¹ Satria nohamarinegne tamy ty finoagne tika, le managne fiadanagne mindre amin'Andrianagnahare boake amy i Andriantompotika Jesosy Kristy. ² Boake amae avao ka zao ro hananan-tika lalagne amy ty finoagne mandeha amy ty fitahiantsoa itokisagne amean'Andrianagnahare anay amy ty ho avi'ay zahay, fitokisagne hozarantika amy ty vononahin'Andrianagnahare. ³ Tsy zay avao, fa tika ka mifaoe amy ty hasosorantika fantatika fa te ty hasosoragne ro mamokatse faharetagne. ⁴ Miterake fihasiagne ty faharetagne, le tsy fihasiagne miterake fitokisagne amy ty hoavy. ⁵ I toky zay le tsy hampitamà raha tsy misy. Satria fa nambolegne an'arofontika ao tamy ty hery ty Fagnahy Masigne ty fitean'Andrianagnahare, zay nameagne antika. ⁶ Fa naho mbe naleme tikagne, le nimate tamy ty fotoagne hoe ty raty fagnahe ty Kristy. ⁷ Fa sarotse hoe ty ndaty raike ty ho mate hoe ty ndaty maregne. Fie, vae misy ndaty mahafoe ty fiai'e hoe ty ndaty soa. ⁸ Fa Andrianagnahare nagnome ty fitiavae manokagne antika, satria naho mbe nanan-kakeo ntika, le ho mate hoantika ty Kristy. ⁹ Mihoatse izay aza, ty amizao, naho fa nihamarinegne tamy ty lio'e ntika, le hoavotse amy ty havigniran'Andrianagnahare. ¹⁰ Naho mbe, nifandrafe ntika, le niheregne nilongo amin'Andrianagnahasre tamy ty nahavilasia ty Anae, le mbe mihoatse zay aza, naho fa nampilongoegne, le ho avotse amy ty fiaie ntika. ¹¹ Tsy zay avao, fa ntika ka le mifale aman'Agnahare ao noho i Andirantompo Jesosy Kristy, ty nahazoantika ty filongoagne ami o henane zao. ¹² Naho zay, manahake ty nidira ty hakeo amy ty ndaty raike ambone ty tane toy, le hoe zay ka ty nidira ty fahafatesagne naho ty hakeo. Le ty havilasy nahazo ze fa kila ondaty, satria sambe nanan-kakeo aby tika. ¹³ Amparae ty nisia ty lily, naneran-tane ty hakeo, fie tsy misy ty isake o hakeo naho tsy misy ty lily. ¹⁴ Fie ndre zay, ty havilasy le fa nisy ty havilasy fa nanomboke tamy i Adama hatramy i Mosesy, ndre tamy iareo tsy nanan-kakeo nanahake ty tsy fagnoriha i Adama anatse ka, izay alokalofe ty raha hoavy. ¹⁵ Ndre teo zay, ty fagnomezagne tsy hadisoagne. Fa naho boake amy ty hadisoa ty raike ro hahafate ty maro, le mihoatse lavitse ty natà ty fitahian'Agnahare naho ty fagnomezagne boake amy ndaty raikey, Jesosy Kristy, natolotse aby hoe ty maro. ¹⁶ Ty fagnomezagne tsy manahake ty famoa boake amy ty tsy vokatse. Fa amy ty ankolafie raike, le hoavy ty fitsaragne hanomeagne tsiny ty ndaty raike. Amy ty ankolafie raike hafa, ty fagnomezagne tampetse amy ty fanamarenagne le avy amy ty fahadisoa ty maro. ¹⁷ Fa naho, boake amy ty fahadisoa ty ndaty raike, ro hahavanogne ty fahafatesagne amy ty raike, le mihoatse lavitse zay ka ty hiaviae ze mandrae ty hasoa bey naho ty fagnomezagne ty hato amy ty fiay i raikey, Le i Jesosy Kristy. ¹⁸ Naho zay le, satria boake amy ty tsy mete atà ty raike ro maha-avy ty ndaty ho melohegne, le boake amy ty asa ty maregne raike avao ka ro hiavia ty maregne amy ty fiay ty ndaty abike. ¹⁹ Satria boake amy ty fihasiagne ty ndaty raike ro maha avy ty ndaty maro ho maregne. ²⁰ Fa niavy tamizay ty lily, mba ho bey ty fahadisoagne. Fie naho mihabey ty hakeo, le nihabey ka ty fitahiagne soa. ²¹ Nisy zay mba, hanahake ty nanjakà ty hakeo tamy ty fahafatesagne, le hoe zay ka ro hanjaka ty fitahiantsoa boake amy ty hafamaregnagne ho amy ty havelomagne hatram-parae boake amy i Jesosy Kristy Andriantompontika.