¹ Le nandeha Jerosalema agne iareo, le niharine i Betifaga naho Betania, ambone vohitse Oliva agne, le Jesosy nagnirake ty roe ami'o mpiana'eo. ² Le nirehake tami iareo nanao ty hoe: "Mandenà amy ty vohitse alohantika roy. Naho misy vatae vao tafilitse ao nareo, le hahatrea anak'Ampondra mbe tsy nitongoa'o ndaty. Hahao areo reke le indeso mbamako atoy. ³ Naho misy ndaty mirehaka anareo ty hoeke: 'Ino maha-avy anareo manao toaàgneo?' le ano'o hoe zao: "Misy ilà ty Tompo aze le mbe haheregne eo tsy ela vao." ⁴ Nandeha niboake iareo le nahatrea anak'ampondra raike nifehe amy tamboho i tragnoy agnila'i lalagne raike antsisin-dalagneo'y,le nohaha iareo i talie'y. ⁵ Nisy ndaty ilae nitsangagne teo le nirehake tamy iareo: "Tinogne ty raha ata'areo toagneo, ie ndra haha'areo o ana'o ampondrao?" ⁶ Le nirehafee amae ty nirehea i Jesosy tamy iareo, le nenga i ndatie handeha amy ty lalagne hombae iareo. ⁷ Le nindese iareo mpianatse lahy tamy i Jesosy mbeo i ana'i ampondray le natae tambone'e teo ty siky iareo le afake nitongo ama'ey ty Jesosy. ⁸ Maro ty ndaty nandafike ty lambae tamy lalagney, ty ilae nandafike raven-katà fa nitampatampahe'e boake antonda agne. ⁹ Ze fa nandeha talohae naho ty nagnorike Aze nikorakorake te hoe: "Hosana! deragne ty raike amy ty tahina i Andriantompo. ¹⁰ Deragne ty fanjakà i Davida raentika! Hosana ty farae ambone agne!" ¹¹ Boakeo ty Jesosy niditse Jerosalema le nandeha tan-kiririsa i fiangonagney le nagnente ze raha iaby tao, naho fa nitsofotse i andro'y, le nikararake a Betania Reke naho ty roambinifolo lahy. ¹² Ty andro magnarake, naho fa niheregne boake Betania agne iareo, le nikere Reke. ¹³ Le nahatre hataen'adaro raike maro ravegne boake lavitse teroy Reke, le niharine hagnete te misy voae ty ama'eo, le naho fa nimbeo Reke, le tsy nahavazoho ndra ino ndre inogne naho tsy ravegne avao, fa mbe tsy fotoagne famoa i adaroy tamizay. ¹⁴ Le nirehake ka Reke tamizay te hoe: "Tsy hisy hihinagne voa amao sasa ndre mbia na mbia." Le pianae rey naharey izao. ¹⁵ Le nimbà Jerosalema iareo, le nilitse tan-kiririsa i fiangonagney Reke le nanomboke nadroake mpivarotse naho ty mpivily raha iaby tao. Nongahe'e ty latabam-panakalo i volay naho ty seza iareo mpamarotse voro-mahilala. ¹⁶ Tsy nimetea'e ndre ia ndre ia hinday raha hilitse havarotse ankiririsa i fiangonagney ao Reke. ¹⁷ Le nampianatse iareo Reke nirehake te hoe: "Tsy fa voasoratse vao te: ' ty anjombako le hotognonengne ho anjomba fivavahagne hoei ty tane toy?' Fa ie ndra nata iareo lakato fietaha ty mpangalatse. ¹⁸ Rey ty lahibey mpisorogne naho mpanao lalagne ty raha rinehae, le nipay ty raha hamonoagne Aze iareo satria ty vahoake iaby le niverenehake amy ty fampianarae. ¹⁹ Naho fa nihariva, le nisintake i tanagney iareo. ²⁰ Le naho fa nandeha iareo tamy maraimdraigney, le nahaonigne adaro nangegne hatra any ty fotoe. ²¹ Le nahatiaro ty Petera nirehake ty hoeke: "Ragnandria, Henteo! nangegne i adaro nompaoy. ²² . Jesosy namaly iareo ty hoe: "Minoa an'Andrianagnahare. ²³ Rehafeko ama'areo ty tena maregne fa na ia na ia nirehake amy ty lingolingom-bohitse te hoe: "Mitsangàna le mikompà an-dranomasigne agne,' naho tsy misy fisalasalagne ty ampoe ao fa mino ze raha hitranga amy ty nirehafe'e, le manahake zay ka ty hatao'Andrianagnahare. ²⁴ Noho 'zay le magnombara ama areo Raho te: ze raha iaby ivavaha'areo naho angataha'areo, ino'o areo te raha fa norambese'areo, le hoazo areo izao. ²⁵ Naho fa nitsangagne naho mivavake nareo, le tsy maintsy votsora'areo ty heloareo aby anagna-areo ndre amy ia ndra amy ia nareo, fa ho haha ty Rae ka nareo naho fa avy andagnitse agne. ²⁶ [Fanamarihagne: Ny fandikagne raha tena soa le tsy magnisy ty hoe (henteagne ami Mat. 16: 15) Mk. 11: 26 "Fa naho tsy mamotsotse heloke nareo le tsy hagnaha ty hakeo areo ndra mbia mbia ka ty Rae'areo andagnitse agne."] ²⁷ Le niongagne ta Jerosalema indraike iareo. Le naho nitsangatsangagne tanjombanagnahare, le niavy nagnontane Aze ty lahibe ty mpisorogne, ty mpahay lalàgne, naho iareo zokeo ndaty. ²⁸ Le hoareke tamy iareo: "Lilitse boakaia ty anoa'o raha iaby rey, ia ty nagnomey fahefagne Azo hanao hoe'io? ²⁹ Le hoe ty Jesosy tamy iareo: "Hametrake fagnonteneagne raike ama'areo Raho. Ambarao amako le horehafeko ama areo te lily boakaia ty anoako raha iaby 'zao. ³⁰ Ty batisa i Jaona, boake andagnitse agne vao ke boake ama o ndaty? Valeo Raho." ³¹ Niarake nametsevetse iareo le nifandietse rehake te hoe: "Naho mamale tikagne te: 'Boake an-dagnitse agne! Le hirehake Reke te hoe: 'Vaho magnino tsy inoa'areo Aze eo?' ³² Fa naho manoigne tika te hoe: boake ama o'ndaty, ...." Natahotse ndaty rey iareo, satria ty ndaty fa nagneke te i Jaona mpitoky vatae. ³³ Boakeo namale ty Jesosy tamy iareo: "Tsy hai'ay." Le hoe ty Jesosy tamy iareo te: "Iraho ka tsy hanombara ama'areo te fahefagne boake aia ty anoako raha aby rey."