¹ Iareo fariseo naho ty mpahay lalagne boake Jerosalema niavy niangogne nagnodidigne Aze. ² Le nahafohigne mpianatsey te nihinagne mofo tamy tagnagne maloto, mbe tsy nisasa. ³ (Fa iareo Fariseo naho Jiosy tsy nihinagne naho tsy boake nisasa tagnagne, noho iareo magnorike ty fombafomba o zokeo ndaty.) ⁴ Naho fa boak'antsena iareo Fariseo, le tsy mihinagne naho tsy boake niandro, ro mbe miambegne soa ty fomba maro hafa ka, manahake ty fanasagne kapoakeo, naho ty famaragnem ty fagnake varahigne naho ty fandriagne hihinana iareo.) ⁵ Nagnontane ty Jesosy iareo Fariseo naho mpahay lalàgne te: "(Nanao akore mpianao rey tsy magnorike ty fombafomba o lognakeo, fa ndra mihinagne ty mofo'e avao ami ty tagnae mbe tsy nisasa ao?" ⁶ Fa ie hoe Reke te: "Isaia nitoky soa hoe iareo piso magnaja hoho. Nanoratse te hoe: 'Ty ndaty retoa mihasy Ahy ami ty sognie, fa ie ty arofoe lavitse Ahy. ⁷ Foagne ty fivavahagne atolo iareo Ahy, naho mampianatse ty lilin-kavelogne ho fampianaragne iareo.' ⁸ Afoezo areo ty lilinagnahare fa hotana areo mafe ze fomba ty ndaty. ⁹ Le hoe Reke ka tamiareo te: "Manao akore ty fagnoriha-areo ty lilinagnahare mba hitahoa'areo ty fomban-draza areo! ¹⁰ Mosesy ka nanao izao te hoe: 'Mihasia rae, mihasia rene', 'le ze manao rehake raty amy ty rae naho ty rene'e nio ho mate'. ¹¹ Fie iareo nirehake te hoe: 'Naho misy lahilahy raike magnombara ami ty rae naho ty rene'e te: " Ndra inogne ndre inogne tea areo ho azo amako le fa Korbana," (zane hoe fa laha-Nagnahare zane)-- ¹² le fa enga' areo tsy hanao raha amy ty rae naho ty rene'e sasa reke. ¹³ Magnafake ty saontsinagnahare nareo noho ty fomban-draza areo. Naho ty raha maro hafa ata'areo." ¹⁴ Le nikoike ndaty maro Reke nanao ty hoe: "Mijanjigne Ahy nareo, le maharofàna. ¹⁵ Fa tsy misy raha boake ivelae ka hilitse handoto ty agnate'o ndaty. Fa ty miakatse boake agnate'ao ro mahaveta aze." ¹⁶ [ Fanamarinagne ty fandikagne rehake soa le tsy manao ty andinie 16: ze managne sofegne hoente-mitsandregne, le mitsanogna.] ¹⁷ Naho fa niala i maro'y ty Jesosy le nilitse anjomba ao, le nagnontane i mpianae rey mahakaseke fagnoharagney. ¹⁸ Le zao ty navalie Jesosy: " Nareo o vao mbe tsy mahilala? Tsy haiareo vao te ze raha militse ama'o ndaty boake ivelae le tsy mahaveta aze, ¹⁹ satria tsy militse agnarofoe, fa an-troe ao avao le miakatse ami fiakaragney?" Tami fagnombarae zay ty nagnova'i Jesosy malio o hanegneo. ²⁰ Nanao zao Reke: "Ze miakatse ama'o ndaty ro mahaveta aze. ²¹ Fa ty boake agnate, agnarofoe ro iboaha ty saigne raty, ty fahavetagne, ty halatse, ty famonoagne ndaty, tsy miriragne, ²² fitsiriritagne, hatserehegne, ty fanoagne dramotse, ty fitsetotsetoke, ty fialognagne, ty vande, ty fiavogne naho ty negne. ²³ 'Zay ty raha raty aby miakatse amy ty ndaty, zao ro mahaveta iareo." ²⁴ Nisintake Reke le nagnavelo ami ty fari'e Tyro naho Sydona agne. Nilitse tami ty anjomba raike Reke tsy tea'e ho fanta ty ndaty ndre ia ndre ia Reke te nizilike ao, fie mbe nifantatse avao. ²⁵ fie mbe nisy rakemba raike nidira ty anga-draty ty anak'ampelae, naofa nahaonigne Aze, le niavy, nihohoke ami fandia'e eo. ²⁶ O rakemba'o Grika, Syro-foinika ty nihirifae. Nitsoloke tamae reke mba hagnafake an-drekokolampogne hiala ami i anak'ampelaey. ²⁷ le hoe ty natoi'e amae te: "Omeo hanegne hey o'ajajao. Fa tsy mete nio ty mangalake ty mofo ty ajaja naho hatorake homeagne ty amboa." ²⁸ Fie namaly rakembay ty hoe: "Eka anio Andriantompo, fa ndra ty amboa ambane latabatse ao le mbe mitsimoke amy ty mofon'ajaja ao." ²⁹ Le hoe ty tsara'e amae te: "ami rehao zay, le afake mandeha rehe. Fa niakatse tami i anak'ampelaoy i angatse raty". ³⁰ Naofa niheregne an-tragnoe agne reke le nahatrea i ana'ey mandre ambone fandreagney, le fa tsy ama'e i anga-draty. ³¹ Le i Jesosy nienga ty faritse Tyro, le nionjogne ta Sidona sikala ami ty ranomasie Galilia le nanganike ka ty fari i Dekapolisy. ³² Le nindese iareo amae eo ty ndaty raike karegnegne ro bobo le nangatake tamae mba hametrahae ty fitae amae. ³³ Nandese'e nitolake ami o ndaty maro'o i lahie, le nametrake ty rambon-tagnae tan-tsofie teo Reke, naho fa boake nandrora, le nikasike ty lela'e. ³⁴ Niandrandra i lagnitse'y Reke, le niselek'aigne nanao ty hoe te: "Efata" manao te: "Mahareiza." ³⁵ Le ny tsy ela teo avao le naharey ty sofi'e, ze raha namehefehe ty lelae niafake, le nanjare nirehake mazava soa reke. ³⁶ Rinara i Jesosy iareo tsy hagnombara na ami ia na ami ia, fa ie ndre ty norinara iareo le ndra vao maike nitalily mbao mbao. ³⁷ Varinehake ty ndaty ka le nirehake te hoe: "Atae soa abike ze raha.Ty karegnengne nata'e naharey, ty bobo nahay nirehake."