¹ Le itikagne matanjake toko'e handefetse ami'ty falemea'iareo maleme, naho tsy toko'e hanao ty hahafinaritse ty vatan'tika. ² Ndao ty kiraike aman-tika mba hanao ty mahafalefale ty mpiara-belogn'ama'e fa izay ty soa, mba hanandratagn'aze. ³ Fa ndra i Kristy tsy nanao ty nahafinaritse ty vatae. Fe ie, manahak'izay ty voasoratse te ie: ''Nitonta Amako atoy ty fandatsa'iareo iareo mandatsa azo'o.'' ⁴ Fa ndra inogne ndra inogne ty voasoratse t'aloha tagne le voasoratse ho fampianaragne antika, mba ho ami'ty alala ty faharetagne naho ami'ty alala ty fampahereza 'ty Soratse Masigne ro hanagnan-tikagne toky. ⁵ Le mba ty Andrianagnahare ty faharetagne naho fampaherezagne ro hagnomey fieretseretagne mitovy ho'ey ty kiraidraike hoe ty Kristy Jesosy. ⁶ Ireke anio hanao izay mba ho ami'ty fieretseretagne raike naho ami'ty vava raike avao ro hidera'areo an'Andrianagnahare naho ty Rae'ty Andriantompon-tika Jesosy Kristy. ⁷ Naho zay mifandrambesa, manahake ty nandrambesa'i Kristy anareo avao ka aza, ho fideragn'a'Nagnahare. ⁸ Fa ambarako fa ty Kristy fa mpanompo ty vaosavatse ho'ey ty fahamarina'Nagnahare, mba hahafahagne magnato ty fampagnantenagne nameagne iarey ndaty bey, ⁹ le ho'aiareo Jentilisa mba hagnomeagne voninahitse an'Nagnahare noho ty famindram-poe. Manahak'izay ty voasoratse te hoeke: ''Naho izay reke le hagnomey fideragne Azo am'iarey Jentilisa raho hiantsa fideragne ty agnarao.'' ¹⁰ Mbe voatalily avao ka te ie: ''Mifalefalea, miarak'ami'ty ndati'e, nareo Jentilisa.'' ¹¹ Le te hoeke ka: ''Derao ty Andriatompo, nareo Jentilisa iaby; engao ty ndaty iaby hidera Azy.'' ¹² Le hoe ka, ty Isaia te hoeke: ''Hisy mpandimbe'i Jese, le irake hitsangagne hanampake am'iarey Jentilisa. Hanagne fatokiagne am'iarey Jentilisa.'' ¹³ Le lonike ty Andriagnanahare ty fatokisagne hameno anareo ami'ty fifaleagne naho ty fiadanagne iaby ami'ty finoagne, mba ho feno fatokisagne nareo, boak'ami'ty heri'ty Fagnahe Masigne. ¹⁴ Naho ty vatako ka le rese lahatse ty mahakasik'anareo, ry rahalahe. Rese lahatse raho fa feno hasoa ka nareo, feno ty hilala iabike. Rese lahatse raho fa afake mifagnanatse ka nareo. ¹⁵ Le mahavany manoratse ama'oreo raho mahakasike ty raha ilae mba hampitadidiagne anareo ndraike, noho ty fagnomezam-pahasoavagne namea'Nagnahare ahike. ¹⁶ Zay fagnomezam-pahasoavagn zay ro tokoe mba hanompoako i Kristy Jesosy nalefa t'a Jentilisa, mba hanolotse manahake ty sorogne ty talilisoa'Nagnahare. Tokoe hataoko zay mba ho azo ekeagne ty fagnate'iareo Jentilisa, voa'ava'ty Fagnahe Masigne. ¹⁷ Naho izay reke le am'i Kristy Jesosy naho ty raha'Nagnahare ty hifaleako. ¹⁸ Fa tsy ho vaniko ty hirehake ndra ino ndra inogne naho tsy ty raha vita'i Kristy tami'ty tagnako ho ey ty fagnekea'iarey Jentilisa. Vita boak'ami'ty rahake naho ty asa o raha iabike'eo, ¹⁹ tami'ty here'ty famantaragne naho fahagagagne, le tami'ty hery i Fagnahe Masigne. Boak'a Jerosalema zay, le lavidavitse manahak'i Ilyrikioma, ty hahafahako magnato ty talilisoa i Kristy. ²⁰ Am'izay, ty fagniriako le hitory ty talilisoa, fe ie tsy agne ami'ty ahafantaragne i Kristy ami'ty agnarae, mba tsy hagnoregnako ami'ty fa nagnoregna'ondaty. ²¹ Manahak'izay ty voasoratse te ie: ''Tam'iarey tsy nagnombaragne Aze ro hahatrea Aze, le ze tsy naharey ro hahaonigne.'' ²² Noho ty am'izay ka le voasakagne mateteke tsy ho ama'areo agne raho. ²³ Fa hananeke zao, tsy manan-toeragne am'o faritse reo Raho, naho taogne maro ro fa nagniriako mafe ho ama'areo agne. ²⁴ Naho izay reke ndra ombia ndra ombia ty andehanako a Espana, le magnantegna raho fa hahatrea anareo naho fa mandalo, naho hatere'areo ami'ty handehanako, naho fa avy nimane ty fiaraha'areo tselatsela Raho. ²⁵ Fa hanane zao le ho a Jerosalema Raho hikoko iarey mpino. ²⁶ Fa fifalea i Makedonia sy Akaia ty hanao fandraesagn'anjara ho ey'iareo misotry agnate'iareo mpino a Jerosalema agne. ²⁷ Enka, fifaleagne ho ey iareo zay, naho, mpitrosa amae vatae iareo. Fa naho ty Jentilisa ro nitraoke tami'ty raha masigne ey iareo, le tokoe hikoko iareo avao ka iarey ami'ze raha azo rambesegne. ²⁸ Naho zay reke, naho fa nataoko ty asa toy naho nagnato fa voarae'iareo ty vokatse navory, le ho a Espaina raho le hitilike anareo ami'ty lalako. ²⁹ Fantako fa naho fa mandeha mb'ama'oreo mbeo raho le hilitse ami'ty fahafenoa'ty fitahia'i Kristy. ³⁰ Hananeke zao mampirisike anareo raho, ry rahalahe, am'i Jesosy Kristy Tompontika, naho ami'ty fiteava ty Fagnahe, mba hiarake hialy amako nareo ami'ty vavake atao'areo ama'Nagnahare ho ahy. ³¹ Mivavaha mba ho avotse am'iareo tsy mankatoa e Jioda raho, le mba hoeke'iareo mpino ty fanompoako ho ey'i Jerosalema. ³² Mivavaha mba hiaviako ama'areo an-kafaleagne ami'ty sitrapo'Nagnahare, le mba hahafahako, mahita fitsaragne, miarak'ama'areo. ³³ Lonike ty Zagnahare ty fiadagnagne hitahy anareo iabike. Amena.