¹ Hoareke tamy iareo: "Talilieko ama'areo soa, fa misy ama'areo mitsangagne etoagne ty tsy hahafantatse havilasy izao aloha ty hivazohoa'iareo ty fanjakan'Andrianagnahare le ho avy amy ty hery jabajaba. ² Enegnadro tafara tataoy le nindesi'i Jesosy niarake tama'e ty Petera naho i Jakoba naho i Jaona t'am-bohits'abo egne, le iareo avao ty t'egne. Boakeo niova tarehy t'agnatreha'iareo Reke. Ie naho boakeo nanjary niova fagnova Reke agnatreha'iareo eo. ³ Ty sarimbo'e niova nanjelanjelatse naho mazava, naho foty bey, foty mihoatse ty nifotsiagne t'ambony tane eto. ⁴ Niavy teo ty Elia naho i Mosesy niseho tam'iareo, le nirehake tam'i Jesosy iareo. ⁵ Petera namale nirehake tam'i Jesosy nanao ty heoke: "O Raby, soa naho mipetrake eto heke tikagne, le handeha hanao lay telo, ty raike ho Azo, le ty raike hoe i Mosesy, le ty raike ka hoe i Elia." ⁶ (Avy le tsy fanta'e ty raha ho rehafi'e, satria le natahotse mafe iareo.) ⁷ Nisy rahogne avy le nanarogne iareo. Le nisy feo niboake boak'agnate'i rahogne'y ao nanao ty hoeke: "Intoy misy anako teako. Mijanjigna Aze." ⁸ Tampoke teo, naho nagnente ty magnodidigne aze iareo, le tsy nahatrea ndra ia ndra ia teoa sasa, naho tsy i Jesosy raiky avao. ⁹ Naho fa nizotso boak'am-bohetse'ey iareo, le nirara'e mafy tsy hitalily ndra am'ia ndra am'ia ty raha nitrea'iareo, naho tsy le fa nivagnom-belogne ty Ana'O ndaty. ¹⁰ Le nitàna'iareo hoe iareo avao ze saontsy zay, nefa le nifagnotane iareo ty toko'e ho dika ze " nivagnom-belogne" zay. ¹¹ Nagnontane Azy iareo ty hoeke: "Ngnino iareo mpahay lalàgne'eo nirehake te tsy maitsy ho avy mialoha ty Elia?" ¹² Le hoe Reke tamy iareo: "Fa niavy voaloha'e ty Elia hagnaregne ze raha iaby. Le nagnino ro voasoratse te ty Ana'O ndaty le hijale mafe amy ze raha maro le tsy hasiagne dika'e? ¹³ Nefa le izao ty ambarako ama'areo fa niavy ty ty Elia, nata'o ndaty ze sitrake ty arofo'e, arake ty fa nambara'i soratse masigne mahakasike aze'ey." ¹⁴ Naho fa niheregne tamy mpianatse rey teo iareo, le nahatrea ndaty maro nagnodidigne iareo le i mpahay lalàgne rey nilahatse t'Ama'e. ¹⁵ Naho vao nahatrea i Jesosy iareo, le latsa iaby i ndaty lahialegne'y le naho le ie iareo nagnantogne Aze le avy le nanalama Aze ka. ¹⁶ Nagnontane o mpiana'eo Reke nanao ty hoeke: "Ino ty mapifandietse anareo?" ¹⁷ Le nisy ndaty raike tamy vahoake'y namale Aze nanao ty hoeke: "O Mpagnanatse, nindeseko ho ama'o eto anako lahilahy tia. Misy kokolampogne tsy mampirehake aze. ¹⁸ Miambotrake aze o raha'o le mampiravodravoke aze le mapandoa vore aze, mangorintagne, naho le mijirigagne reke. Nangatake tamy'o mpiana'o reo raho ty mba hagnafake aze, nefatsy nahitam-boka'e." ¹⁹ Le namale iareo Reke nanao ty hoeke: "Nareo taranake tsy mino, manomboke mbia'ao ty hitobohako ama'areo eto? Le mbia ava'o ty handeferako ama'areo? Indso mbetoagne reke." ²⁰ Le nandesegne tama'e eo i lahilahe'y, le naho fa nitrea'i kokolampogne'y ty Jesosy, avy le nifanintosinto reke. Nitonta tamy tane'y eo i ajajalahÿ le nivorem-bava. ²¹ Nanao ty hoeke ty Jesosy naho nagnontane i rae'ey: "Tamy mbia ty nanoa'e hoe io? Le hoe i rae'ey: "Liae'e ty naha ajaja aze." ²² Le k'indraike reke ajera'o kokolampogne'eo agnate afo agne naho tagante rano naho le fa tea'e ho potehegne aza reke. Naho mahay ty kila raha iabe Rehe, le iferenaigno zahay, vonjeo zahay." ²³ Nisaontse tama'e ty Jesosy nanao ty hoeke: "'Naho mahay rehe'? ²⁴ Ty kila raha iaby le fanta'ze mino." Boakeo igne avy le nihorentsegne i raÿ ajajalahe'y nanao ty hoeke: "Mino raho! Ampeo raho amy ty tsy finoako!" ²⁵ Naho fa nivazoho'i Jesosy i vahoake rey nilay nagnantogne Azy, le nisaontsie'e mafy i kokolampo'oy ty hoeke: "Ihe fagnahy bobo naho karegnegne, mandily azo raho, isintaho reke, le ko tsobore'o sasa reke." ²⁶ Avy le nignorentsegne mafe reke le nampifanintotsintogne'e mafe le nikatse naho niavy eo. Le ty ata'e o ndaty mate'eo i ajajalahÿ, le nimaro ty rehake ty hoe: "Mate reke." ²⁷ Niraise'i Jesosy tamy ty tagna'e reke naho narene'e, le avy le nitsangagne i ajajalahÿ. ²⁸ Naho fa nilitse agnanjomba ao ty Jesosy, le nagnontanea'o mpianae'eo manokagne Reke ty hoe: "Nagnino zane zahay ro tsy naharoake i fagnahy rate'y?" ²⁹ Le hoe Reke ty namale iareo: "Ty manahake rey zao tsy hay rohegne naho tsy amy ty lala'ty vavake." ³⁰ Nisintake teo iareo le nandriogne t'a Galilia t'agne. Tsy tea'e ho fanta ty ndra ia ndra ia te ie boak'aia iareo, ³¹ fa nampianatse o mpianae'eo Reke. Nanao ty heoke Reke tamy iareo: "Le hatolotse am-pelatagna ty ologne ty ana'O ndaty, le ho vonoi'iareo Reke. Naho fa vilase Reke, le hivagnom-belogne ndraike Reke naho afake telo andro." ³² Fa le tsy rendre'iareo ndra raike o fagnambaragne'eo, le matahotse iareo ty hagnontane Aze. ³³ Niavy t'a Kaperinoamy iareo naho boakeo. Naho fa niavy nizilike agnanjomba ao Reke le nagnontane iareo te hoe: "Ino raha nifandiera'areo t'an-dalagneÿ?" ³⁴ Nitsigne iaby avao iareo. Satria fa nilahatse t'an-dalagne'y iereo amy ty ze bey vata'e. ³⁵ Niambesatse, le nitokave'e iareo roam-binifolo lahy le nanao ty hoeke Reke: "Naho misy ty te ho lohae, le tsimaitsy ho fara'e amy ty ie iaby reke le ho ondevo'o ndaty iaby." ³⁶ Nangalake ajaja raike Reke naho le nata'e ampovoa'iareo eo. Niontrogne'e agnan-tsandre'e egne reke le nanoa'e ty hoeke te: ³⁷ "Ndra ia ndra ia mandrambe ajaja manahake zao amy ty agnarako, le mandray Ahy ka, le naho misy ka ty mandray Ahy, le ts Iraho raike avw ty raisi'e, fa I nagnirak'Ahe'y ka." ³⁸ Le hoe ty Jaona t'Ama'e: "O Mpagnanatse, nahatrea ndaty nandroake devoly amy ty tahina'o zahay le nirarà'ay reke, satria tsy magnarake antika." ³⁹ Le hoe ty Jesosy nanao ty hoeke: "Ko raràgne reke,fa tsy misy ndaty hanao ty asa jabajaba amy ty agnarako nefa tsy ela avao le hagnaraty ty momba Ahy." ⁴⁰ Ndra ia ndra ia ty tsy manohetse antika le mpagnarake antika. ⁴¹ Ndra ia ndra ia magnome rano azo feno ty fitove hinomegne satria ai'i Kristy rehe, le ambarako azo ty tena marigne, fa tsy ho montso ty valen-katea'e." ⁴² Fa ndra ia ndra ia manikambatse ty raike ama'ty ze kele koko Ahy, le ho soa ama'e ty agnantognagne vato jabajaba famofoham-bare mirohe amy ty vozo'e le hatonta an-dranomasign'agne. ⁴³ Naho manikambatse azo ty tagna'o, le tapaho. Fa le soa ama'o ty militse kepeke amy fiaignagne'y agne te ie ty manan-tagnagne roe le handeha agn'afobey agne, amy ty afo tsy mete vonoegne. ⁴⁴ [Fagnamarihagne: Ty fandikagne tena soa le ty tsy magnisy "fihezanteny" amy ty andini'e faha44 naho ty 46 manao ty hoeke: "' Le tsy ho mate ty soko iareo naho tsy ho mate hatram-para'e ka i afo'oy.'"] ⁴⁵ Naho manikambats'azo i tombo'oy, le tapaho. Tena mete ama'o ty militse amy fiaignane'y agne mbiko naho ty mana tomboke roe le hariagne agn'afobey. ⁴⁶ [Henteo i fagnamarihagne amy ty andini'e faha 44] ⁴⁷ Naho manikambats'azo i maso'oy, le afaho agne. Mete ama'o ty militse goa amy ty fanjakan'Anagnahare naho izay maso roe le hariagne agn'afobey, ⁴⁸ agne amy ty toeregne tsy mahafate ty sosko iareo, naho afo tsy mete vonoegne. ⁴⁹ Naho fa kila ndate le sambe ho siragne amy ty afo. ⁵⁰ Le soa ty sira, fa naho botsake, le ino ty fomba hatao'o mba hampasira aze ndraike? Le raraho sira ty ama'areo ao, le milongoa amy ze kila'o ndaty."