¹ Tamin'izany andro zany, i Heroda mpanjaka nisambotry gne sasany tao amè fengona mba afahany mikobioky andreo. ² Tamin'izany da novonihiny tamè sabatry i Jakôba rahalahan'i Jaona. ³ Raha hitany fa nahafaly gne Jiosy izany da nagnano izay hisambora an'i Petera koa izy. Nandritry gne fankalazà gne andron'gne mofo tsy mavaivay izany. ⁴ Raha avy nosambory izy da nogadràny tamè tragno figadrà sady nanondro miaramila efatry toko izy hiamby anazy sady naminavina gne hitondra anazy eo akatrefan'gne olo maro raha vita gne Paska. ⁵ Noho izany da nigadra tao eky i Petera, fa namboarin'gne mpivavaky nagnolaly gne vavaky tamin' Andriamanitry ho anazy tao amè fengona. ⁶ Gne harivan'ny gne hindesan'i Heroda anazy hotsaray, natory teo agnelagnelan'gne miaramila roy lahy i Petera sady nifehy rozy vy raha mbola niamby gne tragno figadrà gne mpiamby. ⁷ Tamin'zany, io fa nisy anjelin'i Tompo nibôky nalàky teo agnilany sady nisy hazavà namirapiratry tamè tragno figadrà. Nomeny takapoky teo amè tarehiny ilany i Petera ka namoha anazy izany sada hoy izy hoe: "Mitsangàna malàky anao," niaraky tamin'izay gne rojo vy tamè tagnany da tataky. ⁸ Da hoy gne anjely taminazy hoe: "Misikina akanjo anao sady magnamboara kiraro." Tsy nisalasala i Petera fa avy da nagnano. Da mbola hoy ity anjely taminazy farany: "Hisikino gne akanjonao ambony sady magnaraha anà." ⁹ Lasa nagnaraky an'igny anjely igny i Petera sady nijotso. Kaiky tsy fantatriny fa raha gne raha namboarin'igny anjely teo igny da tena izy. Nihevitry izy fa nahita fahagagà. ¹⁰ Raha avy nandalo tamè mpiamby vôlohany sy faharoa indreo da avy teo amè vavahady vy izy lalagny mandeha amè tanà; da nidagnadagna hoazy tamindreo io varangara vy io. Da lasa nijotso indreo ka nandeha nagnaraky lala raiky nefa igny anjely igny tsy hitany satria lasa tampoky avy teo. ¹¹ Raha nipody gne sain'i Petera da nizàka izy hoe: "Am'zao andro hizakako zao da fantatriko tokôtry fa gne Tompo gne nandefa an'igny anjely igny sady hagnafaky anà amin'i Heroda sy tamè raha maro be nodiasan'gne Jiosy ho ataondreo amnà. ¹² Fa raha tsapany izany da raoky izy nandeha andragnon'i Maria, endrin'i Jaona, hangia amè agnara hoe Marka, izay nisy olo maro nivorovoro sady nivavaky tao. ¹³ Raha nipaipaiky tamè vavahady izy, nisy viavy raiky mpiasa tao hangiandreo hoe Roda namaly. ¹⁴ Raha fantatriny gne feon'i Petera da faly lôtry izy ka tsy nahavita namoha gne varangara fa lasa nandeha nigodogodoky an-dragno nizàka fa i Petera andra ao amè varangara mitsanga. ¹⁵ Nizàka taminazy gn'olo tao hoe: "Mola anao 'ty sarô." Fa izy da nihijingijigny fa izy ignao ekè. Nizàka indreo hoe: "Gn'anjeliny evao izany." ¹⁶ Fa i Petera koa sa da nanoy nandondogny evao tatoa, ary raha nosokafandreo gne varangara da nahita anazy indreo sady gaga. ¹⁷ Nagnetsiky gne tagnany tamindreo i Petera mba tsy aresaky indreo ary nambarany tamindreo gne fomba nitondran'i gne anjely anazy nijotso gne tragno figadrà. Hoy izy tamindreo hoe: "Ambarainareo amin'i Jakôba sy gne rahalàny izany." Raha vita izany da lasa nandeha tamè tany hafa koa izy. ¹⁸ Raha nazava gn'andro da mizy gne fòn'ireo miaramila niamby teo nahita gne raha niseho tamin'i Petera. ¹⁹ Raha avy nitadia anazy i Heroda kanefa tsy nahita da nagnano akety gne mpiamby teo izy sady nibaiko amè fanapaha gne lohandreo. Da nidigny avy agny Jodia ho agny Kaisaria izy sady nidoboky tagny. ²⁰ Fa i Heroda da vignitry mafy tamè vahôkan'i Tyra sy Sidona. Niaraky nandeha tagny indreo. Noresendreo lahatry i Blasto, mpiasan'i gne mpanjaka mba hagnampy andreo. Sady nangataky fihavàna indreo satria gne tanàndreo da mandray sakafo fagnampia avy amè mpanjakan'ny gne tanà. ²¹ Tamè andro voatondro, i Heroda, nisiky akajon'ny gne mpanjaka sady nipetraky teo amè seza fiandriana ary nikabaro tamindreo teo izy. ²² Nikoiky mafy gne vahôka: "Feon'gne Andriamanitra izany fa tsy feon'olo!" ²³ Tselatsela teo da nisy anjelin'i Tompo namaly anazy; satria tsy nagnome voninahitry ho an'Andriamanitra izy da nohanin'gne aka izy sady maty. ²⁴ Fa gne zakan'gne Andriamanitra da mitombo sady nihamaro. ²⁵ Raha vitan'i Barnabasy sy Saoly gne iraky nampagnamboary andreo da nipody avy tagny [gne sasany aminio dika soratry taloha be mizaka hoe: "Indreo da nipody tagny Jerosalema] Jerosalema indreo sady nitondra an'i Jaona niaraky tamindreo nody, na igny angiandreo hoe Marka igny.