: nosoko irona, weienda hako, mweya wotswina wabhudha pamukorore wako. ³⁰ Paakazoguma kumba, wakagumira mweya yotswina yabhudha,uye mwana wangaakawata pamubede. ³¹ Djesu wakazobhudha pamutandha weTiro wakapinda ngo Sidomu woienda bhahari reGarireia etchipinda ngopakati pomutandha weDekaporisi ³² Akamunzira ngutwi yanga isingareketi, uye aimukumbira kuti amutsanzike moko apore. ³³ Uye akatarauka naye panga pane ajinji, wakakanda zvikunwe munzé dzake, wakapfira, wakamutswasa ririme rake. ³⁴ Kuzobvepo Djesu wakamutsa musoro wakanangisa mudhenga, ofema, ozoti: Efata, ( funguka). ³⁵ Nzé dzake dzakafunguka, tchiriporipotcho tchaimubhata ririme tchakadhambuka, wakatanga kureketa zvakanaka. ³⁶ Djesu akamuti usabvudze munhu; panguwa yaimurambidza waibhamba kuzvifararisa kuna anhu. ³⁷ Aishamiswa zvikuro nazwo etchiti: Zvese zvaanoita zvakanaka! yena unoita ngutwi dzizwe, uye zvimumu zvirekete.